ZAKHARIA
BAB 1--8 WAHYU-WAHYU
Timbalan supaya mratobat 1:1-6
1
1
Ing sasi kang kawolu ing taun kang kapindhone jamane Sang Prabu Dharius,
ana pangandikane Pangeran Yehuwah marang Nabi Zakharia bin Berekhya bin
Idho, mangkene:
2
“Banget dukane Pangeran Yehuwah marang para leluhurira.
3
Mulane sira kandhaa marang wong-wong iku:
Pangandikane Sang Yehuwah Gustine sarwa dumadi: Sira padha mratobata marang Ingsun,
-- mangkono pangandikane Sang Yehuwah Gustining sarwa dumadi, -- Ingsun banjur
bakal mbaleni sira. -- Mangkono pangandikane Pangeran Yehuwah Gustine sarwa dumadi
--.
4
Sira aja padha kaya para leluhurira, kang wus padha dipituturi dening para nabi
ing maune mangkene: Pangandikane Sang Yehuwah Gustine sarwa dumadi: Sira padha
ngundurana lakunira kang ala lan pokalira kang duraka Nanging padha ora gelem
ngrungokake sarta padha ora mreduli marang Ingsun. -- Mangkono pangandikane Pangeran
Yehuwah. --
5
Para leluhurira iku padha ana ing ngendi? Lan para nabi iku apa padha urip
ing salawase?
6
Nanging sakehe pangandika lan putusaningSun kang wus Sundhawuhake
marang abdiningSun para nabi, iku rak wus tumeka ing para leluhurira? Wong-wong iku
nuli padha mratobat sarta duwe pangucap mangkene: Kaya kang wus dadi karsane Sang
Yehuwah Gustine sarwa dumadi anggone nanduki marang aku, miturut laku lan pokalku,
iya kaya mangkono Panjenengane anggone nanduki marang kita”
Wahyu kang kapisan: Priya kang nunggang jaran
1:7-17
7
Ing taun kang kapindhone jamane Sang Prabu Dharius, pinuju sasi kang kaping
sawelas, iya sasi Syebat, tanggal kaping patlikur, ana pangandikane Pangeran Yehuwah
marang Nabi Zakharia bin Berekhya bin Idho, mangkene:
8
“Dhek mau bengi aku tampa wahyu: aku ndeleng ana priya nitih jaran
abang, jumeneng ana ing antarane wit jambu keling kang ana ing jurang; lan ing burine
ana jaran-jaran kang ulese abang, abang nom lan putih.
9
Aku banjur matur: Dhuh bendara, punapa tegesipun sadaya punika? Malaekat
kang mangandikani aku tumuli paring wangsulan mangkene: Aku bakal nuduhake
apa tegese kabeh iku mau.
10
Priya kang ngadeg ana ing antarane wit jambu keling iku
banjur wiwit guneman, celathune: Iki kabeh wong kang padha kautus dening Pangeran
Yehuwah ndlajahi bumi.
11
Wong-wong mau banjur padha matur marang Sang Malaekating
Yehuwah kang jumeneng ana ing antarane wit jambu keling, mangkene: Kawula sampun
sami ndlajahi dhateng bumi, lah salumahing bumi katingal ayem lan tentrem.
12
Ing kono ature Sang Malaekating Yehuwah:
Dhuh Yehuwah, Gustinipun sarwa tumitah, badhe ngantos pinten laminipun anggen
Paduka boten welas dhateng Yerusalem sarta kitha-kithanipun Yehuda ingkang
sampun Paduka bendoni laminipun pitung dasa taun punika?
13
Sang Yehuwah tumuli paring wangsulan marang malaekat kang
ngandika karo aku mau, kalawan tetembungan kang kapenak lan nglipur.
14
Malaekat kang ngandikan karo aku banjur dhawuh marang
aku mangkene: Iki undhangna: Pangandikane Sang Yehuwah Gustine sarwa dumadi: Wus
banget anggoningSun mbudidaya kanggo Yerusalem lan Sion,
15
nanging banget anggoningSun bendu marang para bangsa
kang rumangsa tentrem iku lan kang bareng Ingsun duka sathithik bae, banjur padha
ngrewangi gawe piala;
16
mulane Pangeran Yehuwah ngandika mangkene: Ingsun
wangsul maneh marang Yerusalem kalawan sih-kadarman. PadalemaningSun bakal
kabangun maneh ana ing kana, -- mangkono dhawuhe Pangeran Yehuwah Gustine sarwa
dumadi, -- sarta tali ukuran bakal kapenthang maneh ing sadhuwure Yerusalem.
17
Kajaba saka iku sira ngundhangna iki: Pangandikane
Pangeran Yehuwah, Gustine sarwa dumadi mangkene: Kutha-kuthaningSun bakal padha
pulih luber ing kautaman, sarta Sang Yehuwah bakal maringi panglipur marang Sion lan
Yerusalem bakal kapilih maneh.”
Wahyu kang kapindho: Sungu papat lan pandhe papat
1:18-21
18
Aku tumuli tumenga lan ndeleng, lah ana sungu papat,
19
aku banjur matur pitakon marang malaekat kang ngandikan
karo aku, mangkene: “Punika tegesipun punapa?” Paring wangsulane: “Sungu-sungu
iku kang wus mbuyarake Yehuda, Israel, sarta Yerusalem.”
20
Pangeran Yehuwah tumuli nedahake marang aku pandhe papat.
21
Aku banjur matur pitakon: “Tiyang-tiyang punika
dhatengipun badhe nindakaken punapa?” Paring wangsulane malaekat marang aku
mangkene: “Iku uga sungu kang wus padha mbuyarake Yehuda, nganti ora ana wong
siji-sijia kang wani ndengengek. Anadene tekane iku arep gawe kagete wong-wong iku,
yaiku mbanting sungune para bangsa kang wus padha masang sungune marang tanah
Yehuda arep dibuyarake.”
Wahyu kang kaping telu: Wong kang nyekel tali ukuran
2:1-5
2
1
Aku banjur tumenga lan weruh, lah ana priya kang nyekel tali ukuran,
2
Aku banjur matur pitakon: “Panjenengan tindak dhateng
pundi?” Paring wangsulane: “Arep ngukur Yerusalem, kepengin weruh pira ambane
lan pira dawane.”
3
Anadene malaekat kang ngandikan karo aku iku tumuli majeng, banjur
ana malaekat liyane kang methukake,
4
iku diprentahi mangkene: “Lumayua, wong nom
kang ana ing kana kae kandhanana: Yerusalem bakal tetep kaya ara-ara kang ngeblak, awit
saka kehing manungsa lan kewan kang ana ing jerone.
5
Sarta Ingsun piyambak, -- mangkono pangandikane Sang Yehuwah, -- bakal dadi
baluwarti geni ing sakubenge, apadene dadi kamulyan ana ing jerone.”
Wong buwangan diceluk dikon mulih 2:6-13
6
Ayo, ayo ta Padha lumayua saka ing Tanah Lor, -- mangkono pangandikane Sang
Yehuwah, -- awit sira padha Sunbuyarake ing keblat papat, -- mangkono pangandikane
Pangeran Yehuwah. --
7
Ayo, ngungsia menyang ing Sion, he, wong kang padha
manggon ing Babil
8
Amarga pangandikane Sang Yehuwah Gustine sarwa dumadi, kang
ing sajroning kamulyane wus ngutus aku gegayutan karo para bangsa kang wus njarahi
kowe, -- sabab sing sapa nggepok kowe dadi nggepok thelenging paningale. --
9
“Lah ta Ingsun bakal ngobat-abitake astaningSun
marang para wong iku, lan banjur padha dadi bandhangane para wong kang ing maune dadi
reh-rehane.” Nuli kowe bakal padha sumurup yen Pangeran Yehuwah Gustine sarwa dumadi
iku kang ngutus aku.
10
“He putri Sion Padha surak-suraka lan bungah-bungaha, awit Ingsun rawuh
lan dedalem ana ing tengahira, mangkono pangandikane Sang Yehuwah.
11
Ing waktu iku akeh para umat kang bakal padha
kumrubut melu sujud marang Sang Yehuwah lan manjing dadi umatingSun, sarta Ingsun
bakal akedhaton ana ing tengahira.” Mulane kowe padha ngreti yen pangeran Yehuwah
kang ngutus aku.
12
Ing kono Yehuda bakal kapundhut dening Sang Yehuwah dadi
kagungane ana ing tanah kang suci, sarta Yerusalem bakal kapilih uga.
13
He sakehe tumitah Padha manenga ana ing ngarsane
Sang Yehuwah, dene wus karsa tedhak saka ing padalemane kang suci.
Wahyu kang kaping pat: Imam Agung Yusak
3:1-10
3
1
Sawuse mangkono aku banjur dituduh Imam Agung Yusak jumeneng ana ing
ngarsane Sang Malaekating Yehuwah, dene setan ngadeg ana ing tengene, prelu ndakwa
panjenengane.
2
Sang Malaekating Yehuwah banjur ngandika marang Iblis mau: “He Iblis
Sira muga kadukanana dening Pangeran Yehuwah, iya kadukanana dening Sang
Yehuwah kang milih Yerusalem. Wong iki rak tugelan kayu kang wus kajupuk saka
ing geni?”
3
Anadene Imam Agung Yusak nalika jumeneng ana ing ngarsane Sang
Malaekat iku pangagemane reged.
4
Dhawuhe Sang Malaekat marang kang padha ngladosi:
“Cuculana sandhangane kang rege iku.” Dene marang Imam Agung Yusak pangandikane:
“Lah kaluputanira wus Sunedohake saka sira, lan sira Sunanggoni sandhangan pista.”
5
Tumuli dhawuh: “Sirahe anggonana serban kang resik” Mastakane nuli diagemi serban
resik, sarta diagemi pangageman pista; anadene Sang Malaekating Yehuwah jumeneng
ana ing sacedhake.
6
Sang Malaekating Yehuwah tumuli pratela marang Imam
Agung Yusak:
7
“Pangeran Yehuwah Gustine sarwa dumadi ngandika mangkene: Manawa
sira ngambah ing dalan pitedahingSun lan netepi kuwajiban kang Sunparingake marang
sira, sira bakal mengku padalemaningSun lan ngreksa plataraningSun, apadene sira
Sunparengake lumebu ana ing tengahe kang padha ngadeg leladi ana ing kene.
8
He, Imam Agung Yusak, sira ngrungokna, sira lan para
kancanira kang lungguh ana ing ngarepira -- iku rak padha dadi pratandha kang elok, -- lah
Ingsun bakal ngrawuhake abdiningSun, yaiku Sang Trubusan.
9
Mungguh watu adi kang wus Sunpasrahake marang Yusak iku saben watu
siji ana mripate pitu, sarta Ingsun bakal natahi ukir-ukirane. -- Mangkono pangandikane Sang
Yehuwah Gustine sarwa dumadi. -- Apamaneh Ingsun bakal ngicali durakane nagara iku
mung ing sajroning sadina.
10
Ing dina iku, -- mangkono pangandikane Pangeran Yehuwah
Gustine sarwa dumadi, -- sira padha gentenan ngajak lelungguhan ana ing ayome wit anggur
lan sangisore wit anjir.”
Wahyu kang kaping lima: Padamaran mas rinengga ing wit jaitun loro
4:1-14
4
1
Kacarita malaekat kang ngandikan karo aku mau rawuh maneh, banjur
nggigah aku patrape kaya nggigah wong lagi turu.
2
Pangandikane marang aku: “Kowe ndeleng apa?” Atur wangsulanku: “Kula ningali
padamaran mas bleg, wadhahipun lisah wonten ing perangan nginggil; padamaran
punika wonten damaripun pitu, kaliyan malih ing nginggilipun damar satunggal-tunggalipun
wonten torongipun pitu;
3
punapa malih padamaran punika kaukiran wit jaitun kalih,
satunggal wonten ing tengenipun wadhah lisah, satunggalipun wonten ing kiwanipun.”
4
Aku tumuli matur pitakon marang malaekat kang ngandikan karo aku mangkene: “Dhuh
bendara, punika tegesipun kadospundi?”
5
Malaekat kang ngandikan karo aku iku nuli ndangu: “Kowe apa ora ngreti tegese
kabeh iku?” Aturku: “Boten mangretos, bendara”
6
Panjenengane banjur pratela: “Iki pangandikane Pangeran Yehuwah marang
Zerubabel: ora srana kasantosan lan ora srana kakuwatan, nanging marga dening
rohingSun. -- Mangkono pangandikane Sang Yehuwah Gustine sarwa dumadi. --
7
He, gunung kang gedhe, sira iku sapa? Ana ing
ngarepe Zerubabel sira bakal dadi tanah rata, dene Zerubabel iku bakal ngangkat watu
kang pinunjul dene wong padha surak-surak: Apik Apik banget watu iku”
8
Nuli ana pangandikane Pangeran Yehuwah marang aku
mangkene:
9
“Tangane Zerubabel wus nalesi padaleman iki, iya tangane iku uga kang bakal
ngrampungake, temah kowe bakal sumurup, yen Pangeran Yehuwah Gustine sarwa dumadi
kang ngutus aku nemoni kowe.
10
Sabab sapa kang ngremehake marang dina kelakoning
prakara-prakara kang sapele, iku bakal padha bungah-bungah ndeleng watu pilihan kang
ana ing tangane Zerubabel. Dene kang pitu iki tingale sang Yehuwah,
kang ndlajahi salumahe bumi.”
11
Aku banjur matur pitakon mangkene: “Menggah wit
jaitun kalih ingkang wonten ing tengen sarta ing kiwanipun padamaran punika, punapa
tegesipun?”
12
Aku tumuli matur maneh: “Menggah pangipun wit jaitun kalih sandhing
torong emas kalih ingkang ngilekaken jer-jeran emas saking nginggilipun, punika punapa
tegesipun?”
13
Aku banjur dipangandikani mangkene: “Kowe apa ora sumurup tegese
iku?” Atur wangsulanku: “Boten sumerep, bendara”
14
Panjenengane nuli ngandika: “Iki wong loro kang dijebadi lan kang ngadeg ana
ing ngarsane Pangeraning salumahe bumi”
Wahyu kang kaping nem: Gulungan kitab kang nglayang
5:1-4
5
1
Aku banjur tumenga nuli weruh ana gulungan kitab nglayang.
2
Aku banjur dipangandikani mangkene: “Kowe weruh
apa?” Aturku: “Kula ningali wonten kitab gulungan nglayang, panjangipun kalih dasa
asta sarta wiyaripun sadasa asta.”
3
Tumuli aku dipangandikani maneh, mangkene: “Iku
sumpah wewelak kang nempuh ing sawratane nagara kabeh; sabab miturut surasane
sumpah wewelak iku, saben maling ana ing kene isih luput ing paukuman, mangkono uga
saben wong kang nglairake sumpah palsu iya isih luput ing paukuman.
4
Ingsun kang nglampahake wewelak iku, -- mangkono
pangandikane Pangeran Yehuwah Gustine sarwa dumadi, -- supaya iku lumebu ing
omahing maling sarta ing omahe wong kang nglairake sumpah palsu demi asmaningSun,
sarta bakal nginep ing omahe kono lan bakal ndadekake rusake, dadia kayune utawa
watu-watune.”
Wahyu kang kaping pitu: Wong wadon ana ing takeran efa
5:5-11
5
Malaekat kang ngandikan karo aku mau rawuh maneh, sarta dhawuh marang aku:
“Kowe namatna lan nitenana apa kang jumedhul ing kono?”
6
Aku nuli matur pitakon: “Punapa punika?” Pangandikane malaekat:
“Kang katon iku takeran efa” Nuli ngandika maneh: “Iku pialane wong-wong mau ana
ing saindenging nagara”
7
Lah, tutupe timah takeran iku wus kaangkat, lan ing jerone ana
wonge wadon kang lungguh.
8
Pangandikane malaekat mau: “Iku kadursilan” Wong
wadon iku banjur dijorogake maneh ana ing takeran efa, sarta bandhule timah
kabanting ing cangkeme efa.
9
Aku tumuli tumenga lan weruh, ana wong wadon loro
kang suwiwine kasentor ing angin; suwiwine mau kayu suwiwine manuk cangak. Efane
banjur diangkat mumbul dening wong loro iku ana ing antarane bumi karo langit.
10
Aku tumuli nyuwun priksa marang malaekat
kang ngandikan karo aku, mangkene: “Efa punika dipun bekta dhateng pundi?”
11
Paring wangsulane malaekat: “Menyang ing tanah
Sinear, wong wadon iku arep digawekake omah ana ing kana; samangsa wus dadi, wong
wadon mau banjur dipapanake ana ing omah kono.”
Wahyu kang kaping wolu: Kreta papat 6:1-8
6
1
Aku banjur tumenga maneh sarta weruh: lah ana kreta papat metu saka ing antarane
gunung loro. Anadene gunung iku gunung tambaga.
2
Kreta kang kapisan rakitane jaran abang, kreta kang kapindho jaran ireng.
3
Kang katelu jaran putih lan kang kapat jaran plangka lan plontheng.
4
Aku banjur nyuwun priksa marang malaekat kang ngandikan karo
aku, aturku: “Dhuh bendara, punika sadaya tegesipun kadospundi?”
5
Paring wangsulane malaekat: “Kabeh iku metu marang ing
keblat papat, sawuse padha seba marang ing ngarsane Pangeraning salumahe bumi.”
6
Kang rakitane jaran ireng iku menyang ing Tanah
Lor; kang putih iku parane mangulon, dene kang plangka menyang Tanah Kidul;
7
sarta kang abang iku metu, bingung arep lunga
sumedya ndlajahi salumahe bumi. Nuli padha kadhawuhan: “Mangkata, padha ndlajahana
salumahe bumi” Bumi banjur didlajahi.
8
Panjenengane tumuli nguwuh marang aku: “Sawangen, kang lakune menyang Tanah Lor
iku arep nentremake RohingSun ana ing Tanah Lor kono.”
Kratone Sang Trubusan ing Yerusalem 6:9-15
9
Nuli ana pangandikane Pangeran Yehuwah marang aku mangkene:
10
“Ing dina iki uga sira lungaa, menyang omahe Yosia bin
Zefanya narikana pisungsunge Heldai, Tobia lan Yedaya, wong kang wus padha bali saka
ing pambuwangan ing Babil.
11
Munguta salaka lan mas, iku banjur gawenen makutha
lan sira etrapna ing sirahe Imam Agung Yusak bin Yozadak,
12
kalawan pratelanana: Pangeran Yehuwah Gustine sarwa dumadi
ngandika mangkene: Lah iki priya kang asmane Sang Trubusan. Iki bakal tuwuh
saka ing papane, lan bakal yasa padalemane Sang Yehuwah.
13
Panjenengane kang bakal mbangun padalemane Sang Yehuwah, sarta
kang bakal tampi kaluhuran sarta lenggah ana ing dhampare kalawan ngasta paprentahan.
Ing tengene bakal ana sawijining imam, sarta panjenengane sakarone iku bakal padha
pirembagan bab damel tentrem-rahayu.
14
Anadene makutha iku bakal tetep kasimpen ana ing padalemane Sang Yehuwah, minangka
pangeling-eling marang Heldai, Tobia, Yedaya lan marang Yosia anake Zefanya.
15
Wong-wong kang adoh bakal padha teka melu mbangun padalemane Sang Yehuwah,
ing kono kowe bakal padha sumurup yen Pangeran Yehuwah Gustine sarwa dumadi
kang ngutus aku nemoni kowe kabeh. Lan
prakara iki bakal kelakon, manawa kowe padha ngrungokake swarane Pangeran Yehuwah
Allahmu kalawan temenan.”
Bab puwasa kang sabenere 7:1-14
7
1
Ing taun kang kaping pat jamane Sang Prabu Dharius, pinuju tanggal kaping
papat sasi kasanga, yaiku sasi Kislew, ana pangandikane Pangeran Yehuwah marang
Nabi Zakharia.
2
Dene wong kang manggon ing Betel wus padha kongkonan Sarezer
lan Regem-Melekh sakancane, supaya ngunjukake panyuwun muga kaparingana
sih-kamirahane Sang Yehuwah,
3
sarta matur marang para imam kang ana ing padalemaning
Yehuwah Gustine sarwa dumadi lan marang para nabi, mangkene: “Punapa kula kedah
sami nangis lan puwasa ing wulan kaping gangsal kados ingkang sampun kula lampahi
mataun-taun laminipun punika?”
4
Ing kono ana pangandikane Pangeran Yehuwah Gustine
sarwa dumadi marang aku, mangkene:
5
“Sira mratelakna marang rakyat sakabehe lan
marang para imam, mangkene: Nalika sira padha puwasa karo ngadhuh-adhuh ing sasi
kalima lan kapitu salawase pitung puluh taun iki, apa enggonira puwasa iku kagem
kaluhuraningSun?
6
Apamaneh manawa sira mangan utawa ngombe, rak iya mung mangan
utawa ngombe kanggo awakira dhewe, ta?
7
Iki rak pangandika kang wus kadhawuhake
dening Sang Yehuwah lumantar para nabi kang dhisik, nalika Yerusalem dalah kutha-kutha
ing saubenge isih dienggoni lan isih santosa, mangkono uga Tanah Negeb lan Dhaerah
Pagunungan iya isih dienggoni.”
8
Pangeran Yehuwah nuli ngandika marang Nabi Zakharia,
mangkene:
9
“Pangandikane Sang Yehuwah Gustine sarwa dumadi mangkene: Anggonira
nindakake pangadilan kang jejeg, sarta padha nandukna katresnan lan kawelasan marang
wong siji lan sijine.
10
Aja nindhes randha lan bocah lola, apadene wong ngamanca lan wong
miskin, mangkono uga ing sajrone atinira aja ana kang ngrancang sumedya nandukake
piala marang wong siji lan sijine.”
11
Nanging padha ora gelem nilingake, malah ngakokake
pundhake sumedya nglawan lan mbudhegake kupinge supaya aja nganti krungu.
12
Atine padha diatosake kaya inten, supaya aja nganti
krungu marang piwulang lan pangandika kang kadhawuhake dening Pangeran Yehuwah
Gustine sarwa dumadi kalawan Rohe lumantar para nabine kang dhisik, temah padha
kataman bebendune Sang Yehuwah kang ngedab-edabi.
13
“Kayadene anggone padha ora ngrungokake nalika katimbalan, iya kaya
mangkono anggoningSun ora midhangetake nalika padha sambat-sambat, -- mangkono
pangandikane Pangeran Yehuwah Gustine sarwa dumadi. --
14
Mulane bakal padha Sundamoni kaya tumanduke angin prahara,
menyang ing antarane sakehe para umat kang ora diwanuhi, sarta sawuse iku tanahe
dadi suwung, nganti ora kasaba ing wong, mangkono nagara kang adi iku padha
didadekake tanah kang sepi mamring dening wong-wong mau.”
Karahayone bangsa Israel 8:1-19
8
1
Tumuli ana pangandikane Pangeran Yehuwah Gustine sarwa dumadi
mangkene:
2
“Pangandikane Pangeran Yehuwah Gustine sarwa dumadi mangkene:
Banget anggoningSun mbudidaya nindakake samubarang kanggo Sion lan kalawan
bramatya kang banter.
3
Pangandikane Sang Yehuwah: Ingsun bakal rawuh ing Sion maneh
lan akedhaton ing tengahe Yerusalem, sarta Yerusalem bakal kasebut: Kutha Setya, dene
gununge Sang Yehuwah Gustine sarwa dumadi bakal kasebut: Gunung Suci.
4
Pangandikane Pangeran Yehuwah Gustine sarwa dumadi
mangkene: Ing lurung-lurunge Yerusalem bakal ana wong kaki-kaki lan nini-nini padha
lungguh maneh kalawan padha nyekel teken, marga saka kehing umure;
5
sarta dalan-dalan ing kutha iku bakal kebak bocah-bocah lanang
lan wadon kang padha dolanan ana ing kono.
6
Pangandikane Pangeran Yehuwah Gustine sarwa dumadi: Manawa lelakon ing wektu
iku diarani aneh dening kekarene bangsa iki, apa Ingsun iya bakal mastani aneh uga?
Mangkono pangandikane Sang Yehuwah Gustine sarwa dumadi.
7
Pangandikane Sang
Yehuwah Gustine sarwa dumadi mangkene: Lah umatingSun Sunentasake saka ing
panggonan pletheking srengenge nganti tumeka ing papan surupe,
8
sarta bakal Sunulihake mrene, supaya padha manggon
ana ing tengahe Yerusalem, apadene bakal padha dadi umatingSun, sarta Ingsun dadi
Allahe kalawan kasetyan lan kaadilan.”
9
Pangandikane Pangeran Yehuwah Gustine sarwa dumadi mangkene: “Padha kuwatna
atinira, he, para wong kang sasuwene iki padha krungu pangandika kang dilairake dening
para nabi iku, wiwit nalika masang tetalesing padalemane Sang Yehuwah Gustine sarwa
dumadi, nalika Padaleman Suci kaadegake.
10
Awit sadurunge iku wong padha ora oleh rejeki, mangkono uga kewan: sarta wong kang
mlebu metu ora bisa tentrem marga saka anane mungsuh, apadene Ingsun ndadekake
wong kabeh padha memungsuhan.
11
Nanging saiki, pangrehingSun marang kekarene
bangsa iki ora kaya dhek biyen, mangkono pangandikane Sang Yehuwah Gustine sarwa
dumadi.
12
Nanging Ingsun bakal nyebar tentrem-rahayu. Ing kono wit anggur bakal
metokake wohe, bumi bakal metokake asile sarta langit bakal menehake ebune. Iku kabeh
bakal Sunparingake marang kekarene bangsa iki dadia darbeke.
13
He, turune Yehuda lan turune Israel, dhek biyen sira dadi ipat-ipat
ana ing antarane para bangsa, nanging saiki Ingsun bakal ngganjar karaharjan marang sira
kabeh nganti padha dadi berkah. Aja padha wedi, santosakna atinira”
14
Awitdene pangandikane Pangeran Yehuwah Gustine sarwa dumadi mangkene: “Yen ing
biyen nalika para leluhurira padha memungu bebenduningSun, Ingsun banjur kagungan
karsa arep ndhatengake bilai marang sira kabeh lan Ingsun ora keduwung -- mangkono
pangandikane Sang Yehuwah Gustine sarwa dumadi --
15
nanging saiki Ingsun karsa damel becik maneh marang Yerusalem lan
marang turune Yehuda. Sira aja padha wedi
16
Iki prakara-prakara kang kudu sira tindakake: Sawiji-wijining wong ngucapa
kang bener marang pepadhane, lan netepana angger-angger ing sabenere kang njalari
tentrem ana ing gapura-gapuranira.
17
Aja ngangen-angen marang cilakane pepadhanira,
karomaneh aja seneng asumpah palsu, sabab kabeh iku Sunsengiti.” Mangkono
pangandikane Pangeran Yehuwah.
18
Ana maneh pangandikane Pangeran Yehuwah Gustine sarwa dumadi marang aku,
surasane:
19
“Pangeran Yehuwah Gustine sarwa dumadi ngandika mangkene: Wektu
puwasa ing sasi kaping pat, lan ing sasi kalima, ing sasi kapitu lan ing sasi kaping
sapuluh, iku bakal dadi kabungahan lan suka pari suka sarta dadi riyaya kang nengsemake
marang turune Yehuda; mulane sira padha nengenna marang kabeneran lan karukunan”
Karahayon tumrap bangsa-bangsa 8:20-23
20
Pangandikane Pangeran Yehuwah Gustine sarwa dumadi mangkene: “Para bangsa lan
para wong isine kutha-kutha pirang-pirang isih bakal padha teka maneh,
21
sarta para kang manggon ing kutha kang siji padha
marani marang kang manggon ing kutha sijine kalawan ngucap: Payo padha sowan
ngunjukake panyuwun marang Sang Yehuwah, supaya karsaa paring kamirahan tuwin
ngupaya marang Pangeran Yehuwah Gustine sarwa dumadi Aku dhewe iya bakal padha
sowan.
22
Dadi bangsa pirang-pirang lan para suku bangsa kang santosa bakal padha teka
ing Yerusalem, ngupaya Pangeran Yehuwah Gustine sarwa dumadi, sarta padha nyuwun
kamirahaning Yehuwah.”
23
Pangeran Yehuwah Gustine sarwa dumadi ngandika mangkene: “Ing wektu iku ana
wong sapuluh panunggalane para bangsa lan basa warna-warna, padha nggondheli
pojoking jubahe wong Yahudi siji kalawan kenceng sarta ngucap: Kula sami badhe tumut
panjenengan sadaya, margi kula sami mireng, bilih panjenengan sami tinunggil dening Gusti
Allah”
BAB 9--14 PAMECA BAB BAKAL RAWUHE SANG MESIH
Kategori