KABAALAN KOLUMISON BOROS KABAALAN PURALAN BOROS

16

4.0 KABAALAN KOLUMISON BOROS

Maya kabaalan kolumison boros kaanu o tangaanak do kosiwatan mongintutun, minsingumbal om monginonong do tungkus koubasanan tinaru Kadazan om Dusun. Aktiviti-aktiviti di noulud id Standard Pambalajalan kaanu papasarabak kaanangan do tangaanak kumaa minsingilo do boros Kadazandusun om nogi kaanu popoingkawas imaginasi tangaanak. Komponen diti manahak kosiwatan kumaa tangaanak do mokinongou boros Kadazandusun mantad mogisuai-suai tadon miagal ko mantad sinding tangaanak, hiis koubasanan om susuyan di kosudong. Id kolimpupuson do Toun 6, kaanu tangaanak maganu, popolombus om monusui koilaan kokomoi do tungkus koubasanan tinaru Kadazan om Dusun maya mogikaakawo aktiviti di kohiok. Poinhanggum nopo id Standard Pambalajalan Toun 6 diti nga kabaalan momoguno folio, buuk tonini, kolaj, buuk skrap, poster om suusuai po montok popokito koilaan di notimung. Suai ko mantad diti onuan nogi o tangaanak do kosiwatan montok popokito do kabaalan manangon, suminding, minsingkono, sumayau om popolombus do hiis. Poinsuang nogi id Standard Pambalajan Toun 6 o ponoriukan kokomoi tungkus koubasanan do tinaru Kadazan om Dusun maya aktiviti monurubung paganakan sondii. 17

5.0 KABAALAN PURALAN BOROS

Kabaalan Puralan Boros nopo nga kokomoi do kogisaman do tangaanak momoguno Sistom Boros Kadazandusun di kotunud id mogisuusuai kohuboyoon. Panatalan nopo do pongiaan Sistem Boros id Kurikulum Boros Kadazandusun diti nga koilaan momoguno Sistem Tuni, Sistem Ijaan, Sompuruan Boros, Pomoroitan Ginumu om nogi Tukadan. Suai ko mantad dilo onuan nogi do panatalan koilaan momonsoi mogikaakawo boros om ayat. Id kolimpupuson do Toun 6, kaanu o tangaanak do momoguno do Sistom Tuni Boros Kadazandusun id lisan om Sistom Ijaan Boros Kadazandusun id ponuatan. Suai ko mantad dilo, kaanu nogi o tangaanak do momoguno mogikaakawo Sompuruan Boros, Kopomoroitan Ginumu om Tukadan id lisan om ponuatan. Kaanu nogi o tangaanak do momonsoi mogikaakawo boros om ayat di agramatis om olinuud. Poinhanggum nopo id Standard Pambalajalan Toun 6 diti nga kabaalan popolombus om mongija boros di kisigot, kikonsonan b om d , b om d om boros kivokal tanaru om toniba. Suai ko mantad diti, poinsuang nogi o kabaalan momoguno do boros ngaran, boros maan, boros ula om boros toguangon id ayat om momonsoi boros mintootoiso om boros nosugku. Koilaan Puralan Boros suai i inoboson id Toun 6 nopo nga momoguno boros misompuru, misaup, pananda wacana om partikol id ayat. Bontuk ayat di poiaon id Toun 6 nopo nga ayat mintootoiso om ayat misompuru om kawo ayat nopo nga ayat toomod,ayat pongudio, ayat ponuhuan, om ayat kotigagan. 18

5.1 SISTEM BOROS