s TORAJA PL Kejadian Ayub

Alkitab
Bahasa Toraja
Edisi 2009

Kejadian s.d. Ayub

KADADIAN
Kadadianna langi’ sola lino

1:1–2:7
1 Iatonna tipamulanna, Napadadii
Puang Matua tu langi’ sola lino.
2 Iatu lino tang tibori’pa sia tae’ bangpa
apa-apa lan sia misa’pa tasik pidunpidunan; na iatu PenaanNa Puang Matua
sumayo daona lu uai.
3 Ma’kadami tu Puang Matua kumua: La
den tu masiang. Denmi tu masiang.
4 Natiroi Puang Matua tu masiang kumua
melo, Napasisarakmi Puang Matua tu
masiang na malillin.
5 Nasangaimi Puang Matua allo tu

masiang, na bongi tu malillin. Tonna
mangkato, makaroenmi sia melambi’,
iamo allo bunga’na to.
6 Ma’kadami tu Puang Matua kumua: La
den tu batara lan to’ tangnga uai, anna
pasisarakki tu uai.

1

KADADIAN 1.7 – 14

7 Napadenmi

2

Puang Matua tu batara,
anNa pasisarakki tu uai diongna lu sia
daona lu; dadimi susito.
8 Nasangaimi Puang Matua langi’ tu
batara. Tonna mangkato makaroenmi sia

melambi’, iamo allo ma’penduanna to.
9 Ma’kadami tu Puang Matua: La ma’misa
rokko misa’ inan tu mintu’ uai nasambo
langi’, anna sombo tu karangkean.
Dadimi susito.
10 Nasangaimi Puang Matua
kapadanganna tu karangkean sia
iatu nanii ma’misa uai Nasanga tasik;
Natiroi Puang Matua, kumua melo.
11 Ma’kadami tu Puang Matua: Iatu
padang la untuoan riu sia tananan kelise’
sia kayu membua situru’ a’ganna, tu
kelise’ lanna lu dao kuli’na padang.
Dadimi susito.
12 Natuoammi padang tu riu sia tananan
kelise’ situru’ a’ganna sia kayu membua,
tu kelise’ lanna lu situru’ a’ganna. Natiroi
Puang Matua, kumua melo.
13 Tonna mangkato, makaroenmi sia
melambi’, iamo allo ma’pentallunna to.

14 Ma’kadami tu Puang Matua: La den
pira-pira apa parrang lan batara dao
langi’, anna pasisarakki tu allo na bongi

KADADIAN 1.15 – 21

3

sia mendadi tanda sia pentaunan sia
umpamanassa allo sia taun,
15 sia kumua anna mendadi apa
mangarrang lan batara dao langi’ la
unnarrang lino. Dadimi susito.
16 Napadenni Puang Matua da’dua apa
parrang kapua, iatu apa parrang tu
kapuana la umparenta masiang, na iatu
apa parrang tu bitti’na la umparenta
bongi, sia mintu’ duka bintoen.
17 AnNa palanni batara dao langi’ Puang
Matua la unnarrang lino,

18 sia la umparenta allo sia bongi sia la
umpasisarak masiang na malillin. Natiroi
Puang Matua, kumua melo.
19 Tonna mangkato, makaroenmi sia
melambi’, iamo allo ma’penna’pa’na to.
20 Ma’kadami tu Puang Matua: La
sibi’tokan lan mintu’ to’ uai tu ba’tu
pira-pira kepenaanna sia la den manukmanuk sitiaran lan lino sia lan batara
dao langi’.
21 Napadadimi Puang Matua tu bale
kapua sia mintu’ olo’-olo’ sisayoan, tu
sibi’tokan lan to’ uai, situru’ a’ganna,
sia mintu’ manuk-manuk kepani’ situru’
a’ganna. Natiroi Puang Matua, kumua
melo.

KADADIAN 1.22 – 27

22 Napassakkemi

4

Puang Matua Nakua:
Membati’ kalle-kalleangkomi sia
samemba’ka’-ba’ka’nakomi sia ponnoi tu
uai lan tasik, na iatu manuk-manuk la
memba’ka’ lan lino.
23 Tonna mangkato makaroenmi sia
melambi’, iamo allo ma’pellimanna to.
24 Ma’kadami tu Puang Matua kumua:
Iatu lino la umpabu’tu panampa kepenaa
situru’ a’ganna, iamotu patuoan sia
olo’-olo’ mendonglo’ sia iatu mariranna,
situru’ a’ganna; dadimi susito.
25 Napadadimi Puang Matua tu mintu’
olo’-olo’ marira situru’ a’ganna, sia
mintu’ patuoan situru’ a’ganna sia mintu’
olo’-olo’ mendonglo’ dao kuli’na padang
situru’ a’ganna. Natiromi Puang Matua,
kumua melo.

26 Ma’kadami tu Puang Matua kumua:
Melo ke umpadadiKi’ tolino Tapasusi
rupanTa, umparundu’i a’ganTa, dikua
anna parentai tu mintu’ bale lan tasik
sia mintu’ manuk-manuk dao lu langi’
sia mintu’ patuoan sia mintu’ issinna
lino sia mintu’ olo’-olo’ mendolonglo’ tu
mendonglo’ diong padang.
27 Napadadii Puang Matua tu tolino
Napasusi rupanNa, Napadadii susi

KADADIAN 1.28 – 2.2

5

rupanNa Puang Matua; Napadadimi tu
muane sia baine.
28 Napassakkemi Puang Matua sola duai,
Nama’kada lako Nakua: Membati’komi
sia memba’ka’komi sia ponnoi te lino, sia

taloi sia parentai tu mintu’ bale lan tasik
sia mintu’ manuk-manuk dao lu langi’ sia
mintu’ tu olo’-olo’ mendonglo’ lan lino.
29 Sia Nakua Puang Matua: Tonganna
tongan kumua mintu’ tananan kelise’
narande tana sia mintu’ kayu kelise’
buanna Kubenmokomi la mikande.
30 Apa iatu mintu’ olo’-olo’ marira lan lino
sia mintu’ manuk-manuk dao lu langi’
sia mintu’ olo’-olo’ mendonglo’ lan lino,
tu kepenaanna, Kubenmo tu mintu’na
daun-daun maido la nakande. Dadimi
susito.
31 Natiro Puang Matua tu mintu’ apa
Napadadi, kumua lendu’ tongan melona.
Tonna mangkato, makaroenmi sia
melambi’, iamo allo ma’pennannanna to.
1 Susimoto tu langi’ sola lino sia
mintu’ issinna mangka dipatepu.
2 Iatonna allo ma’pempitu tonNa

patepumi Puang Matua tu
pengkaranganNa tu mangka Nakarang,
Natorroimi tonna allo ma’pempitu

2

KADADIAN 2.3 – 7

6

ungkarangi tu mintu’ pengkarangan
mangka Nakarang.
3 Napassakkemi Puang Matua tu allo
ma’pempitu sia Napamadatu, belanna ia
Nanii untorroi ungkarang pekaranganNa
tu mangka Nakarang tonNa padadii.
4 Susimoto tu ulelean diona tipamulanna
langi’ sola lino, tonna mangka dipadadi.
IatonNa garagai tipamulanna PUANG
Kapenomban tu langi’ sola lino,

5 – anna mintu’ kayu dao kuli’na
padang tonna tae’pa lan lino sia mintu’
tananan dao kuli’na padang tonna tang
mentarukpa, belanna tae’pa anNa pasaei
PUANG Kapenomban tu uran tama lino
sia tae’pa tau la umposara’i tu litak,
6 sangadinna kendek tu ambun diong mai
padang anna sakka’i tu mintu’ kuli’na
padang –,
7 Nakombongmi PUANG Kapenomban
tu tolino dio mai litak, Napamurru’i
tama to’tok illongna tu penaa napotuo,
susimoto tu tolino mendadi misa’ a’gan
tuo.

KADADIAN 2.8 – 14

7

Pa’lak Eden

8 Nagaragaomi

2:8-25

PUANG Kapenomban
tu Pa’lak dio Eden, dio rampe matallo,
indemoto Napannianni tu tolino mangka
Nakombong.
9 Indeto dio Nanii PUANG Kapenomban
umpatuo ma’rupa-rupa kayu, naporai
tau untiroi sia melo la dikande, sia den
duka tu kayu katuoan, lan tangnga
pa’lak iato, sia kayu kapaissanan diona
melo na kadake.
10 Dio mai Eden nanii lolong salu la
ussakka’i pa’lak iato, indemoto nanii
tipa’a’pa’ tu salu.
11 Iatu salu bunga’na disanga Pison,
ussalungku tondok Hawila, tu nanii bu’tu
bulaan.

12 Iatu bulaanna padang iato matasak
tongan, sia den duka dio tu lite
busarungngu’ sia ake’ ido.
13 Iatu salu ma’penduanna disanga
Gihon, iamo ussalungku tondok Etiopia.
14 Iatu salu ma’pentallunna disanga
Hidekel, iamo lolong lu tama rampe

KADADIAN 2.15 – 20

8

matallona Asyur, na iatu salu
ma’penna’pa’na disanga Efrat.
15 Naalami PUANG Kapenomban tu
tolino, Napalanni pa’lak Eden, kumua
anna posara’i sia anna kampai.
16 Ma’kadami PUANG Kapenomban lako
tolino Nakua: Iatu buanna mintu’ kayu
lan te pa’lak, ma’din mukande unturu’
pa’poraiammu,
17 apa iatu kayu kapaissanan diona melo
anna kadake da mukandei, belanna
randuk allo iato ke mukandei, la ma’lalan
mateko.
18 Sia ma’kada tu PUANG Kapenomban
susite: Tae’ anna melo, ke misa-misa
bangri tu tolino. La Kukombongan to
umbalii, tu nasangkalammaran.
19 Belanna iatonna mangkamo Napadadi
PUANG Kapenomban tu mintu’na
olo’-olo’ dao kapadanganna sia mintu’
manuk-manuk dao lu langi’ dio mai litak,
Napopentingayo nasangmi lako tolino, la
Natiro umba nakua tolino la ussangai;
umba nasanganni tolino tu mintu’ a’gan
tuo, susi dukamoto tu sanganna.
20 Nasangaimi tolino tu mintu’ patuoan
sia mintu’ manuk-manuk dao lu langi’
sia mintu’ olo’-olo’ dio lu kapadanganna,

KADADIAN 2.21 – 3.1

9

apa iatu tolino tae’ anna appa’i tu to
nasibalian tu nasangkalammaran.
21 Napamamma’ kalupi-lupiammi PUANG
Kapenomban tu tolino, anna leppeng
Naalami tu usukna sangbamban,
Napakemunni duku’ tu pangalaian.
22 Nakombongmi PUANG Kapenomban
misa’ baine tu usuk Naala lan mai kalena
tolino, Nasolanni lako tolino.
23 Nakuami tolino: Buku lu dio pale’ mai
bukungku sia duku’ lu dio mai duku’ku;
la disanga baine, belanna diala dio mai
muane.
24 Iamoto anna la untampe ambe’na
sia indo’na tu muane anna la’ka’ lako
bainena, anna mendadi sangbatang kale
sola duai.
25 Ma’kale-kale bang sola duai ma’baine
tu tolino, apa tae’ namasiri’.
Katobanganna to lino tama kasalan

3:1-24
1 Iatu ula’ mandu matangngaran na
iatu mintu’na olo’-olo’ lan lino, tu
mangka Napadadi PUANG Kapenomban.
Nakuami tu ula’ lako baine iato: Umbai
susite tu kadanNa Puang Matua: Da

3

KADADIAN 3.2 – 8

10

mikandei buanna tu mintu’ kayu lan te
pa’lak!
2 Mebalimi tu baine lako ula’: Ma’din
kikande buanna tu mintu’ kayu lan te
pa’lak,
3 sangadinna iatu bua kayu lan tangnga
pa’lak Nakua Puang Matua: Da mikandei,
ba’tu da mirumbui, da mimate.
4 Nakuami ula’ lako tu baine: Manassa
tae’ ammi ma’lalan mate.
5 Sangadinna Naissan Puang Matua,
kumua randuk allo iato, ke mikandei
tu bua kayu iato, ta’pa tibungka’ tu
matammi, ammi susi Puang Matua
unnissan melo sia kadake.
6 Natiromi tinde baine, kumua melo la
dikande tu bua kayu iato sia dipora’dik
untiroi, ondongpi iamo misa’ kayu sipatu
dikaduangi la umpabu’tu kamanarangan,
naalami tu buanna nakandei sia naben
duka muanena, anna kandei sola.
7 Tibungka’mi tu matanna sola duai,
naissanmo kumua ma’kale-kale, nalelenlelenmi tu daun kayu ara, nagaraga
dodo.
8 Nasa’dingmi tu tengkaNa PUANG
Kapenomban sumalong-malong
lan pa’lak tonna mangiri’ tu angin

KADADIAN 3.9 – 14

11

sarrang allo; umpembuniammi PUANG
Kapenomban tu tolino sola duai ma’baine
dio mai oloNa PUANG Kapenomban tama
to’ kayu makampu-kampu lan pa’lak
iato.
9 Nakambaroimi PUANG Kapenomban tu
tolino Nakua: Umbara munii?
10 Mebalimi tolino nakua: Kusa’ding tu
tengkaMi lan to’ pa’lak, mataku’mo’,
belanna ma’kale-kalena’, iamoto angku
membuni.
11 Ma’kada Puang, Nakua: Mindara
ungkuangko kumua ma’kale-kaleko?
Mukanderaka tu bua kayu, tu mangka
Kupasanangko kumua da mukandei tu
buanna?
12 Mebali tu tolino: Napa te baine
Miparondonganna’ tu umbenna’ bua
kayu iato angku kandei.
13 Ma’kadami PUANG Kapenomban lako
tu baine: Apara te mangka mupogau’?
Mebali tu baine: Napakenana’ ula’ angku
kandei.
14 Ma’kadami PUANG Kapenomban lako
tu ula’:
Belanna mangka mupogau’ tu susinnato,
tampakan ropumoko na iatu mintu’na
patuoan sia olo’-olo’ dao kapadanganna,

KADADIAN 3.15 – 19

12

kumua la mendonglo’ko umpopa’lingka
tambukmu sia la ungkande dukako
barra’-barra’ angge tuomu.
15 La Kupaden tu kasiualiammu na iate
baine sia bati’mu anna bati’na; iamo
la unnisak-nisakki tu ulummu ammu
totokki tu kambutu’na!
16 Nama’kada Puang lako tu baine:
La Kupakerangngan lako kalemu
tu kamasussan ke ma’tambukko,
la mapa’di’ko ke la kianakko, sia
la mamali’ko lako muanemu anna
parentako.
17 Ma’kadami Puang lako tolino:
Belanna muperangiimo tu kadanna
bainemu ammu kandei tu bua kayu
Kupasanangko, kumua da mukandei,
iamoto la narua tampak ropu te kuli’na
padang mutumang, anna situangpi
kamaparrisan angge tuomu mumane
ungkandei tu burana.
18 La napatuoangko duri sola a’da’, na
iatu kandemu iamotu utan tuo dio lu
padang.
19 La to’dopi tu ma’pu’mu, mumane
ungkande kandemu, sae lako sulemu
pole lako litak, belanna dio mai dinii

KADADIAN 3.20 – 24

13

unnalako. Apa litakko, dadi la sule lako
dukako litak!
20 Pakalan nasangaimi tolino Hawa tu
bainena, belanna iamo indo’na mintu’ to
tuo.
21 Nagaragami PUANG Kapenomban
tamangkale tu balulang, nagaragan
tolino sola ma’baine. Napaluangi sola
duai.
22 Ma’kada PUANG Kapenomban:
Tonganna iatu tolino susi bang to
misa’mo dio mai te Kita, naissan tu melo
sia kadake; totemo nakorongi manii
limanna, naalami tu bua kayu katuoan
nakandei natuomo tontong sae lakona.
23 Iamoto anNa suai PUANG Kapenomban
sun lan mai pa’lak Eden, kumua anna
posara’i tu litak, dinii ungkombongi dio
mai.
24 Naula’imi tassu’ tu tolino Napannii
ba’tu pira-pira karubion mentiro lu lako
matallona pa’lak Eden sitetang pa’dang
pandillak-dillak dukku-dukku matanna la
ungkampai lalan lako to’ kayu katuoan
iato.

KADADIAN 4.1 – 7

4

14

Diona Kain sola Habel
4:1-26

1 Sangampa’mi

bainena tu tolino,
iamotu Hawa, ma’tambukmi,
nadadianni tu Kain, nakuami: Kuappa’mo
tu misa’ pia muane tete dio pa’tunduanNa
PUANG.
2 Undinnato nadadiammi tu adinna, iamo
Habel; iatu Habel umpatuo bembe’ sola
domba, na iatu Kain lumbang dilitak.
3 Den pissan tonna kendekmo bura
padang nabaami Kain tu bura padangna
la dipenomban langngan PUANG.
4 Ia duka tu Habel naala tu duku’ bembe’
sia domba pa’bunga’na sia lompona.
Naalami penaanNa PUANG tu Habel sia
iatu pemala’na.
5 Apa iatu Kain sia penombana tae’
anNa alai penaanNa PUANG. Lendu’mi
sengkena tu Kain sia suruk bang.
6 Nakuami PUANG lako Kain: Ma’apai
ammu sengke sia tukku bang?
7 Iake ma’gau’ meloko tae’ mutang
mentingara? Na iake tae’i ammu ma’gau’
melo, tumayamo tu kasalan dio to’

KADADIAN 4.8 – 15

15

babangan. Nakailuiko apa sipatu la
muparenta!
8 Nakuami tu Kain ungkuan Habel,
adinna: (Talao lako padang.) Iatonna
diomo lu padang sola duai, nabobo’mi
Kain tu Habel, adinna, napatei.
9 Nakuami PUANG lako Kain: Umbami tu
adimmu, Habel? Mebalimi: Tae’kuissanni;
akuraka ungkampai adingku?
10 Nakuami PUANG: Apara tu mangka
mupogau’? Iatu gamara rarana adimmu
metamba diong mai padang lako kaleKu!
11 Iamoto nasallamoko padang, tu
mangka menganga untimang rarana
adimmu dio mai limammu.
12 Iake muposara’i tu padang, manassa
tae’mo na la umpakendekangko burana,
la salamba-salaoko lan lu lino!
13 Nakuami tu Kain lako PUANG: Iatu
kasalangku natondon maro’na’.
14 Tonganna totemo Miula’imo’ lan mai
padang iate, la kupembunian tu kaleku
dio mai oloMi, sia la salamba salaona’
lan te lino; manassa la dadi undinna, ke
minda-minda kusitammuan tae’ na la
tang umpateina’.
15 Nakuami PUANG lako Kain: Iamoto ke
denni tau umpatei Kain, la manglokkon

KADADIAN 4.16 – 23

16

pempitu tu pakkanna! Nabenni tanda
PUANG tu Kain kumua da napatei tau, ke
denni nasitammuan.
16 Sumoro’mi tu Kain dio mai oloNa
PUANG, natorro dio padang Nod, dio
matallona Eden.
17 Sangampa’mi tu Kain bainena,
nama’tambuk, nadadianni tu Henokh.
Ullepongmi tondok tu Kain, nasangaimi
Henokh sikona sanganna anakna.
18 Iatu Henokh undadiammi Irad, na
Irad undadian Mehuyael na Mehuyael
undadian Metusael na Metusael undadian
Lamekh.
19 Iatu Lamekh umpada’dua bainena,
misa’ disanga Ada na misa’ disanga Zila.
20 Iatu Ada undadian Yabal, iamo
naponene’ mintu’ to ma’banua tenda sia
to umpatuo patuoan.
21 Iatu adinna disanga Yubal, iamo
naponene’ mintu’ pa’katapi sia passuling.
22 Na iatu Zila undadian Tubal-Kain, iamo
misa’ pande tambaga sia pande bassi;
iatu adinna baine Tubal-Kain, disanga
Naama.
23 Nakuami tu Lamekh lako bainena sola
duai Ada sola Zila: Perangii sola duakomi
tu randan dipudukku, e kamu bainena

KADADIAN 4.24 – 5.2

17

Lamekh, patananni talinga tu tongka’
dililaku. Tonganna umpateina’ misa’
muane belanna diona bangkeku, sia to
mangura belanna diona kaluntorangku.
24 Belanna iake pempitui dipassosoan
tu Kain, iatu Lamekh la dipassosoan
pempitungpulo sipitu!
25 Iatu Adam sangampa’ pole’omi
bainena, nadadiammi tu misa’ pia
muane, nasangai Set nakua: Belanna
nabenmo’ Puang Matua tu misa’ taruk
senga’ la ussonda Habel, tu mangka
napatei Kain.
26 Iatu Set undadian misa’ pia muane,
tu nasangai Enos; attu iamorato anna
randuk tu tau massambayang ussa’bu’
sanganNa PUANG.
Ossoranna bati’na Adam sae
lako tonna sae uai saba’

5:1-32
1 Iamora te tu ossoranna Adam.
IatonNa padadii Puang Matua tu
tolino, Napasusi a’ganNa.
2 Napadadii tu muane sia baine,
Napassakkemi Nasangai: Tolino, tonna
attu dipadadi.

5

3 Iatu

KADADIAN 5.3 – 12

18

Adam saratu’ tallungpulomo
taunna, anna dadianni tu misa’ pia
muane, susi bang a’ganna sia umpalin
rupanna Adam, anna sangai Set.
4 Iatonna mangka undadian Set, karuapa
ratu’na taunna tu Adam, anna dadian
ba’tu pira-pira muane sia baine.
5 Iatu Adam kasera ratu’na ntallungpulo
taunna, namane mate.
6 Iatu Set saratu’ limamo taunna, anna
dadian Enos.
7 Iatonna mangka undadian Enos,
karuapa ratu’na mpitu taunna tu Set,
anna dadian ba’tu pira-pira muane sia
baine.
8 Iatu Set kasera ratu’na sangpulo dua
taunna namane mate.
9 Na iatu Enos kaseramo pulona taunna,
anna dadian Kenan.
10 Iatonna mangka undadian Kenan,
karuapa ratu’na sangpulo lima taunna,
anna dadian ba’tu pira-pira muane sia
baine.
11 Iatu Enos kasera ratu’na llimang taun,
namane mate.
12 Iatu Kenan pitungpulomo taunna,
anna dadian Mahalaleel.

13 Iatonna

KADADIAN 5.13 – 22

19

mangka undadian Mahalaleel,
karuapa ratu’na mpatangpulo taunna
tu Kenan, anna dadian ba’tu pira-pira
muane sia baine.
14 Iatu Kenan kasera ratu’na sangpulo
taunna, namane mate.
15 Iatu Mahalaleel annanmo pulona llima
taunna, anna dadian Yared.
16 Iatonna mangka undadian Yared,
karuapa ratu’na ntallungpulo taunna tu
Mahalaleel, anna dadian ba’tu pira-pira
muane sia baine.
17 Iatu Mahalaleel karua ratu’na ngkasera
pulona llima taunna, namane mate.
18 Iatu Yared saratu’annanmo
pulonandua taunna, anna dadian
Henokh.
19 Iatonna mangka undadian Henokh
karuapa ratu’na taunna, anna dadian
ba’tu pira-pira muane sia baine.
20 Iatu Yared kasera ratu’na annanpulona
ndua taunna, namane mate.
21 Na iatu Henokh annanmo pulonallima
taunna, anna dadian Metusalah.
22 Iatu Henokh, tonna mangka undadian
Metusalah talluratu’pa taunna tuo,
la’ka’bang lako Puang Matua, anna
dadian ba’tu pira-pira muane sia baine.

23 Iatu

KADADIAN 5.23 – 30

20

Henokh talluratu’ annanpulona
llima taunna.
24 Iatu Henokh la’ka’ bang lako Puang
Matua, pa’demo ia, belanna Nasolan
Puang Matua langngan.
25 Iatu Metusalah saratu’mo
ngkaruapulona mpitu taunna, anna
dadian Lamekh.
26 Iatonna mangka undadian Lamekh,
pituratu’pa ngkaruapulona ndua taunna
anna dadian ba’tu pira-pira muane sia
baine.
27 Iatu Metusalah kasera ratu’na
annanpulona ngkasera taunna, namane
mate.
28 Iatu Lamekh saratu’mo karuapulona
ndua taunna anna dadian pia muane
misa’.
29 Nasangaimi Nuh nakua: Iamote tu la
umpakatanaki’ lan kamara’tasanta sia lan
kamaparrisanta mengkarang, napobua’
padang, tu mangka Natampakki ropu
PUANG!
30 Iatonna mangka undadian Nuh,
limaratu’pa ngkaserapulona llima taunna
tu Lamekh anna dadian ba’tu pira-pira
muane sia baine.

31 Iatu

KADADIAN 5.31 – 6.4

Lamekh pitu ratu’na
pitungpulompitu taunna, namane
mate.
32 Iatu Nuh lima ratu’mo taunna anna
dadianni tu Sem, Ham sola Yafet.

6

21

Kakadakeanna tolino

1 Iatonna

6:1-4

sakerangnganrangngannamo tu bilanganna
tolino lan telino sia budamo pia baine
nadadian,
2 natiromi anak Puang Matua tu baine
bati’ tolino, kumua melo tu pantarisanna,
anna pobainei minda-minda tu naala
penaanna.
3 Ma’kadami tu PUANG: Iatu PenaangKu
tae’ na la tontong bang lan kale tolino,
belanna patengkan sia inang pa’kalean
siamo; la saratu’ duangpulomora taunna
tempona tu tolino!
4 Attu iato den tu tau lan lino kalando
kapua naundinnato, tonna rampeimi
anak Puang Matua tu baine bati’ tolino,
napadadiammi bati’: iamote tu lalong sia
kalelean tu sanganna tonna lino dolo.

KADADIAN 6.5 – 11

22

Uai saba’
5 Natiro

6:5–9:7

PUANG tu kakadakeanna tolino
lendu’ tongan kapuana, sia tontong bang
kelok tu karangan inaanna;
6 menassanmi tu PUANG, belanna
mangka umpadadi tolino untongkonni
kuli’na padang sia iamoto tu umpatu’pe
penaanNa.
7 Ma’kadami tu PUANG kumua: la
Kusabu’i lan mai lino tu tolino mangka
Kupadadi, la tolino la patuoan sia
olo’-olo’ mendonglo’, sia manuk-manuk
dao lu langi’ belanna menassanMo’
mangka ungkombongi tu mintu’iannato.
8 Apa iatu Nuh dikamasei dio mai oloNa
PUANG.
9 Iamote tu ulelean diona Nuh. Iatu Nuh
misa’ to malambu’ penaanna sia tae’
sayuanna dio mintu’na tau attu iato, na
iatu Nuh la’ka’ bang lako Puang Matua.
10 Undadiammi tallu pia muane tu Nuh,
iamo Sem, Ham na Yafet.
11 Na iatu lino kadake liumo dio oloNa
Puang Matua sia ponnomo kamasa’garan
te lino.

KADADIAN 6.12 – 17

12 Natiromi

23

Puang Matua te lino,
tonganna kadake liumo, belanna mintu’
kepenaanna umbala’-bala’mo lalanna lan
te lino.
13 Iamoto anNa ma’kada tu Puang
Matua lako Nuh kumua: Nalambi’mo
tu ma’katampakanna mintu’ tolino
situru’ pangra’ta’Ku, belanna ia te lino
naponnoimo kamasa’garan.
Tonganna la Kusabu’i tu tau iato mai sola
te lino!
14 Garagako misa’ lembang kayu gopiri;
la musapa’-sapa’ sia la mupi’da’ tu lanna
lu sia salianna.
15 La mugaraga susite: iatu lambe’na
talluratu’ siku, na iatu babana limangpulo
siku na likunna tallungpulo siku.
16 La mupapai tu lembang, iatu (rinding)
lembang dipasae langngan anggenna
sangsiku dao mai papa sia ba’ba lembang
iato la mupadio sa’dena, la mugaraga tu
sapa’ diongna lu sia ma’penduanna na
ma’pentallunna.
17 Tonganna la kupasae tu uai saba’ lan
te lino la ussabu’i mintu’ angge menaa
nasambo langi’ sia mintu’na apa lan lino
la sisarak angin dipudukna.

18 Apa

KADADIAN 6.18 – 7.2

24

iatu ikona, la Kutananangko
basseKu; la mentamako lembang iato,
iko sola repokmu sia iatu mai bainena
anakmu sola iko.
19 Iatu mintu’ kepenaanna iamotu mintu’
angge menono’ sida’dua, misa’ laki na
misa’ birang la mupatama lembang la
dikarimmanni tu sunga’na sola iko.
20 Iatu mintu’ manuk-manuk situru’
a’ganna na mintu’ patuoan situru’
a’ganna na mintu’ olo’-olo’ mendonglo’
dao kuli’na padang situru’ a’ganna
sida’dua ke sangrupaoi la sae lako
kalemu.
21 Na iatu iko, alai tu mintu’ kande
ma’dinna dikande, rampunni, ammi
potuoi sia mintu’i sola nasang.
22 Napogau’mi Nuh tu mintu’ apa
Napasan Puang Matua lako kalena,
susimoto napogau’.
1 Undinnato ma’kadami PUANG lako
Nuh Nakua: Tamamoko lembang sola
mintu’ to lan banuammu, belanna ikomo
tu Kutiro malambu’ dio oloKu tu mintu’na
tau attu iate.
2 Dio mai mintu’ olo’-olo’ tang
dipemalianna la muala sipitu rundun bali,
misa’ laki na misa’ birang, apa dio mai

7

KADADIAN 7.3 – 10

25

mintu’ olo’-olo’ dipemalianna da’duari,
misa’ laki na misa’ birang.
3 Sia dio mai manuk-manuk dao lu langi’
sipitu rundun bali misa’ londong na misa’
birang, la umpatumale’ bati’ lan mintu’na
lino.
4 Belanna pitung allopa angKu pasae uran
tama lino patangpulo allona patangpulo
bonginna, na mintu’ angge menono’ tu
mangka Kupadadi la Kusabu’i lan mai
lino.
5 Napogau’mi Nuh tu mintu’ apa Napasan
PUANG lako kalena.
6 Iatu Nuh annanratu’mo taunna dadinna
tonna sae tama lino tu uai saba’.
7 Iatu Nuh sola repokna, sia iatu mai
bainena anakna mentamami lembang
umpallaian kalena dio mai uai saba’.
8 Dio mai mintu’na olo’-olo’ tang
dipemalianna sia dipemalianna sia
mintu’ manuk-manuk sia mintu’ olo’-olo’
mendonglo’ dao kuli’na padang,
9 sae rundun bali, ke sangrupaoi, lako
Nuh mentama lembang, misa’ lakinna
misa’ birangna, susitu kadanNa Puang
Matua lako Nuh.
10 Tonna lendu’mo pitung allo, saemi tu
uai saba’ tama lino.

11 Iamo

KADADIAN 7.11 – 16

26

tonna annanratu’mo taunna
dadinna tu Nuh, tonna bulan
ma’penduan, allo ma’pessangpulo
pitunna, allo ia dukato mintu’
kalimbuang lan posi’na tana kumala’dak
anna mintu’ mata kalimbuang dao langi’
tibungka’ duka.
12 Saemi tu uran kamban tama lino
patangpulo allona patangpulo bonginna.
13 Allo ia dukamoto anna tama lembang
tu Nuh na Sem, Ham na Yafet, anakna
Nuh sia bainena Nuh anna bainena
anakna sola tallui.
14 Iatu tau iato mai sola mintu’ olo’-olo’
marira situru’ a’ganna sia mintu’ patuoan
situru’ a’ganna sia mintu’ olo’-olo’
mendonglo’ lan lino situru’ a’ganna sia
mintu’ manuk-manuk situru’ a’ganna,
mintu’ manuk-manuk pantan laen
pani’na.
15 Dio mai mintu’na pa’padadi kepenaa
sia menono’ sae rundun bali tama
lembang lako Nuh.
16 Iatu mintu’nato sae situang laki
situang birang dio mai mintu’ pa’padadi
susitu Napokadanna Puang Matua
lako Nuh. Namane untutu’i PUANG tu
lembang.

17 Iatu

KADADIAN 7.17 – 23

27

uai saba’ patangpulo allona lan
lino, anna sakendek-kendekna tu uai,
anna aanganni tu lembang diong mai
padang.
18 Sakapua-puanami tu uai sia
sakendek-kendeknamo lan lino, anna
unnaang-aang tu lembang dao uai.
19 Iatu uai sakapua-puana lan lino,
naurunganni mintu’ buntu malangka’
nasambo langi’ naleanni.
20 Sangpulo limapa sikunna langngan tu
uai, tonna leannimi tu mintu’ buntu.
21 Namintu’ pa’padadi tu menono’
lan lino ka’tu sunga’na, la mintu’na
manuk-manuk la mintu’na patuoan, la
mintu’ olo’-olo’ marira sia mintu’ olo’-olo’
mendonglo’ lan lino sia mintu’ dukato
lino.
22 Mintu’ pa’padadi dao kapadanganna tu
denna penaa napotuo lan illongna mate.
23 Susimo lalanna dinii ummangsanni tu
angge menono’ lan te lino, la tolino, la
patuoan sia mintu’ olo’-olo’ mendonglo’
sia mintu’ manuk-manuk dao lu langi’;
mintu’nato dimangsanni lan mai lino,
Nuh manna tu tuo sola mintu’ to nasolan
lan lembang.

24 Saratu’

8

KADADIAN 7.24 – 8.7

28

limangpulo allona tu uai ponno

lan lino.
1 Nasusito Nakilalaimi Puang Matua
tu Nuh sia mintu’ olo’-olo’ marira sia
mintu’ patuoan tu nasolan lan lembang;
Napopangiri’i Puang Matua tu angin lan
lino, namere tu uai.
2 Namintu’ kalimbuang lan posi’na tana
sia mintu’ mata kalimbuang dao langi’
titutu’, sia iatu uran kamban dao mai
langi’ mari’.
3 Iatu uai lolong pela’mi sule lan mai lino;
na iatonna ganna’mo saratu’ limangpulo
allona randukmi mere.
4 Iatonna bulan ma’pempitu sia allo
ma’pessangpulo pitu bulan iato,
sampemi tu lembang iato dao buntu
Ararat.
5 Iatu uai tontong samere-merena sae
lako bulan sangpulo: iatonna bulan
sangpulo allo bunga’na bulan iato,
payanmi tu mintu’ botto tanete.
6 Undinna tonna patangpulomo allona,
nabungka’mi Nuh tu pentiroan lembang,
tu mangka nagaraga.
7 Narampananmi tu misa’ kaduaya male
anna mentia’ messulesulean sae lako
marangkena tu lino.

KADADIAN 8.8 – 14

8 Undinnato

29

narampananmi tu misa’
bu’ku’, la nanii untiroi kumua ba’tu la
mere liumi tu uai lan mai lino.
9 Apa iatu bu’ku’ tae’ inan la nanii ta’pa;
sulemi lako Nuh lan lembang, belanna
budapa tu uai lan mintu’ lino. Nakorongi
Nuh, napatamai lembang sule.
10 Ma’peagi pole’mi tu Nuh pitung allo,
namane urrampanan pole’i tu bu’ku’ iato
lan mai lembang.
11 Suleomi tu bu’ku’ iato tonna makaroen.
Denmi dio tillokna tu sanglamba’ daun
sa’pek natotokki dio mai garonto’ saitun,
iamoto anna issanni Nuh kumua meremo
tu uai lan mai lino.
12 Ma’peagiomi pitung allo pole’, undinna
narampananomi tu bu’ku’ iato, apa
tae’mo anna sule lako Nuh.
13 Tonna taun annan ratu’na mmisa,
bulan ma’pamula, tonna allo bunga’na
bulan iato, meremi tu uai lan mai lino;
natimbakmi Nuh tu papa lembang,
natiroi kumua tonganna marangkemo tu
lino.
14 Iatonna bulan ma’penduan allo
ma’duangpulo mpitu mamarami tu
kapadanganna.

KADADIAN 8.15 – 21

15 Ma’kadami

30

tu Puang Matua lako Nuh

Nakua:
16 Tassu’moko lan mai lembang, la iko, la
repokmu sia iatu mai bainena anakmu.
17 Sia la mupatassu’ duka tu mintu’ olo’olo’ tu musolan, tu mintu’na pa’padadi,
iamotu manuk-manuk sia patuoan sia
mintu’ olo’-olo’ mendonglo’ lan lino, anna
tumale’ sia membati’ kalle-kallean lan
lino sia samemba’ka’-ba’ka’na lan lino.
18 Ta’kala tassu’mi tu Nuh sia mintu’ tu
repokna sia iatu mai bainena anakna.
19 Namintu’ olo’-olo’ marira sia mintu’
mendonglo’na sia mintu’ manuk-manuk
sia mintu’ tu sikedoanna lan lino, pantan
umporupa rupanna, tassu’ lan mai
lembang.
20 Nagaragami Nuh tu misa’ inan
pemalaran nanii memala’ lako PUANG,
anna alai dio mai mintu’ patuoan tang
dipemalianna sia manuk-manuk tang
dipemalianna anna pemalaran pantunu
pu’pu’ dao inan pemalaran iato.
21 Kendekmi busarungngu’na langan
PUANG, anNa ma’kada lan penaanNa,
kumua: Tae’mo angKu la untampakki
ropu tu lino diona tolino, belanna tempon
dio mai bitti’na kelok tu karangan

KADADIAN 8.22 – 9.5

31

inaanna, sia tae’mo angKu sabu’i pole’i
tu angge menono’, susitu mangkanna
Kupogau’.
22 Iake tontongpi den tu lino, tae’mo
anna la ka’tu tu pangamboran sia
peparean, madingin na malassu,
pealloan na palauran, allo na bongi!
1 Napassakkemi Puang Matua tu
Nuh sola tu mai anakna, anNa
ma’kada lako Nakua: Membati’komi sia
memba’ka’komi sia ponnoi tu lino.
2 La mataku’ sia tiramban lako kalemi
tu mintu’ olo’-olo’ lan lino sia mintu’
manuk-manuk dao langi’; anggenna
mendonglo’na lan lino sia mintu’ bale
lan tasik, mintu’nato Kusorong tama
limammi.
3 Mintu’na olo’-olo’ menono’, tu
kepenaanna, iamo la kandemi, mintu’na
Kuben nasangkomi, susi dukato tu
mintu’ tananan maluna.
4 Apa iatu duku’ sola sumanga’na iamotu
rarana da mikandei.
5 Tonganna tongan kumua iatu rarami
la Kupembalaran, la Kupembalaran lako
mintu’ olo’-olo’ sia lako duka tolino, lako
mintu’ tolino la Kupembalaran rarana

9

KADADIAN 9.6 – 11

32

padanna tolino: la Kupembalaran tu
sunga’na tolino.
6 Minda-minda umpatibollo rara tolino,
la napatibollo duka tolino tu rarana,
belanna mangkamo Nakombong Puang
Matua tu tolino Napasusi rupanNa.
7 Apa iatu kamu la membati’komi sia
ma’lelen batik lan lino sia memba’ka’komi
lan!
BasseNa Puang Matua lako Nuh

9:8-17
8 Ma’kadami Puang Matua lako Nuh sia
lako tu mai anakna nasolan Nakua:
9 Tonganna Akumo tu untanan basseKu
lako kalemi sia lako lanto mimi’mi,
10 sia mintu’ angge menono’ tu misolan,
tu mai manuk-manuk na mintu’ patuoan
sia mintu’ olo’-olo’ marira lan lino tu
misolan, tu mintu’ olo’-olo’ lan lino tassu’
lan mai lembang.
11 Iamote tu basseKu Kutanan lako
kalemi kumua, iatu mintu’ menaanna
inang tae’mo anna la ussabu’i uai saba’
sia la tae’mo uai saba’ la ussanggangi
lino.

KADADIAN 9.12 – 17

12 Ma’kada

33

tu Puang Matua kumua:
Iamote tu tanda tasikna basseKu, tu
Kutanan lan tangngata patomali sia
angge menaa tu misolanna landa’ lako
disituran-turanni.
13 Kupalanmo gaun tu tindak sariraKu,
iamo la tanda tasikna basseKu lako lino.
14 IangKu popa’lemunni tu gaun,
napayan tu tindak sarira lan gaun,
15 manassa Kukilalai tu basseKu mangka
Kutanan lan tangngata patomali sia
angge menaa tu menono’na, kumua
inang tae’mo anna la saba’ tu uai la
ussabu’i tu mintu’ angge menono’.
16 Iake lanni gaun tu tindak sarira
iamo Kutiro la Kunii ungkilalai basse
matontongan, tu ditanan lan tangngaNa
Puang Matua anna mintu’ menaanna tu
menono’ lan lino.
17 Ma’kadami tu Puang Matua lako
Nuh kumua: Iamote tu basse mangka
Kutanan Kusibassei mintu’ kepenaanna
lan lino.

KADADIAN 9.18 – 23

34

Diona anakna Nuh
18 Iatu

9:18-29

mai anakna Nuh tu sun lan mai
lembang, iamo Sem, Ham sia Yafet,
anna iatu Ham iamotu ambe’na Kanaan.
19 Iamora te tau sola tallui tu anakna Nuh
sia tau iamora te mai tu nanii sun tau
anna tumale’ lan mintu’ kuli’na padang.
20 Iatu Nuh lumbang dipadang anna
randuk untanan anggoro’ sanginan
pa’lak.
21 Nairu’mi Nuh tu uai anggoro’
anna malango, mamma’mi tang
ma’tamangkale lan tendana.
22 Natiromi Ham, ambe’na Kanaan tu
kama’kambelanganna ambe’na anna lao
umpokadanni siulu’na dio salian sola
duai.
23 Naalami Sem sola Yafet tu sambu’
misa’ anna bassei dao mai palempengna,
namemboko’ lumingka ussamboi tu
kama’kambelanganna ambe’na, anna
mentiro senga’, natae’ natiroi tu
kama’kambelanganna ambe’na.

24 Ta’kala

KADADIAN 9.24 – 10.2

35

namangingaran tu Nuh
naissanni tu gau’na anak bongsunna
lako kalena.
25 Nakuami: Tampak ropu tu Kanaan;
nake napokaunan tai manukki mintu’
siulu’na.
26 Sia nakuapa ma’kada tu Nuh: Mintu’na
kapa’pudian lu langngan PUANG, tu
Kapenombanna Sem, na iatu Kanaan la
napokaunan!
27 Puang Matua la umpatumale’i tu Yafet
anna torroi tu mai tendana Sem, na iatu
Kanaan la napokaunan!
28 Talluratu’pa llimangpulo taunna tuo tu
Nuh mangkanna sae tu uai saba’.
29 Iatu Nuh kasera ratu’na llimangpulo
taunna, namane mate.

10

Ossoranna bati’na Nuh

1 Inde

10:1-32

sia tu bati’na Sem, Ham na
Yafet, iamotu anakna Nuh; iatu
anakna Nuh undadian ba’tu pira-pira
muane tonna mangka uai saba’.
2 Iatu muane nadadian Yafet, iamo
Gomer na Magog na Madai na Yawan na
Tubal na Mesekh na Tiras.

3 Iatu

KADADIAN 10.3 – 11

36

muane nadadian Gomer, iamo
Askenas na Rifat na Togarma.
4 Iatu muane nadadian Yawan iamo
Elisya na Tarsis na mintu’ to Kitim sia to
Dodanim.
5 Tau iamote mai tu nanii sun mintu’
bangsa dio lu biring tasik tumale’ lako
lili’ tondok pantan umpobasa basana sia
pa’rapuanna, nalili’ bangsa iato.
6 Iatu muane nadadian Ham iamo Kush
na Misraim na Put na Kanaan.
7 Iatu muane nadadian Kush iamo Seba,
Hawila, Sabta, Raema na Sabtekha;
na iatu muane nadadian Raema, iamo
Syeba na Dedan.
8 Na iatu Kush undadian Nimrod, iamo
randuk dadi to paa lan te lino;
9 sia iamo misa’ to moasu lalong dio
oloNa PUANG, iamoto anna dipoparunde
kumua: Susi Nimrod, misa’ to moasu
lalong dio oloNa PUANG.
10 Iatu panglisuan parentana, iamo
Babel, Erekh, Akad sia Kalne, lili’na
Sinear.
11 Iamote tondok iate nanii sun male
lako Asyur anna bangun tondok Niniwe,
Rehobot-Ir, Kalah,

12 na

KADADIAN 10.12 – 23

37

Resen tu naparitangnga Niniwe
anna Kalah: iamote tu tondok kapua
iato.
13 Misraim nanii sun to Ludim na to
Anamim na to Lehabim na to Naftuhim,
14 sia to Patrusim na to Kasluhim iamo
nanii bu’tu to Filistin sia to Kaftorim.
15 Kanaan undadian Sidon, iamo anak
pa’bunga’na na Het,
16 sia iatu to Yebusi sia to Amori sia to
Girgasi,
17 sia to Hewi sia to Arki sia to Sini,
18 sia to Arwadi sia to Semari sia to
Hamati; undinna to dipasisarak-sarak
poleomi tu pa’rapuanna to Kanaan.
19 Iatu angge tondok to Kanaan dio mai
Sidon ma’palulako Gerar sae lako Gaza
sia ma’palulako Sodom na Gomora sia
Adma sia Zeboim sae lako Lasa.
20 Iamote mai tu bati’na Ham, tu pantan
pa’rapuan sia pantan basa lan mintu’
tondokna sia bangsana.
21 Dadi poleomi tu anakna Sem, kakanna
Yafet, iamo ambe’na mintu’ bati’na Eber.
22 Iatu anakna Sem tu muane, iamo
Elam, Asyur, Arpakhsad, Lud na Aram.
23 Iatu anakna Aram iamo Us, Hul, Geter
na Mas.

24 Na

KADADIAN 10.24 – 32

38

Arpakhsad undadian Selah na
Selah undadian Eber.
25 Na Eber undadian muane da’dua,
misa’ disanga Peleg, belanna iatonna
linona titaa-taami tu issinna lino, na iatu
siulu’na disanga Yoktan.
26 Iatu Yoktan undadian Almodad, na
Selef, na Hazar-Mawet na Yerah,
27 na Hadoram, na Uzal na Dikla,
28 Obal, na Abimael na Syeba,
29 na Ofir na Hawila na Yobab, ia
nasangmote tu anakna Yoktan.
30 Iatu pa’tondokanna randuk dio mai
Mesa sae lako Sefar, tanete rampe
matallo.
31 Iamote mai tu bati’na Sem, tu pantan
pa’rapuan sia pantan basa sia pantan
bangsa lan mintu’ tondokna.
32 Iamote tu bati’na anakna Nuh, pantan
umposuku-sukunna lan bangsana;
iamora te tau iate mai nanii sun tumale’
mintu’ bangsa untorroi kuli’na padang
tonna mangka uai saba’.

KADADIAN 11.1 – 6

11

39

Menara dio Babel sia
katangsiissananna basa
1 Iatu

11:1-9

mintu’ nasambo; langi’
narande tana sangrupari tu basa
sia kada.
2 Iatonna male lako rampe matallo tu
tau iato mai, nakabu’tuimi tu misa’
padang malona’ dio tana Sinear, torromi
ma’tondok dio.
3 Sipa’kadami tinde mai tau nakua:
Maikomi anta garaga batu tela sia
tapemeloi tununna. Iatu batu tela
napasondana batu tongan na gala-gala
napopi’da’.
4 Sia nakuapa: Maikomi anta bangun
misa’ tondok sia misa’ menara tu la
sumpu langan langi’ tu lolokna; susimoto
la tanii unggaraganni tanda kalelean tu
kaleta, da anta sisarak-sarak lan te lino.
5 Ta’kala mengkalaomi tu PUANG la
untiroi tu tondok sia menara tu nabangun
ma’rupa tau.
6 Nakua kadanNa PUANG: Mintu’ torro
tolino misa’ bangsari sia misa’ basari;
mane randuknari penggauran te; nakua

KADADIAN 11.7 – 11

40

lan penaanna, tae’ natang la dadi tu
mintu’ apa nasanga la napogau’.
7 Melo ke mengkalaoKi’
umpatangma’runduananni tu kadanna
anna tangsiissanan.
8 Susimorato Napasisarak-sarakki PUANG
lan lu te lino, natorroimi umbangunni tu
tondok iato.
9 Iamo bannangna to anna sangai
Babel tu tondok iato, belanna dio Nanii
PUANG umpatangma’runduananni tu
kadanna mintu’ to untorroi kuli’na
padang. Indemoto dio nanii PUANG
umpasisarak-sarakki tu tau iato mai lan
lu te lino.
Ossoranna bati’na Sem

10 Iamote

11:10-32

tu mintu’ bati’na Sem. Iatonna
saratu’mo taunna tu Sem undadiammi
Arpakhsad, tonna duang taunmo
mangkanna uai saba’.
11 Tonna mangka undadian Arpakhsad
tu Sem tuopa lima ratu’ taunna sia
undadian ba’tu pira-pira muane na
baine.

12 Iatu

KADADIAN 11.12 – 21

41

Arpakhsad tallungpulomo llima
taunna anna dadianni tu Selah.
13 Tonna mangka undadian Selah tuopa
a’pa’ratu’ ntallung taun tu Arpakhsad
sia undadian ba’tu pira-pira muane sia
baine.
14 Iatu Selah tallungpulomo taunna anna
dadianni tu Eber.
15 Tonna mangka undadian Eber
a’pa’ratu’pa ntallung taun tuo tu Selah
sia undadian ba’tu pira-pira muane sia
baine.
16 Iatu Eber tallungpulomo nna’pa’taunna
anna dadianni tu Peleg.
17 Tonna mangka undadian Peleg tu Eber
tuopa a’pa’ratu’ ntallungpulo taunna
sia undadian ba’tu pira-pira muane sia
baine.
18 Iatu Peleg tallungpulomo taunna anna
dadianni tu Rehu.
19 Tonna mangka undadian Rehu tu
Peleg duaratu’pa ngkasera taunna tuo
sia undadian ba’tu pira-pira muane sia
baine.
20 Iatu Rehu tallungpulomo ndua taunna
anna dadianni tu Serug.
21 Tonna mangka undadian Serug tu
Rehu duaratu’pa mpitung taun tuo sia

KADADIAN 11.22 – 30

42

undadian ba’tu pira-pira muane sia
baine.
22 Iatu Serug tallungpulomo taunna anna
dadianni tu Nahor.
23 Tonna mangka undadian Nahor
tu Serug tuopa duaratu’ taunna sia
undadian ba’tu pira-pira muane sia
baine.
24 Iatu Nahor duangpulomo ngkasera
taunna anna dadianni tu Terah.
25 Tonna mangka undadian Terah tu
Nahor tuopa saratu’ sangpulo kasera
taunna sia undadian ba’tu pira-pira
muane sia baine.
26 Iatu Terah pitungpulomo taunna anna
dadianni tu Abram, Nahor na Haran.
27 Iamote tu bati’na Terah: Iamotu Terah
undadian Abram, Nahor sia Haran, na
Haran undadian Lot.
28 Iatu Haran mate dolo anna Terah,
ambe’na, dio tondok kadadianna, iamo
Ur, tondok to Kasdim.
29 Kebainemi tu Abram sola Nahor; na
iatu bainena Abram disanga Sarai na iatu
bainena Nahor disanga Milka, tu anakna
Haran, ambe’na Milka sola Yiska.
30 Iatu Sarai tamanang, tae’ anakna.

KADADIAN 11.31 – 12.4

31 Nasolammi

43

Terah tu Abram, anakna
sola Lot, ampona, iamo anakna Haran sia
sola Sarai, minintunna, bainena Abram,
anakna, sun sola lan mai Ur, tondok to
Kasdim, la lao lako tana Kanaan; saemi
lako Haran natorro dio.
32 Iatu Terah duaratu’ llimang taun,
namate dio tondok Haran.
Abram Napilei langsa’ Puang Matua

12:1-9
1 Ma’kadami tu PUANG lako
Abram Nakua: Tassu’ko lan mai
tondokmu sia lan mai pa’rapuammu sia
lan mai banuanna ambe’mu, ammu male
lako tondok tu la Kupakitangko dako’.
2 AngKu popendadiko misa’ bangsa
kapua sia angKu parongko’ko angKu pa
kaleleanni tu sangammu; la dadiko misa’
karongkosan.
3 La Kuparongko’ minda-minda tu
umpassakkeko sia la Kutampakki ropu
minda-minda tu ullangdoko; lan duka
kelemu nanii mintu’ suku lan te lino
unnappa’ karongkosan.
4 Ke’de’mi tu Abram susitu kadanNa
PUANG lako kalena, sia ia duka tu Lot

12

KADADIAN 12.5 – 8

44

male sola; iatonna ke’de’ dio mai tana
Haran tu Abram pitungpulomo llima taun
dadinna.
5 Nasolammi Abram tu Sarai, bainena,
sia iatu Lot, pa’anakanna sia mintu’
iananna, tu mangka napasinu’du sia
mintu’ tau, to tau kullena dio tana Haran,
ke’de’mi sola nasangi la male lako tana
Kanaan; rampomi lako tana Kanaan.
6 Iatu Abram ullendu’i tana iato, anna
rampo lako tondok Sikhem, rampo lako
to’ kayu tarpin More. Attu iato nanii to
Kanaan tu tana iato.
7 Ta’kala anNa payanmo tu PUANG
lako Abram, Nama’kada Nakua: Iate
tana la Kuba’giammo lanto mimi’mu.
Nagaragami Abram inde to dio tu misa’
inan pemalaran lako PUANG mangka
payan lako kalena.
8 Tilelemi inde to dio mai lako
ma’buntunna rampe matallona Betel,
naosokmi tu tendana, na iatu Betel
dio rampe matampu’na, na iatu Ai, dio
rampe matallona; nagaragami inde to
dio tu misa’ inan pemalaran lako PUANG,
anna menomba ussa’bu’ sanganNa
PUANG.

9 Nasusi

KADADIAN 12.9 – 15

45

to ke’de’mi tu Abram inde to dio
mai nama’palusau’ pollo’na uai.
Abram torro lan tondok Mesir

12:10-20
10 Saemi karorian lan tana iato, anna
male rokko Mesir tu Abram, la mempue
dio butung to sae, belanna karorian
pannang lan tana iato.
11 Denmi pissan tonna la rampomo
lako tana Mesir, nama’kada lako Sarai
bainena, nakua: Kuissan tongan kumua
iatu iko te to melo pantarisammu:
12 iamoto, iake natiroko to Mesir,
manassa la nakua: Iamo bainena te;
napateina’, apa iatu iko la napatuoko.
13 Iamoto la musangana’ siulu’mu angku
maupa’ tete dio iko; sia angku tuo
belanna iko.
14 Ta’kala dadimi susito; iatonna
rampomo tu Abram tama tondok Mesir,
natiromi to Mesir tu baine iato misa’ to
melo tongan pantarisanna.
15 Natiromi to kapuanna Firaun tu baine
iato, natendengmi dio olona Firaun.
Nasolammi tau tu baine iato tama
tongkonan layukna Firaun.

KADADIAN 12.16 – 13.1

16 Dibenmi

46

apa tu Abram belanna diona
baine iato; naampuimi Abram tu domba
sia sapi sia keledai sia kaunan muane sia
kaunan baine sia keledai birang sia unta.
17 Naparompoimi ba’tu pira-pira parri’
kapua PUANG tu Firaun sia mintu’ to lan
tongkonan layukna, natumang Sarai,
bainena Abram.
18 Natambaimi Firaun tu Abram,
nakuami kumua: Umba nakua te
gau’mu lako kaleku? Ma’apai ammu
tang umpokadanna’ kumua iate baine
bainemu?
19 Ma’apai ammu kua siulu’ku,
kuurunganni umpobainei? Indemo tu
bainemu; solammi mumale!
20 Nakuammi Firaun tu taunna tu diona
Abram kumua anna lao ussolanni sola
bainena sia mintu’ tu apa naampui.
Abram sola Lot

13:1-18
1 Tassu’mi tu Abram lan mai
tondok Mesir sola bainena sia
mintu’ tu apa naampui ma’palusau’
Padang lo’na lu sisola duka Lot.

13

2 Iatu

KADADIAN 13.2 – 9

47

Abram lendu’ ia sugi’na, sugi’
patuoan sia salaka sia bulaan.
3 Malemi urrundu’ lalan dolona lo’ mai
pollo’na uai melayo dio to’ kapelayoan
dolona rampo lako Betel, tu, inan bunga’
naninna tendana paralla’na Betel anna
Ai.
4 Rampo lako to’ inan pemalaran
mangkamo nagaraga tonna dolona;
menombami dio tu Abram ussa’bu’
sanganNa PUANG.
5 Iatu Lot tu male sola Abram, unnampui
duka domba, sapi sia tenda.
6 Tae’ anna alai padang tu tau iato mai,
ke torroi sisola, belanna lendu’ budanna
tu patuoanna, iamoto anna tae’ nama’din
la torro sola.
7 Sia den pissan nabu’tu kasipakkanna
mintu’to mangkambi’na Abram anna to
mangkambi’na Lot. Iatonna attu iato to
Kanaan sia to Feris ma’tondok lan tana
iato.
8 Ma’kadami tu Abram lako Lot nakua:
Da naden kasipakkanta sia kasipakkanna
to mangkambi’ta, belanna kita te, to
sangdadiangki’.
9 Tang nata’pairaka matammu te padang
kalua’? Messarakko dio mai kaleku. Iake

KADADIAN 13.10 – 15

48

lu lakoko kairi, lu lakona’ kanan, na iake
lu lakoko kanan, lu lakona’ kairi.
10 Nabangunammi Lot tu matanna,
natiroi tu mintu’ lili’na Yordan, narumpei
nasang salu iato sae lako Zoar – tonna
tang ussanggangpi PUANG tu tondok
Sodom na Gomora –, iamo butung pa’lak
PUANG sia butung to tana Mesir.
11 Iamoto anna pilei Lot tu lili’na Yordan,
nake’de’ ma’palulako rampe matallo;
sisarakmi sola duai.
12 Torromi tu Abram dio tondok Kanaan,
apa iatu Lot ma’tondok dio lu tondok
Padang, anna osok tendana sae lako
Sodom.
13 Iatu mintu’ pa’tondokan lan Sodom
kadakemo gau’na’ sia ma’liu alukmo dio
oloNa PUANG.
14 Tonna mangka sisarak Lot tu Abram,
ma’kadami PUANG lako Abram susite:
Bangunanni tu matammu, tiroi dio mai
to’ inan munii bendan rekke ulunna salu,
sia sau’ pollo’na uai, tama matallo sia
rokko matampu’;
15 belanna mintu’ tu padang mutiro,
la Kuba’giangko sia Kuba’gian lanto
mimi’mu tontong sae lakona.

16 La

KADADIAN 13.16 – 14.3

49

Kupapada budanna barra’-barra’ tu
lanto mimi’mu. Iake dikulle umbilangi tu
barra’-barra’, maneri dikulle umbilangi tu
lanto mimi’mu.
17 Ke’de’ko ammu lingkai mintu’ padang
iato dio mai lambe’na sia babana,
belanna iamo la Kuba’giangko.
18 Napalelemi Abram tu tendana, saemi
unnosok tendana dao to’ kayu tarpin
Mamre, sikandappi’ tondok Hebron,
nagaragami inde to dio tu misa’ inan
pemalaran lako PUANG.
Diona Abram untaloi tu a’pa’ datu
sia kasitammuanna Melkisedek

14

1 Ta’kala

14:1-17

denmi pissan tonna
attunna Amrafel, datu Sinear sia
Ariokh, datu Elasar sia Kedorlaomer,
datu Elam sia Tideal, datunna bangsa
pantan tama,
2 iatu mintu’ datu iato sirari Bera, datu
to Sodom, sia Birsya, datu Gomora, sia
Syinab, datu Adma, sia Syemeber, datu
Zeboim, sia datunna Bela, iamo Zoar.
3 Sirampunmi sola nasangi diong lombok
Sidim iamotu tasik Ma’sin totemo.

4 Sangpulo

KADADIAN 14.4 – 9

50

duamo taunna tunduk
tu mintu’ datu iato mai lako
datu Kedorlaomer; iatonna taun
ma’pessangpulo tallunnamo unneami tu
tau iato mai.
5 Iatonna taun ma’pessangpulo a’pa’
saemi tu datu Kedorlaomer sola mintu’
tu datu nasiban, anna taloi tu to Refaim
dio tondok Asyterot-Karnaim sia to
Zuzim dio tondok Ham, sia to Emim dio
Syawe-Kiryataim.
6 Sia to Hori dao buntunna, disanga Seir
sae lako padang El-Paran, dio randan
padang pangallaran.
7 Undinna sulemi tu tau iato mai anna
sae lako En-Mispat, iamotu Kadesh,
untalo mintu’ tana to Amalek sia to
Amori duka, tu untorroi Hazezon-Tamar.
8 Iatonna attu iato sunmi tu datu Sodom
sia datu Gomora sia datu Adma sia datu
Zeboim, sia datunna Bela, iamo Zoar,
anna arra’ tananan ra’ dio Sidim, la
unneai,
9 la unnea Kedorlaomer, datu Elam sia
Tideal, datunna bangsa pantan tama sia
Amrafel, datu Sinear sia Ariokh, datu
Elasar, a’pa’ datu unnea lima datu.

10 Iatu

KADADIAN 14.10 – 16

51

padang Sidim situtu’ limbong
aspala’; mallaimi tu datu Sodom sola
Gomora natobang rokko; na iatu mintu’
to torropa mallai langngan tanete.
11 Narampami tau tu mintu’ ianan dio
Sodom na Gomora sia mintu’ kande,
namane male.
12 Narampa duka tu Lot, pa’anakanna
Abram sola mintu’ iananna, belanna
ma’tondok duka lan Sodom, namale.
13 Ta’kala saemi misa’ tau tu umpallaian
kalena umpokadai tu iannato lako
Abram, to Ibrani, torro dio to’ kayu
tarpin Mamre, misa’ to Amori, tu siulu’
Eskol sia siulu’na Aner, iamo to sibasse
Abram.
14 Iatonna rangimi Abram tu
sangdadianna kumua dibaamo
dipaalai ulang, napasandaimi pa’buno tu
to nasibassean sola kaunanna, iamotu
mintu’ to dadi lanmo banuanna, tallu
ratu’ sangpulo karua tau, anna ula’i tu
uali sae lako Dan.
15 Nataa-taami tu solana ullaoi uali tonna
bongi, anna taloi, naula’i sae lako Hoba
rampe rekkena Damsyik.
16 Nabaami sule tu mintu’ barang apa
sia nabaa sule tu Lot, sangdadianna sia

KADADIAN 14.17 – 22

52

mintu’ barang apanna sia mintu’ baine
sia tau kamban.
17 Saemi tu datu Sodom umpa’tentenanni
tu Abram tonna sulemo untalo datu
Kedorlaomer sia mintu’ datu nasiban, dio
lombok Syawe, iamo lombok Datu.
Abram sitammu Melkisedek

18 Na

14:18-24

iatu Melkisedek, datu Salem umbaa
roti sia uai anggoro’; iamo misa’ to
minaanNa Puang Patodoranna.
19 Napassakkei Melkisedek tu Abram,
nama’kada nakua: Napassakkemira
Puang Patodoranna, Puang ungkombong
langi’ sola lino tu Abram.
20 Mintu’ kadipudian lu langngan nasang
Puang Patodoranna, tu mangka ussorong
ualimmu tama limammu. Nasorongmi
Abram lako tu sangtaa sangpulona
mintu’ barang apanna.
21 Ma’kadami datu Sodom lako Abram:
Benna’ tu mintu’ tau, apa iatu mintu’
barang apa kamumo.
22 Nakuami tu Abram lako datu Sodom:
Kupasa’bian PUANG, Puang Patodoranna,
ungkombong langi’ sola lino,

KADADIAN 14.23 – 15.3

23 kumua

53

inang tae’ angku la morai
unnalai tu apammi, moi sanglamba’
bannang ba’tu ulang lapik lentek,
da ammi kuai undinna, kumua: aku
umpasugi’i tu Abram.
24 Moi si’dik damo tu akunna, sangadinna
tu apa nakande tu mai solaku sia taana
tu to kusolan male, iamotu Aner sia Eskol
sia Mamre, da’ito anna alai tu taana.
Lampa kadanNa
Puang Matua lako Abram

15:1-21
1 Ta’kala tonna mangka tu
mintu’nato, saemi kadanNa
PUANG lako Abram lan patiro mendeata
Nakua: Da mumataku’, e Abram, belanna
Akumo tu balulang toto’mu sia rongko’
kapuamu.
2 Ma’kadami Abram nakua: O PUANG
Puangku, apara tu la Mikamaseanna’,
belanna la tontong bangna’ susito, tang
la keanak, na iatu Eliezer, to Damsyik,
iamo la umpomana’ barang apangku?
3 Sia nakuapa tu Abram: Tae’ tongan
Mikamaseina’ bati’, manassa denni misa’

15

KADADIAN 15.4 – 9

54

tu pa’kurinangku la umpomana’ barang
apangku.
4 Ta’kala saemi tu kadanNa PUANG
lako kalena Nakua: Tangia tau iato
la umpomana’ barang apammu,
sangadinna misa’ to sun dilassakmu tu
la umpomana’ barang apammu!
5 Nasolammi Puang sun lako salian,
Nama’kada Nakua: Mentingarako
langngan langi’, bilangi tu mintu’
bintoen, ke mubelai umbilangi. Nakuami
ungkuanni: Susi dukamoto tu bati’mu.
6 Napatonganmi Abram tu PUANG,
iamoto tu Nabilang Puang napomalolo
Abram.
7 Ma’kadami tu Puang lako kalena Nakua:
Akumo tu PUANG, mangka ussolangko
sun lan mai Ur, tondok to Kasdim, la
umbenko te padang iate la musiosso’i.
8 Ma’kadami tu Abram nakua: O
PUANG Puangku, apara tu la ma’din
kunii untandai kumua iate padang la
kusiosso’i?
9 Ma’kadami Puang lako kalena: AlanNa’
misa’ sapi birang tu tallung taun dadinna,
sia mis