22
6.0 PONUANGAN KURIKULUM
Ponuangan kurikulum nopo nga iso poingkawasan kawawagu id ponginabasan koilaan om oponsol do onuan kapanatalan tu iti no kabaalan di koponguhup do tangaanak id koposion tikid tadau om id ponginabasan toilaan. Ponuangan kurikulum i pasandadon id pongiaan Boros
Kadazandusun nopo nga miagal id siriba:
i. Kabaalan Momusorou
Kabaalan momusorou di okritis om okreatif pinosuang id Standard Pambalajalan mooi do kaanu o tangaanak do monolibamban kobolingkangan, kaanu maganu kootuson om kaanu popolombus do koilaan di kotunud kokomoi isoiso ahal miampai momoguno boros di efektif.
ii. Kabaalan Balajal Karaaralano Balajal
Pasandadon o kabaalan diti id Standard Pambalajalan mooi do kitonggungan o tangaanak id pambalajalan diolo. Poinhanggum id kabaalan diti o kabaalan balajal om kabaalan maganu koilaan montok popotounda do tangaanak do monginobos koilaan di potilombus.
iii. Kabaalan Momoguno Teknologi Koilaan om Piromutan
Kabaalan momoguno do Teknologi Koilaan om Piromutan nopo nga iso kabaalan do abad ko-21. Kabaalan nopo di poinhanggum nga kabaalan momoguno kakamot multimedia miagal ko komputer montok momonsoi om momongo kalaja sikul om nogi momoguno mogikawo-kawo koilaan
mantad multimedia miagal ko mongintong dokumentari id televison om maganu koilaan mantad internet. Suai ko mantad dii, kaanu nogi do kosiwatan o tangaanak do papaatod om monorimo do e-mel, mamalayag piromutan elektronik montok mogihum om papatayad koilaan om
milumaag miampai tulun suai maya piromutan sosial miagal do Facebook om Twitter.
iv. Woyo Toluud om Sunduan Mamasok
Oponsol do pasandadon o woyo toluud miagal ko woyo guminawo pogun sondii om kopuriman sunduan mamasok id kurikulum Boros Kadazandusun mooi do awangun o tangaanak di kiwoyo toluud om oupus tomoimo do pogun sondii.
23
v. Mogisuai-suai Koporokisan
Okito nogi id suang do Standard Pambalajalan diti o koponoinaan do koporokisan tangaanak di mogisuai-suai. Okito iti id suang do Standard Pambalajalan, miagal ko koponoinaan koporokisan kinestetik maya aktiviti di noulud id Standard Pambalajalan Kabaalan Kolumison Boros.
vi. Kopogonuan Toilaan
Koilaan om ponuangan nopo di pohontolon id mato palajalan diti nga koilaan di naanu mantad mogikaakawo gana miagal do gana Sains om Teknologi, Geografi, Sejarah, Koilaan Konsumerisme om Kousinan. Suai ko mantad diti, montok ponuangan boros aanu nogi mantad surat abal
om isu-isu timpu baino.
vii. Mongindapu
Mooi do kaanu o tangaanak ngaawi do monoguang karaaralano koposion timpu baino, minog nogi do pasandadon id pomusarahan do tangaanak o kabaalan mongindapu. Montok popoburu koposion tangaanak, elemen pongindopuan miagal ko kreativiti, inovasi om inisiatif
oponsol do posunudon kumaa tangaanak.
viii. Kreativiti
Kreativiti nopo nga woyo di popokito kabaalan momonsoi isoiso toinaon i au po insan kowonsoi do tulun suai maya imaginasi tosonong do tosoosongulun. Soira do kaanu o tangaanak do papabanta asil kalaja toi ko popokito drama di okreatif, okito do koimbulai o kaanangan do
tangaanak, kotumbayaan sondii om kopuriman do kounsikahan montok kinalantayan sondii.
24
ix. Kabaalan Momusorou Taang Takawas KBAT
Kabaalan momusorou taang takawas nopo nga iso kogisaman montok momoguno toilaan, kabaalan om woyo toluud id proses momogono montok monolibamban kobolingkaangan, soira maganu kootuson om kiwoyo inovasi om kikogisaman montok momudali isoiso asil. Kabaalan
nopo di poinhanggum id KBAT diti nga miagal di okito id jadual id siriba:
KBAT Kointalangan
Kabaalan Momoguno
Momoguno toilaan, kabaalan om woyo toluud id mogisuai-suai koyuyuyuon montok monoina isoiso
tainaon.
Kabaalan Mongompuri
Nomompipi do koilaan montok mangarati kopio nunu komoyon do koilaan dii om nogi montok monoinu
pisougkahan do iso om tiso koilaan.
Kabaalan Manahang
Momiadang, maganu kootuson om kaanu manahak pounayan montok isoiso ahal miampai momoguno
kabaalan, toilaan, nawawayaan sondii om woyo toluud.
Kabaalan Monupu
Momudali pomusarahan toi ko isoiso asil di okreatif om kiwoyo inovatif.
Jadual 1: Kointalangan kokomoi KBAT Aktiviti-aktiviti pongiaan di kiwoyo KBAT nopo nga miagal do aktiviti di momoguno kabaalan momogono, kabaalan monoriuk, kabaalan
monolibamban kobolingkangan om momonsoi kalaja maya projek. Mooi do ounsub o tangaanak do momoguno pomusarahan diolo unsubon o mongingia om tangaanak momoguno do kakamot momusorou miagal do peta pomusarahan, peta minda, Thinking Hats om pongudiaan
momoguno tudio taang takawas id suang om labus kelas.
25
STANDARD PONUANGAN, STANDARD PAMBALAJALAN OM TAANG KOINABASANMONTOK KABAALAN MOKINONGOU OM MOBOROS TOUN 6 SUANG STANDARD
STANDARD PAMBALAJALAN TOUN 6 TAANG KOINABASAN
1.1 Id kolimpupuson do Toun 6, kaanu