13
KURIKULUM BOROS KADAZANDUSUN
Panatalan nopo do pongiaan om pambalajalan Boros Kadazandusun nga popotilombus tungkus koubasanan om toilaan sandad tinaru Kadazan om Dusun maya ponginabasan kabaalan moboros, mambasa om monuat. Ponginabasan momoguno Puralan boros om monginonong
Kolumison Boros nga onuan nogi do kapanatalan id pongiaan om pambalajalan do mato palajalan diti. Suai ko mantad dii, koilaan kokomoi tungkus koubasanan tinaru Kadazan om Dusun nga poiaon nogi kumaa tangaanak.
1.0 KABAALAN MOKINONGOU OM MOBOROS
Mokinongou om moboros nopo nga iso kabaalan di touhai montok literasi. Ii nodii poogi do unsubon o tangaanak do minsingilo om momoguno do woyo mokinongou di kotunud. Unsubon o tagaanak do tumimpuun do minsingilo do moboros mantad taang popolombus do tuni pimato di
kotunud om kumaa nogi do popolombus do boros, frasa om gisom no do kaanu popolombus do ayat di pointunud, oulud om olinuud montok mogikaakawo kohuboyoon. Aktiviti nopo di kosudong do papanahon montok do kabaalan diti nga aktiviti minsingumbal, manahak tisuli,
mangarati om momoguno do koilaan di norongou. Toinsanan aktiviti diti kawasa do huliton mooi do kogirot o pomogunaan do pancaindera do tangaanak om pointounda tomoimo do miromut.
Id kolimpupuson do Toun 6, kaanu o tangaanak do mokinongou montok mongintutun om manahak tisuli kumaa tuni di norongou mantad posorili, kaanu mangarati pomogunaan do pimato montok Boros Kadazandusun om kaanu momoguno do pomoroitan om loyuk di pointunud om olinuud
montok popolombus do boros, frasa om ayat id pilumaagan. Suai ko mantad dii, kaanu nogi o tangaanak do mongompuri om manahak tisuli kumaa koilaan di norongou om kaanu poposuul topurimanan om pomusarahan di oulud om olinuud id pilumaagan.
Poinhanggum nopo id Standard Pambalajalan Toun 6 diti nga kabaalan mokinongou montok mongilo om momungaran do tuni di norongou mantad posorili, kabaalan mokinongou montok popisuai om popolombus mogikaakawo boros di momoguno b om d , sigot, vokal toniba,
tanaru om pimato noolos. Poiaon nogi kumaa tangaanak id Toun 4 o kabaalan mokinongou om popolombus frasa, ayat om kobooboroso. Poinhanggum nogi o kabaalan mokinongou montok mangarati, mongompuri om manahak tisuli kumaa koilaan di norongou mantad teks. Suai
ko mantad diti poinsuang nogi o kabaalan moboros miagal ko mogibooboros montok moguyad koilaan kokomoi tuni di norongou mantad posorili om koilaan di norongou mantad mogisuusuai tadon. Poiaon nogi kumaa do tangaanak o kabaalan poposuul pomusarahan om mokianu sogu
mantad do wokon.
14
2.0 KABAALAN MAMBASA
