Pirantining Panaliten Caranipun Nganalisis Caranipun Ngesahaken

D. Pirantining Panaliten

Pirantining panaliten wonten ing panaliten menika ngginkaken tabel analisis data ingkang dipunbiyantu ngginakaken kertu data . Kertu data minangka piranti kangge nggampilaken anggenipun nyerat sumber data . Kertu data dipunginakaken kangge nyerat data – data ingkang wonten ing cerbung kalawarti Djaka Lodhang warsa 2012 supados saged mangertos jinis – jinisipun sinestesia , makna sinestesia saha ginanipun sinestesia .

E. Caranipun Nganalisis

Data Data wonten ing panaliten menika dipunanalisis ngginakaken analisis deskriptif . Analisis deskriptif inggih menika cara ngandharaken sedaya data miturut kategori saha dipunanalisis jumbuh kaliyan konteks ukaranipun. Analisis deskriptif menika ginanipun kangge ngempalaken informasi satunggaling kadadosan kanthi menapa wontenipun. Caranipun anggenipun nganalisis data kados ing ngandhap menika : 1. Kategorisasi , inggih menika data ingkang sampun kapanggihaken saklajengipun dipunkelompokaken adhedhasar jinis – jinisipun sinestesia . 2. Jinis sinestesia ingkang sampun wonten saklajengipun dipunanalisis miturut makna saha ginanipun miturut konteks ukaranipun ing cariyos. 3. Saking asiling panaliten jinis sinestesia , makna saha ginanipun sinestesia saking cerbung kalawarti Djaka Lodhang warsa 2012 saklajengipun dipundamel dudutan.

E. Caranipun Ngesahaken

Data Keabsahan data ing panaliten menika ngginakaken validitas saha reliabilitas . Jumbuh kaliyan pamanggihipun Nasution 2003: 74 piranti ukur keabsahan data menika wonten kalih syarat utaminipun inggih menika kedah valid sahih saha kedah reliabel saged dipunpitados. Validitas ingkang dipunginakaken inggih menika validitas semantik kontekstual . Validitas semantik kontekstual inggih menika negesi data ingkang sampun kapanggihaken jumbuh kaliyan konteks ukaranipun. Aplikasi validitas semantik kontekstual ing cerbung kalawarti Djaka Lodhang warsa 2012 saged dipuntingali kados tuladha ing ngandhap menika: Janjane ora kleru yen si Bas kedanan marang Arum. Wong aku dhewe ya ngrasa ketarik merga kenya iku manis, pakulitane resik, pinter, isih legan lan uga mapan. Ning aku eling yen aku iki wis nduwe bojo,” Sulis nyoba aweh katrangan marang Mbak Nuk.KSLJedisi 03kc 2. Ing pacelathon ing nginggil ngginakaken jinis sinestesia saking indera pangraos ilat dados indera pandulu, katingal saking ukara “kenya iku manis”. Sinestesia “kenya iku ayu” ing pacelathon ing nginggil menika menawi dipuntegesi ngginakaken validitas semantik kontekstual gadhah teges bilih miturut paraga Sulis, paraga Arum menika minangka wanita ingkang ayu, pakulitanipun resik, pinter, taksih legan ugi sampun mapan. Reliabilitas ingkang dipunginakaken ing panaliten menika inggih menika reliabilitas stabilitas . Reliabilitas stabilitas inggih menika maos kanthi dipunambal – ambali supados saged mangertos langkung cetha perkawis menapa ingkang dipuntliti. Aplikasi reliabilitas stabilitas ing cerbung kalawarti Djaka Lodhang saged dipuntingali kados tuladha ing ngandhap menika: “Disini tidak ada wartawan kan?” kandhane Marsana karo jenggilengan. “Ngacunga Pak Prim, mengko Marsana rak pucet raine,” panggodhane Prajaka marang Prima”. “Prima nendhang sikile Prajaka seru, banjur ndumuk lambene, gawe sandhi supaya meneng. KSLJedisi 17kc 2. Pacelathonan ing nginggil kedah dipunwaos kanthi dipunambal –ambali supados saged mangertos jinis sinestesia menapa ingkang wonten ing pacelathon ing nginggil. Amargi frasa “nendhang sikile” menika taksih ambigu dipuntampi dening indera pandulu netra menapa dening indera panggrayang kulit. Kanthi mekaten kedah dipunwaos kanthi dipunambal – ambali supados langkung cetha malih. 49

BAB IV ASILING PANALITEN SAHA PIREMBAGAN