Alkitab Bahasa Batak Simalungun - Lengkap

Bahasa Batak Simalungun

2007

Panompaon ni Naibata bani Langit pakon Tanoh ampa Haganup Isini

Bani mula ni mulani itompa Naibata ma langit pakon tanoh.

Tapi seng marrumang anjaha lumei do tanoh on; hagolapan do manrongkob luhung ai, anjaha mayap-ayap do Tonduy ni Naibata i atas bah ai.

Dob ai marsahap ma Naibata, “Jadi ma ho na lihar!” Gabe lihar ma tongon.

Iidah Naibata ma na dob dear na lihar ai; isirang Naibata ma na lihar ai humbani na golap ai.

Jadi igoran Naibata ma na lihar ai arian, anjaha na golap ai igoran borngin. Bod ma ari, siang ma ari use, ai ma ari na parlobei.

Dob ai marsahap ma Naibata, “Jadi ma ho hajangkajang iparsitongahan ni sagala bah, bahen parsirangan ni bah humbani bah!”

Ibahen Naibata ma hajangkajang ai gabe parsirangan ni bah na i toruh ni hajangkajang ai humbani bah na i atas hajangkajang ai. Anjaha jadi ma sonai.

Igoran Naibata ma hajangkajang ai langit. Bod ma ari, siang ma ari use, ai ma ari na paduahon.

Marsahap ma use Naibata, “Martumpu ma sagala bah na i toruh ni langit in hubani sada ianan, ase taridah na horah.” Anjaha jadi ma sonai.

Igoran Naibata ma na horah ai tanoh, anjaha partumpuan ni bah ai igoran laut. Iidah Naibata ma, domma dear ai.

Marsahap ma use Naibata, “Ipantubuhkon tanoh in ma poyon-poyon, suan-suanan na marbatu, ampa hayu na marbuahkon buah na marbatu, marsiboan masamni i tanoh on.” Anjaha jadi ma sonai.

Ipantubuhkon tanoh in ma poyon-poyon, suan-suanan na marbatu marsiboan masamni ampa hayu na marbuahkon buah na marbatu marsiboan masamni. Iidah Naibata ma, na dob dear ai.

Bod ma ari, siang ma ari use, ai ma ari na patoluhon.

Marsahap ma use Naibata, “Jadi ma panondang i hajangkajang ni langit in, bahen parsirangan ni arian

pakon borngin, bahen tanda pakon ni panorang,

ari pakon tahun,

bahen panondang i hajangkajang ni langit in, laho manondangi tanoh on!” Anjaha jadi ma sonai.

Jadi itompa Naibata ma dua panondang bolon; panondang sibanggalan ai manrajai arian, panondang sietekan ai manrajai borngin. Itompa do homa bintang-bintang.

Inahkon Naibata ma sidea hu hajangkajang ni langit ai laho manondangi tanoh on,

laho manrajai arian pakon borngin ampa manirang na lihar humbani na golap. Iidah Naibata ma, domma dear ai.

Bod ma ari, siang ma ari use, ai ma ari na paompatkon.

Marsahap ma Naibata use, “Manjuluri ma ibagas bah in na nompa na manggoluh, anjaha marhabangan ma manuk-manuk i atas ni tanoh, ibagas hajangkajang ni langit in!”

Jadi itompa Naibata ma binatang laut na banggal-banggal pakon sagala na nompa na marhosah na manggoluh ibagas bah, marsiboan masamni, ampa sagala manuk-manuk na marhabong, marsiboan masamni. Iidah Naibata ma, domma dear ai.

Ipasu-pasu Naibata ma ganupan ai, nini ma, “Manggompari anjaha lambin gargar ma hanima, goki hanima ma bah ni laut in;” lambin bueini ma homa manuk-manuk i atas tanoh on.

Bod ma ari, siang ma ari use, ai ma ari na palimahon.

Marsahap ma use Naibata, “Ipantubuhkon tanoh in ma na nompa na manggoluh, marsiboan masamni, pinahan, binatang na manjulur pakon binatang na i talun marsiboan masamni.” Anjaha jadi ma sonai.

Jadi itompa Naibata ma binatang-binatang marsiboan masamni, pakon pinahan marsiboan masamni, ampa sagala binatang na manjulur i atas tanoh on, marsiboan masamni. Iidah Naibata ma, domma dear ai.

Panompaon ni Naibata bani Jolma

Marsahap ma use Naibata, “Tompa Hita ma jolma songon rupan-Ta, pakon songon parlahouta, ase irajai sidea dengke na i laut, manuk-manuk na i awang-awang, pinahan, pakon ganup tanoh on, ampa sagala binatang na manjulur i atas tanoh on.” Jadi itompa Naibata ma jolma in songon rupa-Ni, songon rupa ni Naibata do itompa sidea; dalahi pakon naboru do sidea itompa.

Dob ai ipasu-pasu Naibata ma sidea, nini ma dompak sidea, “Manggompari anjaha lambin manggargar ma hanima, goki hanima ma tanoh on anjaha patunduk ma in; rajai hanima ma dengke na i laut, manuk-manuk na i awang-awang, pakon sagala binatang na manjulur i atas tanoh on.”

Marsahap ma use Naibata, “Hubere ma bennima sagala suan-suanan na marbatu bani sab tanoh on, ampa sagala hayu na marbuahkon buah na marbatu, ai ma gabe sipanganonnima.

Tapi bani haganup binatang na iatas tanoh on, haganup manuk-manuk na i awang-awang ampa haganup na manjulur i atas tanoh on, sagala na

marhosah, poyon pakon naporon na maratah ma Hubere panganon ni sidea.” Anjaha jadi ma sonai.

Jadi iidah Naibata ma sagala na nompa-Ni ai, domma dear tumang. Bod ma ari, siang ma ari use, ai ma ari na paonomkon.

Ari Sabat

Sonai ma pardob ni langit ai, tanoh in ampa haganup isini.

Jadi dob idobkon Naibata horja na hinorjahon-Ni ai bani ari papituhon, marsaran ma Ia bani ari na papituhon ai humbani sagala horja na hinorjahon-Ni ai.

Ipasu-pasu anjaha ipapansing Naibata ma ari papituhon ai, halani bani ari ai do Ia marsaran humbani sagala horja panompaon-Ni ai.

Sonin ma parjadi ni langit pakon tanoh on, sanggah panompaon ai.

Pohon Eden

Sanggah na itompa Naibata Jahowa langit pakon tanoh on, seng dong ope hayu i talun, seng dong ope suan-suanan itongah juma, halani seng ope iparoh Naibata udan hu tanoh on, anjaha seng dong ope jolma na mangkorjahon tanoh in,

tapi dong do sabun naik hun tanoh on mangarbahi ganup sisik ni tanoh on;

bani panorang ia ma itompa Naibata Jahowa jolma humbani orbuk ni tanoh on, anjaha isompulhon hosah hagoluhan hubagas ruang ni igungni. Jadi sonai ma martonduy na manggoluh jolma ai.

Dob ai ipungkah Naibata Jahowa ma sada pohon i Eden, hampit hapoltakan; hujai ma inahkon jolma na nompa-Ni ai.

Ipantubuhkon Jahowa ma marmasam-masam hayu hun tanoh in, na jenges idahon anjaha na man n panganon, pakon hayu hagoluhan iparsitongahan ni pohon ai, ampa hayu pambotohan ni na madear ampa na masambor.

Dong do sada bah, tubuh i Eden laho mangarbahi pohon ai, hunjai mardangkah do ai gabe ompat bah bolon:

Goran ni na parlobei Pison, na mangarbahi ganup tanoh Hawila, pambuatan ni omas ai,

jenges do omas na hun nagori ai. Adong do homa ijai damar Bedolah pakon batu intan Soham.

Goran ni bah na paduahon Gihon, na mangarbahi ganup tanoh Kus.

Goran ni bah na patoluhon Hidekel, ai ma na mabaor hampit hapoltakan ni Assur. Anjaha bah na paompatkon ai ma Eprat.

Jadi iarahkon Naibata Jahowa ma jolma ai, inahkon ma ia hu pohon Eden laho manlahoi ampa manramotkon ai.

Titah ni Naibata

Dob ai i tahkon Naibata Jahowa bani jolma ai, nini ma, “Boi do panganonmu humbani ganup hayu na i pohon on,

tapi anggo humbani hayu pambotohan ni na madear ampa na masambor in, seng bulih panganonmu; halani ijin ipangan ho hunjai, maningon matei do ho.”

Panompaon ni Naibata bani si Hawa. Mula ni Partongahjabuan

Dob ai nini Naibata Jahowa ma, “Seng dear jolma in punjung, Hubahen ma bani sada pangurupi, gabe parangguanni.”

Dob ai ijadihon Naibata ma humbani tanoh in sagala binatang na i darat pakon sagala manuk-manuk na i awang-awang. Iboan ma ganupan ai hubani si Adam laho mangidah, atap sonaha bahenonni goran ni ai, anjaha ia in ibahen si Adam goran ni haganup na marhosah ai, lanjar ai do goranni.

Jadi ibahen si Adam ma goran ni sagala pinahan-pinahan ai, pakon sagala manuk-manuk na i awang-awang ai, ampa sagala binatang na i darat, tapi bani jolma ai, seng dong jumpahsi pangurupi, gabe parangguan bani.

Dob ai renges ma modom si Adam ibahen Naibata Jahowa. Jadi ibuat Naibata ma rusukni sada, dob ai itutupkon ma daging hubani ianan ai.

Ijadihon Naibata Jahowa ma sada naboru humbani rusuk na humbani si Adam, dob ai itogu ma ia hubani si Adam.

Jadi nini si Adam ma, “On ma da holi-holi humbani holi-holingku anjaha daging humbani dagingku. Naboru ma ia goranon, halani humbani dalahi do ia ibuat.”

Halani ai tadingkonon ni dalahi do bapa pakon inangni laho mangkasomani parinangonni, gabe sada daging ma sidea.

Ia sidea na dua ai, si Adam pakon parinangonni ai, talanjang do, tapi seng marsihailaan.

Mula ni Dousa

Ulog do sipandeinan marimbang sagala binatang na i talun, na nompa ni Naibata Jahowa. Jadi nini ulog ai ma bani naboru ai, “Adong do nani ihatahon Naibata, na so bulih panganon nasiam humbani sagala buah ni hayu na i pohon on?”

Jadi nini naboru ai ma dompak ulog ai, “Bulih do panganonnami humbani buah ni hayu na i pohon on;

tapi anggo pasal buah ni hayu na i parsitongahan ni pohon on, ihatahon Naibata do, ʻUlang pangan

hanima hunjai anjaha ulang jamah, ase ulang matei hanima.ʼ”

Jadi nini ulog ai ma bani naboru ai, “Seng tongon matei nasiam,

tapi ibotoh Naibata do, anggo ipangan nasiam hunjai, gabe buha ma mata nasiam, doskon Naibata ma nasiam mambotoh na madear pakon na masambor.”

Inonoi naboru ai ma, dear do buah ni hayu ai panganon, jenges idahon anjaha siharosuhkononkon, halani boi papentarhon; jadi ibuat ma buahni, ipangan ma, ibere ma homa paramangonni na rap pakonsi ai, gabe ipangan ma. Gabe buha ma mata ni sidea haduasi, ibotoh ma na talanjang sidea. Jadi isomot ma bulung ni hayu ara bahen bobat ni sidea.

Papa-papa ampa Bagah-bagah ni Naibata

Dob ai ibogei sidea ma sora ni Naibata Jahowa, na mardalan-dalan i pohon ai bani parrohni logou malele bod. Jadi marponop ma si Adam pakon parinangonni ai humbani bohi ni Naibata Jahowa i holangkolang ni hayu na i pohon ai.

Pio-pio ma Naibata Jahowa bani si Adam, nini ma hu bani, “Ija do ho?”

Nini mambalosi, “Hubogei do sora-Mu i pohon in, tapi mabiar do ahu, halani talanjang do ahu, ai do ase marponop ahu.”

Nini ma, “Ise patugahkon bam na talanjang ho? Ai dong ipangan ho buah ni hayu na Hularang in panganonmu?”

Nini si Adam ma, “Naboru na binere-Mu ai gabe hasomanku, ia do na mambere buah ni hayu in bangku, gabe hupangan.”

Nini Naibata Jahowa ma hubani naboru ai, “Ai aha do na binahenmon?” Nini naboru ai ma, “Na ipaoto-oto ulog in do ahu, gabe hupangan.”

Dob ai nini Naibata Jahowa ma bani ulog ai, “Halani ibahen ho sonai, hona papa ma ho i lobei ni sagala pinahan pakon binatang harangan; marhitei boltokmu ma ho manjulur, anjaha orbuk ma panganonmu sadokah manggoluh ho.

Anjaha bahenon-Ku ma par nggilanmu pakon naboru on, ginomparmu hubani ginomparni. Lisatkonon ni ginomparni ma ulumu, tapi pagutonmu do tambihulni.”

Nini ma hubani naboru ai, “Pabueion-Ku ma sitarononmu sanggah boratan rumah ho; borit ma ahapkononmu manubuhkon niombahmu! Paramangonmu ma hasiholanmu na manrajai ho!”

Anjaha hubani si Adam ihatahon ma, “Halani na binalosanmu hata ni parinangonmu, anjaha ipangan ho humbani hayu na Hu tahkon in bam, ʻUlang pangan hunjaiʼ, hona papa ma tanoh on halani ho. Ngalutan ma ho mansarihon sipanganonmu sadokah manggoluh ho.

Pantubuhkonon ni tanoh in ma bam duri pakon suga-suga, anjaha suan-suanan na i tanoh in ma sipanganonmu.

Turak-turak hadogas ma ho mansarihon sipanganonmu, paima mulak ho gabe tanoh, ai hunjai do ho ibuat; orbuk do ho, halani ai maningon mulak do ho gabe orbuk.”

Ibahen si Adam ma goran ni parinangonni ai si Hawa, halani ia do inang ni sagala na manggoluh.

Dob ai ipauli Naibata Jahowa ma bobak bahen hiou ni si Adam pakon parinangonni ai, iabitkon ma ai bani sidea.

Hona usir hun Pohon Eden

Dob ai nini Naibata Jahowa ma, “Tonggor ma, domma doskon sada hun bennami si Adam, mambotoh na madear pakon na masambor; ai pe, jagaon do ase ulang idurdurhon tanganni, anjaha ipu kkon humbani hayu hagoluhan ai anjaha ipangan, gabe manggoluh sadokah ni dokahni.”

Jadi iusir Naibata Jahowa ma ia hun pohon Eden ai, ase ihorjai tanoh pambuatanni ai.

Iusir ma si Adam, inahkon ma herubim hampit hapoltakan ni pohon Eden ai marhasoman podang na marjimbur-jimbur na mawas-awas, laho manjagai dalan hu hayu hagoluhan ai.

Si Kain pakon si Abel

Jadi marsaor ma si Adam pakon si Hawa parinangonni ai; boratan rumah ma ia, anjaha itubuhkon ma si Kain. Dob ai nini ma, “Domma dapot ahu sada anak dalahi marhitei pangurupion ni Jahowa.”

Itubuhkon ma use si Abel, anggini ai. Parmahan biribiri do anggo si Abel, tapi parjuma-juma do ia si Kain.

Bani dokah-dokah ni ari, ibuat si Kain ma humbani limbuah ni jumani bahen galangan hubani Jahowa. Si Abel pe iboan ma humbani bunga tubuh ni pinahanni ampa humbani taboh-tabohni. Jadi rosuh ma uhur ni Jahowa mangidah si Abel ampa galanganni ai,

tapi anggo si Kain ampa galanganni ai seng iharosuhkon. Jadi milas tumang ma uhur ni si Kain anjaha migar ma bohini.

Nini Jahowa ma bani si Kain, “Mase milas tumang uhurmu anjaha migar bohimu?

Ai lang dirgak do bohimu, anggo ihorjahon ho na madear? Tapi anggo lang ihorjahon ho na madear, monggop ma dousa in i lobei ni labah in, anjaha hubam do ihasiholhon, tapi ho do patut manrajaisi.” Dob ai nini si Kain ma bani anggini si Abel ai, “Eta, laho hita hu juma! Dob das sidea i juma, jongjong ma si Kain mandorab anggini ai, lanjar ibunuh.”

Jadi nini Jahowa ma bani si Kain, “Ija do si Abel anggimin?” Nini ma, “Seng hubotoh, ai ahu siparorot-rorot anggingku?”

Tapi nini ma, “Aha do na binahenmin? Tangar ma doruh-doruh do daroh ni anggimin hu Bangku hun tanoh in.

On pe, hona papa ma ho, hona usir hun tanoh in, na pangangang babahni manjalo daroh ni anggimin, humbagas tanganmin.

Anggo ihorjahon ho tanoh in, seng be bereonni gok gogohni hubam; mawat-awat anjaha kahou-kahou mando ho i tanoh on.”

Nini si Kain ma bani Jahowa, “Banggal do uhum na bangku in, lobih humbani na tarporsan ahu.

Iusir Ham do ahu sadari on hun tanoh on anjaha maningon marponop do ahu humbani bohi-Mu; mawat-awat anjaha kahou-kahou mando ahu i tanoh on, anjaha bunuhon ni sagala na jumpahan ahu ma ahu.”

Tapi nini Jahowa ma hu bani, “Lang sonai. Barang ise na mambunuh si Kain, maningon pitu lompit do abulonni.” Dob ai ibahen Jahowa ma tanda bani si Kain, ase ulang ibunuh atap ise pe ia, na marjumpah pakonsi.

Ginompar ni si Kain

Dob ai laho ma si Kain hun lobei ni Jahowa, anjaha marianan ma ia i tanoh Nod, hampit hapoltakan ni Eden.

Marsaor ma si Kain ampa parinangonni, boratan rumah ma ia anjaha itubuhkon ma si Hanok. Itombei ma sada huta ibahen ma goranni Hanok, mangihutkon goran ni anakni, si Hanok ai.

Dob ai itubuhkon si Hanok ma si Irad, si Irad manubuhkon si Mahujael; si Mahujael manubuhkon si Lamek.

Dua do ibuat si Lamek parinangonni, goranni na sada si Ada, goran ni na sada nari si Silla.

Dob ai itubuhkon si Ada ma si Jabal; ia do ompung ni halak siiankon tenda ampa sipahan pinahan.

Ia goran ni anggini si Jubal do; ia do ompung ni sagala halak siparhusapi ampa siparsarunei.

Itubuhkon si Silla ma homa si Tubalkain; ia do ompung ni sagala halak tukang tombaga pakon bosi; si Naema do botou ni si Tubalkain.

Nini si Lamek ma hubani parinangonni na dua ai, “Ale Ada pakon ho Silla bogei ma sorangku; hanima parinangon ni si Lamek, tangar ma na huhatahon on! Hubunuh do sada amang-amang halani ugahku, sada parana halani lonsing-lonsing na hu bangku.

Anggo pitu hali lompit iabul si Kain, si Lamek maningon pitu puluh pitu hali lompit do.”

Si Set pakon si Enos; Pambalosion na Parlobei bani Naibata

Marsaor ma use si Adam pakon parinangonni jadi itubuhkon ma sada anak, anjaha ibahen ma goranni si Set, ai nini do, “Ibere Naibata do bangku anak na legan gan h ni si Abel, halani ibunuh si Kain ia.”

Tubuh ma homa bani si Set sada anak, ibahen ma goranni si Enos. Ijia ma ipungkah halak mandilo goran ni Jahowa.

Ginompar ni si Adam

On do tarombo ni ginompar ni si Adam. Sanggah na nompa ni Naibata si Adam, itompa do ia mangusihi rupa ni Naibata;

dalahi pakon naboru do sidea itompa. Jadi ipasu-pasu ma sidea, ibahen ma goran ni sidea jolma, bani ari panompaon ni sidea ai.

Dob saratus tolu puluh tahun umur ni si Adam, tubuh ma anakni, usih hubani rupani, usih hubani tompani; ibahen ma goranni si Set.

Dob itubuhkon si Adam si Set, manggoluh ope ia ualuh ratus tahun nari, anjaha itubuhkon do anak pakon boru.

Siah ratus tolu puluh tahun ma ganup umur ni si Adam manggoluh; dob ai matei ma ia.

Dob saratus lima tahun umur ni si Set, itubuhkon ma si Enos.

Ia dokah ni si Set manggoluh dob itubuhkon si Enos, ualuh ratus pitu tahun do, anjaha itubuhkon do anak pakon boru.

Siah ratus sapuluh dua tahun ma ganup umur ni si Set, dob ai matei ma ia.

Dob siah puluh tahun umur ni si Enos, itubuhkon ma si Kenan.

Ia dokah ni si Enos manggoluh dob itubuhkon si Kenan, ualuh ratus sapuluh lima tahun do; anjaha itubuhkon do anak pakon boru.

Siah ratus lima tahun ma ganup umur ni si Enos, dob ai matei ma ia.

Dob pitu puluh tahun dokah ni si Kenan manggoluh, itubuhkon ma si Mahalaleel.

Ia dokah ni si Kenan manggoluh, dob itubuhkon si Mahalaleel, ualuh ratus ompat puluh tahun do; anjaha itubuhkon do anak pakon boru.

Siah ratus sapuluh tahun do ganup umur ni si Kenan, dob ai matei ma ia.

Dob onom puluh lima tahun dokah ni si Mahalaleel manggoluh, itubuhkon ma si Jared.

Ia dokah ni si Mahalaleel manggoluh dob itubuhkon si Jared, ualuh ratus tolu puluh tahun do; anjaha itubuhkon do anak pakon boru.

Ualuh ratus siah puluh lima tahun do ganup umur ni si Mahalaleel, dob ai matei ma ia.

Dob saratus onom puluh dua tahun dokah ni si Jared manggoluh, itubuhkon ma si Henok.

Ia dokah ni si Jared manggoluh, dob itubuhkon si Henok, ualuh ratus tahun do; anjaha itubuhkon do anak pakon boru.

Siah ratus onom puluh dua tahun do ganup umur ni si Jared; dob ai matei ma ia.

Dob onom puluh lima tahun umur ni si Henok, itubuhkon ma si Metusala.

Marparlahou marhasomankon Naibata do si Henok ai; dob itubuhkon si Metusala, manggoluh ope ia tolu ratus tahun nari; anjaha itubuhkon do anak pakon boru.

Jadi tolu ratus onom puluh lima tahun ma ganup umur ni si Henok.

Sai marparlahou marhasomankon Naibata do si Henok; dob ai seng ijin be ia, ai ibuat Naibata do ia. Dob saratus ualuh puluh pitu tahun umur ni si Metusala, itubuhkon ma si Lamek.

Dob itubuhkon si Metusala si Lamek, manggoluh ope ia pitu ratus ualuh puluh dua tahun nari; anjaha itubuhkon do anak pakon boru.

Siah ratus onom puluh siah tahun ma ganup umur ni si Metusala, dob ai matei ma ia.

Dob saratus ualuh puluh dua tahun umur ni si Lamek, itubuhkon ma sada anak;

ibahen ma goranni si Noak, ai nini do, “On ma na mangapoh hita bani horjanta ampa halojaon ni tanganta bani tanoh, na pinapaan ni Jahowa.”

Dob itubuhkon si Lamek si Noak, manggoluh ope ia lima ratus siah puluh lima tahun nari; anjaha itubuhkon do anak pakon boru.

Pitu ratus pitu puluh pitu tahun do ganup umur ni si Lamek, dob ai matei ma ia.

Dob lima ratus tahun umur ni si Noak, itubuhkon ma si Sem, si Ham pakon si Japet.

Hajahaton ni Jolma

Jadi dob mamungkah buei jolma i tanoh on, anjaha tubuhan boru sidea,

iidah anak ni Naibata ma na jenges do boru ni jolma in, gabe ibuat ma sidea bahen parinangon ni sidea, barang ise na hinarosuhkon ni sidea.

Nini Jahowa ma, “Lang be ianan ni Tonduy-Hu jolma in sadokah ni dokahni, ai paruhur daging do ia; saratus dua puluh tahun on mando umurni.

Adong do bani panorang ia jolma raksasa i tanoh on, sonai homa i pudini ai, ai ma sanggah na pinarayak ni anak ni Naibata boru ni jolma in, gabe itubuhkon anak bani sidea; sidea ma halak na gogoh bani panorang na basaia, halak na tarambilan goranni.

Dob iidah Jahowa, na lambin roh banggalni hajahaton pakon pingkiran ni uhurni tongtong,

isolsoli Jahowa ma uhur-Ni, halani na nompa-Ni ai jolma i tanoh on, pusok do uhur-Ni halani ai.

Nini Jahowa ma, “Sasapon-Ku ma hun tanoh on jolma na dob Hutompa in, jolma age pinahan, sonai homa binatang na manjulur ampa manuk-manuk na i awang-awang in, ai domma Husolsoli uhur-Hu, halani na Hutompa ai.”

Tapi dapotan idop ni uhur do si Noak i lobei ni Naibata.

Lumba-lumba Pasal Bah na Sumbang

On ma barita ni si Noak: Halak na bonar anjaha na daulat do si Noak i tongah-tongah ni halak na sansundut pakonsi; marhasoman Naibata do ia manggoluh.

Tolu do anak ni si Noak: Si Sem, si Ham pakon si Japet.

Ia tanoh in domma butak i lobei ni Naibata, anjaha gok hajahaton do tanoh in.

Iidah Naibata ma tanoh in, tonggor ma, domma sambor, ai sagala na manggoluh pabutak parlahouni i tanoh in.

Nini Naibata ma bani si Noak, “Domma Huputuskon paujungkon goluh ni sagala na manggoluh, halani domma igoki hajahaton ni sidea tanoh on. On pe masapkonon-Ku ma sidea rap pakon tanoh on.

Pauli ma bam sada parau humbani hayu goper; bahen ma markamar-kamar paraumu, rohat ma humbagas pakon hun darat.

Sonon ma parpaulimu bani parau in: Ganjangni tolu ratus asta, bolakni lima puluh asta, anjaha gijangni tolu puluh asta.

Bahen ma ngkap bani parau in, anjaha pauli ma ai saasta hun datas; bahen ma labahni hampit lambungni, anjaha mar ngkat partoruh, partongah ampa pardatas ma bahen parau in.

Ai parohon-Ku ma hu tanoh on bah na sumbang, laho manripaskon sagala na manggoluh pakon na marhosah na i toruh ni langit; maningon rotap do hosah ni sagala na adong i tanoh on.

Tapi pajongjongon-Ku do padan-Ku pakon ho, masukanmu ma parau in, ho pakon anakmu, parinangonmu ampa parinangon ni anakmu na rap pakon ho in.

Pamasuk ma hubagas parau in saparangguan bei humbani sagala na manggoluh, humbani sagala na mardaging, ase bansah rap pakon ho; tunggal pakon boru-boru pamasuk.

Humbani ganup masam ni manuk-manuk, humbani ganup masam ni pinahan-pinahan ampa humbani ganup masam ni na manjulur i tanoh in, saparangguan, humbani ganupan ai maningon roh do bam, ase bansah.

Buat ma bam humbani sagala sipanganon na boi panganon; patumpu ma ai bahen bohalmu pakon bohal ni sidea.”

Jadi ibahen si Noak ma sonai; haganup songon na nonahkon ni Naibata hubani sonai do ihorjahon.

Parmasuk ni si Noak hubagas Parau

Dob ai nini Jahowa ma hubani si Noak, “Masuk ma ho hubagas parau in pakon ganup sinrumahmu, ai ho do Huidah na bonar i lobeihu humbani halak na sansundut on.

Humbani pinahan na pan panganon buat ma bam pitu parangguan, tunggal pakon boru-boruni, tapi saparangguan ma humbani pinahan na so pan panganon, tunggal pakon boru-boruni;

sonai homa humbani manuk-manuk na i awang-awang pitu parangguan, tunggal pakon boru-boru, laho pagoluhkon bonihni bani sab tanoh on.

Halani pitu ari nari parohon-Ku ma udan hu atas tanoh on ompat puluh ari ompat puluh borngin dokahni, anjaha ripaskonon-Ku ma sagala na dong na hutompa in, hun tanoh on.”

Jadi ibahen si Noak ma ganup, songon na hinatahon ni Jahowa hu bani.

Onom ratus tahun ma umur ni si Noak, sanggah na roh ai bah na sumbang hu atas tanoh on.

Masuk ma si Noak hu parau ai rap pakon anakni, parinangonni ampa parinangon ni anakni ai, halani bah na sumbang ai.

Humbani pinahan na pan panganon pakon humbani pinahan na so pan panganon, humbani

manuk-manuk pakon humbani haganup na manjulur i atas tanoh on,

roh mar sasaparangguan hubani si Noak hubagas parau ai, tunggal pakon boru-boru, songon na hinatahon ni Naibata hubani si Noak.

Dob salpu na pitu ari ai, roh ma bah na sumbang hu atas tanoh on.

Parroh ni Bah na Sumbang

Bani paonomratus-tahunkon goluh ni si Noak, bani bulan dua ari sapuluh pitu, bani na sadari ai ma pultak bah ni luhung bolon anjaha mungkab ma ganup labah ni bah na i langit.

Jadi manalosou ma roh udan hu tanoh on ompat puluh ari ompat puluh borngin dokahni.

Bani na sadari ai ma masuk si Noak hubagas parau ai rap pakon anakni si Sem, si Ham, si Japet, pakon parinangonni ampa parinangon ni anakni na tolu halak ai,

sidea pakon sagala binatang marsiboan masamni, pakon sagala pinahan marsiboan masamni, pakon sagala binatang na manjulur i atas tanoh on, marsiboan masamni, ampa

sagala manuk-manuk marsiboan masamni,

sagala manuk-manuk na marambulu pakon na marhabong;

roh ma sidea sagala na manggoluh ampa na marhosah, marparangguan-parangguan hubani si Noak hubagas parau ai.

Ia na masuk ai, ai ma tunggal pakon boru-boru humbani sagala na manggoluh, songon na hinatahon ni Naibata hubani; dob ai itutup Jahowa ma irik i pudini.

Ompat puluh ari do dokahni roh bah na sumbang ai hu tanoh on; naik ma bah ai, iangkat ma parau ai, daoh hu babou ni tanoh on.

Dob lambin martambah-tambah bah ai, anjaha lambin sumbang tumang i atas tanoh on, jadi mumbang-umbang ma parau ai i atas ni bah ai.

Lambin manraja tumang ma bah ai i atas tanoh on, gabe irongkob ma sagala dolog na gijang na i toruh ni langit.

Sapuluh lima asta manraja bah ai hu atas, gabe tarrongkob ma sagala dolog-dolog.

Jadi rotap ma hosah ni sagala na mardaging, na manggoluh i atas tanoh on, manuk-manuk, pinahan-pinahan, binatang-binatang pakon sagala binatang na manjulur, na manjuluri i atas tanoh on, ampa jolma haganupan.

Matei ma haganup na marhosah hagoluhan ibagas igungni, haganup na adong bani tanoh na mahorah.

Jadi sasap ma haganup na adong i atas tanoh on, jolma sonai homa pinahan, binatang na manjulur

ampa manuk-manuk na i awang-awang, haganupan ai sasap do hun tanoh on. Pitah si Noak mando na tading manggoluh ampa haganup na rap pakonsi ibagas parau ai.

Saratus lima puluh ari do dokah ni bah ai manrajai tanoh on.

Parsurut ni Bah na Sumbang

Dob ai idingat Naibata ma si Noak pakon haganup binatang ampa haganup pinahan, na rap pakonsi ibagas parau ai. Ipabontaskon Naibata ma logou hu tanoh ai, ase surut bah ai.

Tartutup ma bah tubuh ni luhung bolon ai ampa labah ni bah na i langit. Mangadi ma udan manalosou na hun langit,

gabe lambin surut ma bah ai hun tanoh on; sonai ma parsurut ni bah ai, dob salpu saratus lima puluh ari.

Bani bulan pitu, ari sapuluh pitu, sangkot ma parau ai i atas pakpak ni Dolog Ararat.

Lambin surut ma bah ai das bani bulan sapuluh; bani bulan sapuluh, ari sada taridah ma pakpak ni dolog-dolog.

Dob salpu ompat puluh ari, iungkab si Noak ma jandela ni parau na pinaulini ai.

Ipaluah si Noak ma sada kawak; jadi habang ma ai hujai-hujon, paima horah bah ai hun tanoh on.

Dob ai ipaluah ma sada asas, laho mangidah atap na dob surut do bah ai hun tanoh on.

Tapi seng jumpah asas ai tangkolan ni naheini, jadi mulak ma ia hubani si Noak hubagas parau ai, ai bah ope i atas ni ganup sisik ni tanoh on. Ipadurdur si Noak ma tanganni, itangkap ma asas ai, itarik ma hubagas parau ai.

Ipaima ma pitu ari nari, dob ai ipaluah ma use asas ai hun parau ai.

Malele bod ari mulak ma asas ai hubani si Noak, anjaha tonggor ma, adong do sada bulung ni hayu jetun na ratah bani pagutni. Ibotoh si Noak ma na dob surut bah ai hun tanoh on.

Ipaima ma use pitu ari nari, dob ai ipaluah ma asas ai; tapi seng mulak be ai hu bani.

Paonomratussada-tahunkon, bani ari sada bulan sada, domma horah bah ai hun tanoh on. Iungkab si Noak ma tayub ni parau ai, gabe iidah ma na dob horah sisik ni tanoh on.

Bani ari dua puluh pitu bulan dua, horah ma tanoh ai.

Galangan Tarima Kasih ni si Noak. Bagah-bagah ni Naibata

Dob ai nini Naibata ma bani si Noak,

“Luar ma ho hun parau in, ho pakon parinangonmu, anakmu pakon parinangon ni anakmu na rap pakon ho.

Sagala binatang na rap pakon ho, sagala na manggoluh: manuk-manuk, pinahan pakon sagala binatang na manjulur, na manjulur i atas tanoh in, suruh ma kaluar rap pakon ho, ase gumayom sidea i atas tanoh in, manggargar anjaha martambah-tambah i atas tanoh in.”

Jadi luar ma si Noak rap pakon anakni, parinangonni ampa parinangon ni anakni ai.

Sagala binatang liar, sagala na manjulur, sagala manuk-manuk ampa sagala na manggulmit i atas tanoh in, marsiboan masamni, luar ma homa hun parau ai.

Dob ai ipauli si Noak ma sada anjapanjap bani Jahowa; ibuat ma humbani ganup pinahan na pan pakon humbani ganup manuk-manuk na pan , jadi igalangkon ma galangan situtungon i atas anjapanjap ai.

Dob ianggoh Naibata uap na misbou ai, nini ma ibagas uhur-Ni, “Lang be papaan-Ku tanoh in halani jolma, ai na jahat do pingkiran ni uhur ni jolma in humbani sietek-etekonni; anjaha seng be ripaskonon-Ku sagala na manggoluh, songon na dob Hubahen in.

Sadokah adong tanoh on, seng anjai maron dahon pakon pariama, ari borgoh pakon ari milas, logou ni ari pakon musim udan, arian pakon borngin.”

Titah bani Dunia Baru

Jadi ipasu-pasu Naibata ma si Noak pakon anakni ai, nini ma bani sidea, “Gargar anjaha lambin mabuei ma hanima, goki hanima ma tanoh on.

Mabiar anjaha bajoraon ma mangidah hanima sagala binatang na i tanoh on sagala manuk-manuk na i awang-awang, sagala na manjulur i atas tanoh on, ampa dengke na ibagas laut; ondos bani tangannima ma ganupan in.

Sagala na manggulmit anjaha na manggoluh, bahen sipanganonnima ma in. Ganupan in Hubere bannima sonai homa suan-suanan simaratah.

Tapi gulei, na ibagas ope hosahni, ai ma darohni, ulang pangan hanima.

Anjaha tongon do, sai tungguon-Ku do darohnima, ai ma hosahnima; sai tungguon-Ku do in humbani sagala binatang pakon humbani jolma; humbani dalahi, saninani ai tungguon-Ku hosah ni jolma in.

Barang ise na manduruskon daroh ni jolma, duruskonon ni jolma ma darohni, ai usih bani rupani do jolma in itompa Naibata.

Ia hanima, sai gargar lambin bueini ampa roh raratni ma i atas tanoh on, sai lambin gargar ma hanima ijin.”

Padan ni Naibata ampa Tanda ni Padan-Ni ai bani Jolma

Dob ai marsahap ma Naibata hubani si Noak pakon hubani anakni na rap pakonsi ai, nini ma,

“Tonggor ma, pajongjongon-Ku ma padan-Ku pakon hanima ampa ginomparnima i pudinima.

Pakon sagala na nompa na manggoluh na rap pakon hanima: manuk-manuk, pinahan pakon binatang liar na i tanoh on, na rap pakon hanima, sagala na luar hun parau in, sagala binatang na i tanoh on.

Pajongjongon-Ku ma padan-Ku pakon hanima, paboa lang be ripaskonon ni bah na sumbang sagala na mardaging, anjaha lang be masa bah na sumbang mansedahon tanoh on.”

Nini Naibata ma, “On ma tanda ni padan na Hubahen in bannima pakon hubani sagala na nompa na manggoluh, na rap pakon hanima marsundut-sundut, sadokah ni dokahni.

Halibitongan-Kai, na Hubahen bani hombun ai, ai ma tanda ni padan-Ku pakon tanoh on.

Anggo Huparoh hombun hu atas tanoh on, anjaha taridah halibitongan ai bani hombun,

jadi ingaton-Ku ma padan-Ku na hubahen bannima, pakon Hubani sagala na nompa na manggoluh, sagala na marhosah, anjaha seng be

mangulaki sumbang bah in laho manripaskon sagala na manggoluh.

Anggo dong halibitongan ai bani hombun, kawahkonon-Ku ma ai, anjaha ingaton-Ku ma padan sisadokah ni dokahni na binahen ni Naibata hubani sagala na nompa na manggoluh, sagala na marhosah, na i atas tanoh on.”

Nini Naibata ma hubani si Noak, “On ma tanda ni padan na Hubahen ai hubani sagala na manggoluh i tanoh on.”

Papa-papa pakon Pasu-pasu ni si Noak bani Anakni

Ia anak ni si Noak na luar hun parau ai, ai ma: Si Sem, si Ham pakon si Japet. Si Ham ai ma bapa ni si Kanaan.

Na tolu on do anak ni si Noak, anjaha humbani sidea do rarat jolma hu sab tanoh on.

Ipungkah si Noak ma marjuma-juma, itombei ma sada pohon anggur;

iinum ma humbani anggur ai, gabe mabuk ma ia, anjaha bal lang marhiou ibagas lampolamponi.

Iidah si Ham, bapa ni si Kanaan ma bapani na talanjang ai, jadi ipatugah ma bani saninani sidua halak ai, na i darat ai.

Dob ai ibuat si Sem pakon si Japet ma hiou, itampeihon ma ai bani abara ni sidea; jadi mardalan tundal ma sidea, laho manrungkub hatalanjangon

ni bapani sidea, bohi ni sidea pe tundal do, ase ulang iidah sidea hatalanjangon ni bapa ni sidea ai. Dob tarjolma si Noak humbani parmabukonni ai, anjaha ibotoh na binahen ni anakni sianggian ai bani,

nini ma, “Hona papa ma si Kanaan, jabolon ni jabolon ma ia bani abangni.”

Ambah ni ai nini ma, “Napuji ma Jahowa, Naibata ni si Sem, jabolonni ma anggo si Kanaan.”

Ipabolag Naibata ma ianan bani si Japet, marianan ma ia ibagas lampolampo ni si Sem; jabolonni ma anggo si Kanaan.

Manggoluh ope si Noak tolu ratus lima puluh tahun nari ipudi ni bah na sumbang ai.

Siah ratus lima puluh tahun ma ganup umur ni si Noak; dob ai matei ma ia.

Tarombo ni Bangsa-bangsa; Ginompar ni si Sem, si Ham pakon si Japet

On ma ginompar ni anak ni si Noak: Si Sem, si Ham pakon si Japet; tubuhan anak ma sidea dob salpu bah na sumbang ai.

Anak ni si Japet, ai ma si Gomar, si Magog, si Madai si Japan, si Tubal, si Mesek pakon si Tiras.

Anak ni si Gomar, ai ma si Askenas, si Rifat pakon si Togama.

Anak ni si Japan, ai ma si Elisa, si Tarsis, halak Ki m pakon halak Dodanim.

Humbani sidea do merap bangsa-bangsa na i topi laut. Ai ma anak ni si Japet mangihutkon tanoh ni sidea, sahap ni sidea pakon bangsa ni sidea.

Anak ni si Ham, ai ma si Kus, si Misraim, si Put pakon si Kanaan.

Anak ni si Kus, ai ma si Seba, si Hewila, si Sapta, si Raema pakon si Sapteka. Anak ni si Raema, ai ma si Seba, pakon si Dedan.

Itubuhkon si Kus ma si Nimrod; ia ma na parlobei halak siparkuasa i tanoh on.

Parburu na borani do ia ilobei ni Jahowa; halani ai do ase ihatahon halak, “Parburu na borani ilobei ni Jahowa songon si Nimrod.”

Ia parmulaan ni harajaonni, ai ma Babel, Erek, Akad pakon Kalne i tanoh Sinear.

Misir ma ia hun nagori ai hu Assur, ipungkah ma huta Ninive, Rehobot-Ir, Kalah,

pakon Resen i holangkolang ni Nineve pakon Kalah; ai ma huta na banggal ai.

Itubuhkon si Misraim ma halak Lud, Anam, Lehab, Na u,

Patrus, Kasluh harohan ni halak Palis m, pakon halak Kaptor.

Ia si Kanaan itubuhkon ma si Sidon, anak bunga tubuhni ai pakon si Het,

pakon halak Jebusi, Amori, Girgasi, Hewi, Arki, Sini,

Arwadi, Semari, pakon Hama ; use marserak do marga ni halak Kanaan.

Ia tanoh ni halak Kanaan, ai ma hun Sidon nari dompak Gernar das hu Gasa, dompak Sodom, Gumora, Adama pakon Zeboim das hu Lasa.

Ai ma anak ni si Ham mangihutkon marga ni sidea, sahap ni sidea, tanoh ni sidea pakon bangsa ni sidea.

Tubuhan anak ma homa si Sem, bapa ni haganup anak ni si Heber, abang ni si Japet.

Anak ni si Sem, ai ma si Elam, si Assur, si Arpaksad, si Lud pakon si Aram.

Anak ni si Aram, ai ma si Uz, si Hul, si Geter pakon si Mas.

Itubuhkon si Arpaksad ma si Sela, anjaha si Sela manubuhkon si Heber.

Tubuh ma dua anak ni si Heber; goran ni na sada si Peleg halani bani panorangni ma merap jolma, anjaha goran ni anggini si Joktan.

Itubuhkon si Joktan ma si Almodad, si Salef, si Hasarmafet, si Jirah,

si Hadoram, si Usal, si Dikla, si Hobal, si Abimael, si Seba,

si Ofir, si Hewila pakon si Joab; sidea ma ganup anak ni si Joktan.

Ia ianan ni sidea singgan Mesa do das hu Sefar, ai ma parbalogan na i hapoltakan.

Ai ma anak ni si Sem, mangihutkon marga ni sidea pakon bangsa ni sidea.

Ai ma haganup ginompar ni si Noak, mangihutkon marga ni sidea pakon bangsa ni sidea; humbani sidea ma merap sagala bangsa i tanoh on ipudi ni bah na sumbang ai.

Manara na i Babel. Pargeor ni Sahap

Samasam hinan do hata i sab tanoh on anjaha sada do parsahapan.

Sanggah na bungkas sidea hun habinsaran, jumpah sidea ma sada pamah i nagori Sinear, jadi marianan ma sidea ijai.

Nini sidea ma samah sidea, “Topa hita ma batu merah anjaha tutung hita ma dear-dear. Tanoh na nutung ai ma ipakei sidea jadi batu anjaha samasam hirtah ipakei jadi panrohat.”

Nini sidea ma, “Pungkah hita ma sada huta ampa sada menara banta, na das hu langit pakpakni anjaha bahen hita ma banta sada goran, ase ulang merap hita hu sab tanoh on.”

Jadi turun ma Jahowa laho mangidah huta ampa manara, na pinauli ni jolma ai,

dob ai nini ma, “Tonggor ma, sada bangsa anjaha sada sahap do sidea ganup. Pamungkah ni na sihol sibahenon ni sidea ope on; anjaha aha pe lang humbani na dob sinurahon ni sidea, na so tarjadihon sidea.

Eta, turun ma Hita, geori Hita ma sahap ni sidea ijai, ase ulang marsiarusan sahap be sidea.”

Sonai ma sidea ipaerap Naibata hunjai hu sab dunia on, jadi maron ma sidea na pauli huta ai.

Halani ai ibahen ma goran ni huta ai Babel, halani ijai do igeori Jahowa sahap ni ganup dunia on, hunjai ma ipaerap Jahowa sidea hu sab dunia on.

Ginompar ni si Sem

On ma ginompar ni si Sem. Dob marumur si Sem saratus tahun, itubuhkon ma si Arpaksad, dua tahun dob salpu bah na sumbang ai.

Manggoluh ope si Sem lima ratus tahun nari, dob itubuhkon si Arpaksad, anjaha itubuhkon do anak pakon boru.

Dob marumur si Arpaksad tolu puluh lima tahun, itubuhkon ma si Selah.

Manggoluh ope si Arpaksad ompat ratus tolu tahun nari dob itubuhkon si Selah, anjaha itubuhkon do anak pakon boru.

Dob marumur si Selah tolu puluh tahun, itubuhkon ma si Heber.

Manggoluh ope si Selah ompat ratus tolu tahun, dob itubuhkon si Heber, anjaha itubuhkon do anak pakon boru.

Dob marumur si Heber tolu puluh ompat tahun, itubuhkon ma si Peleg.

Manggoluh ope si Heber ompat ratus tolu puluh tahun nari dob itubuhkon si Peleg, anjaha itubuhkon do anak pakon boru.

Dob marumur si Peleg tolu puluh tahun, itubuhkon ma si Rehu.

Manggoluh ope si Peleg dua ratus siah tahun nari, dob itubuhkon si Rehu, anjaha itubuhkon do anak pakon boru.

Dob marumur tolu puluh dua tahun si Rehu, itubuhkon ma si Serug.

Manggoluh ope si Rehu dua ratus pitu tahun nari, dob itubuhkon si Serug, anjaha itubuhkon do anak pakon boru.

Dob marumur si Serug tolu puluh tahun, itubuhkon ma si Nahor.

Manggoluh ope si Serug dua ratus tahun nari, dob itubuhkon si Nahor, anjaha itubuhkon do anak pakon boru.

Dob marumur si Nahor dua puluh siah tahun, itubuhkon ma si Terah.

Manggoluh ope si Nahor saratus sapuluh siah tahun nari, dob itubuhkon si Terah, anjaha itubuhkon do anak pakon boru.

Dob marumur si Terah pitu puluh tahun, itubuhkon ma si Abram, si Nahor pakon si Haran.

On ma ginompar ni si Terah. Itubuhkon si Terah ma si Abram, si Nahor, pakon si Haran, anjaha itubuhkon si Haran ma si Lot.

Sanggah manggoluh ope bapani, matei ma si Haran i tanoh hatubuhanni, i Ur, i tanoh Kasdim.

Mambuat boru ma si Abram pakon si Nahor; goran ni parinangon ni si Abram si Sarai, goran ni parinangon ni si Nahor si Milka, boru ni si Haran, bapa ni si Milka pakon si Jiska.

Tapi lambang do si Sarai, seng dong tubuhan tuah ia.

Dob ai iarahkon si Terah ma si Abram anakni ai, pakon si Lot anak ni si Haran pahompuni ai, ampa si Sarai parumaenni ai, parinangon ni si Abram, anak ni ai, jadi bungkas ma sidea hun Ur, na i tanoh Kasdim, sihol misir hu tanoh Kanaan; das ma sidea hu Haran, lanjar marianan ijai.

Jadi dob dua ratus lima tahun umur ni si Terah, matei ma ia i Haran.

Idilo Naibata si Abram

Dob ai nini Jahowa ma hubani si Abram, “Bungkas ma ho hun tanoh hagodanganmu, humbani diha-dihamu ampa hun rumah ni bapamu hu tanoh sipatuduhon-Ku hu bam.

Hubahen pe ho gabe sada bangsa na banggal; Hupasu-pasu pe ho anjaha Hupabanggal goranmu, ase gabe pasu-pasu ho.

Pasu-pasuon-Ku do na mamasu-masu ho, anjaha papaan-Ku na mamapai ho; dapotan pasu-pasu ma marhitei ho haganup bangsa na i tanoh on.”

Jadi bungkas ma si Abram, songon na hinatahon ni Jahowa bani; bungkas ma homa si Lot rap pakonsi. Marumur pitu puluh lima tahun do si Abram, sanggah na bungkas ai ia hun Haran.

Iboan si Abram ma si Sarai parinangonni ai, pakon si Lot anak ni saninani ai, ampa sagala arta-arta na sinarini, ronsi halak na nibolini i Haran, jadi misir ma sidea hu tanoh Kanaan. Dob das sidea i tanoh Kanaan,

ibontas si Abram ma tanoh ai das hu ianan Sikem, das ronsi tombak More. Bani panorang ia domma marianan halak Kanaan i tanoh ai.

Dob ai ipatalar Jahowa ma diri-Ni bani si Abram, nini ma, “Hubani ginomparmu ma bereon-Ku tanoh on.” Jadi ipajongjong si Abram ma ijai sada anjapanjap bani Jahowa na patalar diri-Ni hu bani.

Hunjai bungkas ma ia hu pardologan hampit hapoltakan ni Betel ampa hapoltakan ni huta ai; ipauli ma ijai sada anjapanjap bani Jahowa, anjaha ipadilo-dilo ma goran ni Jahowa.

Dob ai bungkas ma use si Abram laho dompak dangsina.

Si Abram i Tanoh Masir

Masa ma lohei i tanoh ai, jadi tuad ma si Abram hu tanoh Masir, sihol manginsolat ijai, halani lohei maning ng do i tanoh ai.

Marayak das ia hu tanoh Masir, nini ma bani si Sarai parinangonni ai, “Hubotoh do, puang-puang sijenges rupa do ho.

Anggo iidah halak Masir ho, hatahonon ni sidea ma, ʻParinangonni do on,ʼ gabe bunuhon ni sidea ma ahu, tapi anggo ho pagoluhonni do.

Mahua hatahon ma, botouhu do ho, ase sonang ahu ibahen sidea halani ho, anjaha manggoluh hosahku marhalanihon ni ho.”

Dob das si Abram i tanoh Masir, iidah halak Masir ai ma, na jenges tumang do puang-puang ai.

Dob iidah gamot-gamot ni Parao ia, ipapuji-puji ma ia hubani Parao; jadi iboan ma puang-puang ai hu rumah ni Parao.

Ipadear ma pambahenni hubani si Abram, marhalanihon ni puang-puang ai, gabe dapotsi ma biribiri, lombu, halode, jabolon dalahi pakon jabolon naboru ampa unta.

Jadi ihonahon Jahowa ma sitaronon bolon hubani Parao pakon hasomanni sarumah, halani si Sarai, parinangon ni si Abram ai.

Idilo Parao ma si Abram, nini ma, “Aha do na binahenmon bangku? Mase ma lang ipatugah ho hu bangku, parinangonmu do ia hape?

Mase ma ihatahon ho, botouhu do ia? Sihol buatonku ma ia gabe parinangonku. On pe, na ma parinangonmon, buat ma, dob ai laho ma ho!”

Anjaha iparentahkon Parao ma juakjuakni bahen hasomanni pataruhkonsi ampa parinangonni ai ampa haganup na dong bani.

Parsirangan ni si Abram humbani si Lot

Jadi tangkog ma si Abram hun Masir hu tanoh Dangsina, ia pakon parinangonni, pakon ganup na adong bani, ampa si Lot rap pakonsi.

Bayak tumang do si Abram, buei do pinahan, pirak pakon omasni.

Inunu ma dalanni hun Dangsina das hu Betel, ronsi das bani ianan hajongjongan ni lampolamponi hinan, i holangkolang ni Betel pakon Ai,

hu ianan ni anjapanjap na pinaulini ai hinan ijai; ipadilo-dilo si Abram ma ijai goran ni Jahowa.

Si Lot pe homa, na dihut rap pakon si Abram, marbiribiri, marlombu ampa marlampolampo do.

Jadi lang tarsarihon tanoh ai be sidea, anggo rap marianan; ai buei tumang do arta ni sidea, seng boi be rap sidea marianan.

Halani ai masa ma paringoran i tongah-tongah ni parmahan ni si Abram ampa parmahan ni si Lot. Halak Kanaan pakon halak Perisi do ijia marianan i tanoh in.

Nini si Abram ma bani si Lot, “Ulang ma adong par nggilan i tongahmu pakon i tongah-tongahku, ai na marsanina do hita.

Ai lang i lobeimu do ganup tanoh in? Sirang ma ho humbangku! Anggo hu sambilou ho, hu siamun ahu, anggo hu siamun ho, hu sambilou ahu.”

Jadi itatap si Lot ma, iidah ma jenges do haganup parmarbah ni pamah Jordan ai. Sanggah lape iripaskon Jahowa Sodom pakon Gomora, songon pohon ni Jahowa, songon tanoh Masir do pamah ai das hu Zoar.

Ipilih si Lot ma haganup bani, haganup pamah Jordan ai; laho ma si Lot hampit Purba, jadi marsirang ma sidea.

Marianan i tanoh Kanaan do si Abram, tapi si Lot marianan do i huta-huta na i pamah ai, anjaha mosor-osor do ia marlampolampo ronsi das hu Sodom.

Tapi halak na jahat anjaha pardousa banggal do pangisi ni Sodom ai i lobei ni Jahowa.

Iparatah Naibata Bagah-bagah-Ni

Jadi nini Jahowa ma dompak si Abram dob na sirang ai si Lot humbani, “Tatap ma humbani ianan hajongjonganmin dompak utara pakon dangsina, dompak hapoltakan pakon hasundutan.

Tongon, haganup tanoh na natapmin,

berehonon-Ku do in hubam, pakon hubani ginomparmu ronsi sadokah ni dokahni.

Anjaha bahenon-Ku do ginomparmu songon orbuk ni tanoh bueini, anjaha anggo tarhira jolma orbuk ni tanoh, tarhirai ma homa ginomparmu.

Misir ma ho, siar ma tanoh in mangihutkon ganjang ampa bolagni, ai hubam do in berehonon-Ku.”

Dob ai iosor si Abram ma lampolamponi, laho ma ia marianan hu tombak Mamre na i Hebron, anjaha ipajongjong ma ijai sada anjapanjap bani Jahowa.

Hamonangan ni si Abram Mangimbang Raja-raja na hun Hapoltakan

Bani panorang sanggah si Amrapel raja ni Sinear, si Ariok raja ni Ellasar, si Kedor-Laomer raja ni Elam pakon si Tideal, raja ni bangsa-bangsa,

ipungkah sidea ma hamunsuhon hubani si Bera, raja ni Sodom, si Birsa, raja ni Gomora, si Sinab, raja ni Adama, si Semeber, raja ni Seboim, pakon hubani raja na hun Bela, ai ma Zoar.

Marsada ma sidea ganup i pamah Siddim, ai ma Laut Garam ai.

Sapuluh dua tahun dokahni tunduk sidea hubani si Kedorlaomer, tapi pasapuluhtolu-tahunkon manlawan ma sidea.

Pasapuluhompat-tahunkon roh ma si

ai, italuhon ma halak Refaim i Astarot-Karnaim, halak Susim i Ham, halak Emin i pamah Kiriataim,

pakon halak Hor, bani pardologan Seir das ronsi El-parah, na i topi ni halimisan ai.

Dob ai marhusor ma sidea, das ma sidea hu En-Mispat, ai ma Kades, italuhon ma ganup tanoh ni halak Amalek sonai halak Amori, na marianan i Haseson-Tamar.

Luar ma raja ni Sodom, raja ni Gumora, raja ni Adama, raja ni Seboim pakon raja ni Bela, ai ma Zoar, marsada ma sidea marmunsuh i pamah Siddim,

dompak si Kedorlaomer, raja ni Elam, si Tideal raja ni bangsa-bangsa ai, si Amrapel raja ni Sinear, pakon si Ariok, raja ni Ellasar, ompat raja imbang ni na lima ai.

Buei tumang do unong-unong aspal i pamah Siddim ai. Sanggah na maporus raja ni Sodom pakon Gumora mardabuhan ma sidea hu bagas, anjaha sagala na tading lintun ma hu dolog.

Ibuat sidea ma ganup ugas-ugas ni Sodom pakon Gumora ampa haganup sipanganon ni sidea, dob ai laho ma sidea.

Iboan sidea ma pakon si Lot, anak ni sanina ni si Abram, na marianan i Sodom ronsi ugas-ugasni, jadi laho ma sidea.

Ipaluah si Abram si Lot

Dob ai roh ma sada halak na maporus ai, ipatugah ma na masa ai hubani si Abram, halak Heber ai, na marianan i tombak Mamre, ai ma halak Amori ai, sanina ni si Eskol pakon si Aner; hasoman sapadan ni si Abram do sidea.

Dob ibogei si Abram barita ai, na dob tartaban anakni ai, iparsinjatai ma jabolonni na dob bajar ai, sagala na tubuh i rumahni, tolu ratus sapuluh ualuh halak bueini, anjaha iayak ma munsuh ai das hu Dan.

Jadi bodari marbagi ma sidea, ia pakon jabolonni ai, mandorab munsuh ai; italuhon ma sidea, anjaha ipardakdak das hu Hoba, na i Utara ni Damaskus.

Iboan ma mulak haganup ugas-ugas ai; si Lot pe, anak ni saninani ai, ampa haganup ugas-ugasni iboan do mulak, sonai homa puang-puang ampa bangsa ai.

Ipasu-pasu si Melkisedek si Abram

Dob mulak si Abram humbani na manaluhon si Kedorlaomer pakon raja-raja hasomanni ai, jadi laho ma raja ni Sodom mangalo-alosi hu pamah Sawe, ai ma pamah raja ai.

Anjaha si Melkisedek pe raja ni Salem luar do mamboan ru pakon anggur; malim ni Naibata sigijangan ai do ia.

Ipasu-pasu ma si Abram, nini ma, “Ipasu-pasu Naibata Sigijangan in, Sitompa langit ampa tanoh on ma si Abram.

Anjaha na puji ma Naibata Sigijangan in, na mangondoskon munsuhmu hu tanganmu.” Jadi ibere si Abram ma bani saparsapuluh humbani haganup.

Nini raja Sodom ai ma hubani si Abram, “Bere ma hu bangku halak in, tapi anggo ugas-ugas in buat ma bam.”

Tapi nini si Abram ma hubani raja ni Sodom, “Domma pala marbija ahu hubani Jahowa, Naibata Sigijangan in, Sitompa langit pakon tanoh on,

na so buatonku atap aha pe humbani sagala na dong bamu, sangkamata bonang atap sada tali sipatu pe lang, ase ulang ihatahon ham holi, ʻAhu do mambahen si Abram bayak.ʼ

Anggo ahu, aha pe lang pala. Pitah na dob pinangan ni garama-garama on ma, ambah ni ai parbagianan bani si Aner, si Eskol pakon si Mamre, na mangkasomani ahu, palopas ham ma sidea mambuat bagianni bei.”

Ibagah-bagahkon Naibata Anak bani si Abram -- Haporsayaon ni si Abram

Ipudi ni na masa on, roh ma hata ni Jahowa hubani si Abram ibagas sada panonggoran,

nini ma, “Ulang ho mabiar, ale Abram, Ahu do gantarmu; banggal tumang do upahmu.”

Tapi nini si Abram ma, “Ham Tuhan Jahowa, aha ma bereon-Mu bangku, ai na popor do ahu, si Elieser, na hun Damaskus mando sitean rumahku.”

Nini si Abram ope, “Seng dong ginompar ibere Ham bangku; jabolon na tubuh i rumahku ma sitean ahu.”

Dob ai roh ma hata ni Jahowa hu bani, “Seng ia manean ho, tapi anakmu sandiri do manean ho.”

Iboan ma ia hu darat, anjaha nini ma, “Torih ma hu langit ai, bilangi ma bintang ai, atap tarbilangi ho do ai.” Ihatahon ma use hu bani, “Sonai ma ginomparmu holi.”

Porsaya ma si Abram bani Jahowa, anjaha ai ma ihira Jahowa gabe hapintoronni.

Padan ni Naibata ampa si Abram

Ihatahon ma hu bani, “Ahu do Jahowa na padaratkon ho hun Ur-Kasdim, laho mamberehon tanoh on bam jadi siteanonmu.”

Nini si Abram ma, “Ham Tuhan Jahowa, hunja ma botohonku, ahu sihol sitean ai?”

Nini ma hu bani, “Buat ma Bangku sada lombu na marumur tolu tahun, sada hambing na marumur tolu tahun, sada biribiri tunggal na marumur tolu tahun, sada kuhui pakon sada anak ni asas.”

Ibuat ma ganupan ai bani Tuhan, ipardostongah ma ai anjaha ibatur, tapi anggo manuk-manuk ai seng ibolah.

Marsogopan ma manuk-manuk panoroh hubani gulei na ginalangkon ai, jadi iosiki si Abram ma ai.

Sanggah na laho sundut mata ni ari, tarpodom ma si Abram, sinok tumang, jadi sogop ma bani hasonggotan pakon hagolapon bolon.

Dob ai nini Jahowa ma hubani si Abram, “Ulang lang ibotoh ho manginsolat do magira ginomparmu bani na so tanohni; parjabolonon anjaha arsikon ni halak ma sidea ompat ratus tahun dokahni.

Tapi bangsa na marjabolonkon sidea pe uhumon-Ku do, dob ai kaluar ma sidea mararta na mabuei.

Anggo ho parayakonmu ma ompungmu mardamei-damei, dob sayurmatua pe ho tanomon.”

Paompat sundutkon mulak ma sidea, ai lang ope gok hajahaton ni halak Amori.

Dob sundut mata ni ari anjaha golap marimpot-impot, tonggor ma sada pamurunan na mar mus ampa sada sipu-sipu na gara montas i holangkolang ni gulei na noktokan ai.

Bani ari ai ma marpadan Jahowa pakon si Abram, nini ma, “Hubani ginomparmu do bereon-Ku tanoh on, singgan ni bah Masir das ronsi bah bolon ai, ai ma bah Eprat,

tanoh na niianan ni halak Keni, halak Kenisi pakon halak Kadmoni,

halak Het, halak Peresi, halak Refaim,

halak Amori, halak Kanaani, halak Girgasi pakon halak Jebusi.”

Si Hagar pakon si Ismael

Ia si Sarai, parinangon ni si Abram, seng dong tubuhan tuah. Tapi dong do sada jabolonni naboru, halak Masir, na margoran si Hagar.

Nini si Sarai ma hubani si Abram, “Ibotoh ham do, ilanglangi Jahowa do tubuhan tuah ahu; dear do parayakonmu jabolonkai, andohar dapotan tuah ahu humbani.” Itangihon si Abram ma hata ni si Sarai ai.

Jadi ibuat si Sarai, parinangon ni si Abram ai ma si Hagar, jabolonni boru Masir ai, ibere ma ia hubani si Abram, paramangonni ai, ai ma dob marianan si Abram i tanoh Kanaan sapuluh tahun dokahni.

Iparayak si Abram ma si Hagar, jadi boratan rumah ma ia. Dob iahapkon domma boratan rumah ia, pis ma matani mangidah si Sarai.

Nini si Sarai ma hubani si Abram, “Marsapata hu bamu do ahu; hubere do jabolonku hu bamu, hape dob ibotoh na dob boratan rumah ia, gabe pis matani mangidah ahu; Jahowa ma panguhum banta.”

Nini si Abram ma hubani si Sarai, “Gok bam ma jabolonmin, bahen ma rosuh ni uhurmu hu bani.” Jadi iarsik si Sarai ma jabolonni ai, gabe laho ma ia lintun hun lobeini.

Parlintun pakon Parmulak ni si Hagar. Partubuh ni si Ismael

Tapi jumpah malekat ni Jahowa ma ia i lambung ni sada bah tubuh i halimisan, ai ma i lambung ni bah tubuh bani dalan laho hu Sur.

Nini ma, “Roh hunja anjaha laho huja do ho Hagar, jabolon ni si Sarai?” Balosni, “Na lintun do ahu hun lobei ni si Sarai tondokankin.”

Nini malekat ni Jahowa ma hu bani, “Mulak ma ho hubani tondokanmai, paunduk ma dirimu hu toruh ni kuasani!”

Ambah ni ai nini malekat ni Jahowa ma hu bani, “Buei tumang do bahenonku ginomparmu, gabe seng tarhira halani bueini.”

Nini malekat ni Jahowa ma use hu bani, “Tonggor ma, domma boratan rumah ho, tubuhan anak ma ho, bahen ma goranni si Ismael, ai itangihon Jahowa do hasombuhonmu.

Sada jolma na songon halode liar do ia magira. Tanganni mangimbang ganup jolma, anjaha tangan ni ganup jolma mangimbangsi, anjaha marianan ma ia patontang ampa haganup saninani.”

Jadi ibahen si Hagar ma goran ni Jahowa na mansahapkonsi ai, “Ham do Naibata Sipanatap.” Ai nini do: Tongon, ijon do huidah Ia, si Tatap ahu.

Halani ai igoran ma parigi ai: Parigi Lachai-Roi, ai ma na i holangkolang ni Kades pakon Bered.

Dob ai itubuhkon si Hagar ma sada anak bani si Abram, jadi ibahen si Abram ma goran ni anakni, na

nubuhkon ni si Hagar ai, si Ismael.

Marumur ualuh puluh onom tahun do si Abram, sanggah na nubuhkon ni si Hagar si Ismael bani.

Parmubah ni Goran ni si Abram Jadi si Abraham

Jadi dob marumur si Abram siah puluh siah tahun, ipatalar Jahowa ma diri-Ni hu bani, nini ma hu bani, “Ahu do Naibata pargogoh na so tarimbang, sai mardalan i lobei-Hu ma ho, anjaha daulat ma uhurmu.

Patotapon-Ku ma padan-Ku pakon ho anjaha bahenon-Ku ma ho manggargar tumang.”

Jadi manrogop ma si Abram, anjaha marsahap ma Naibata hu bani, nini ma,

“Anggo Ahu, tonggor ma, on do padan-Ku pakon ho: Paboa bapa ni buei bangsa ma ho.

Seng be si Abram goranmu, tapi si Abraham ma, ai domma Hupabangkit ho gabe bapa ni buei bangsa. Bahenon-Ku do ho manggompari tumang, pabangkiton-Ku do ho gabe ompung parsadaan

ni buei bangsa, anjaha humbam do harohan ni raja-raja.

Patotapon-Ku do padan-Ku pakon ho pakon hubani ginomparmu marsundut-sundut, ai ma padan sisadokah ni dokahni, paboa Ahu do Naibatamu pakon Naibata ni ginomparmu.

Anjaha bereon-Ku do hubani ginomparmu magira tanoh panginsolatanmu, ai ma ganup tanoh Kanaan bahen rupeimu sadokah ni dokahni, anjaha Ahu ma gabe Naibata bani sidea.”

Ambah ni ai nini Naibata ma hubani si Abraham, “Ho pe, sai jolom ma padan-Kin, ho pakon ginomparmu marsundut-sundut.”

Parsunaton Tanda ni Padan

On do padan-Kin sidingatonnima, na Hubahen hubam pakon hubani ginomparmu, “Maningon sunaton do sagala dalahi na i tongah-tongahnima.

Maningon sunatonnima do sibur-siburnima bahen tanda ni padan-Ku pakon hanima.

Ganup anak dalahi maningon do sunaton anggo marumur ualuh ari, ai ma sagala dalahi humbani ginomparnima, age jabolon na tubuh i rumahmu atap na binoli ni duit humbani halak na legan, na so humbani ginomparmu.

Maningon sunaton do ai, na tubuh i rumahmu pakon na binoli ni duitmu. Ai ma padan-Ku bani angkulanima, padan sisadokah ni dokahni.

Tapi dalahi na so isunat, na so binuat sibur-siburni, maningon ripaskonon do ia humbani bangsani, halani iosei padan-Ku.”

Parmubah ni Goran ni si Sarai

Dob ai ihatahon Naibata ma use hubani si Abraham, “Seng be si Sarai diloon goran ni parinangonmu, si Sarah ma goranni.

Ai pasu-pasuon-Ku do ia, anjaha bereon-Ku ma homa bam sada anak humbani; pasu-pasuon-Ku ma ia, ase gabe inang ni bangsa-bangsa ia, anjaha marharorohan humbani do magira raja ni bangsa-bangsa.”

Jadi manrogop ma si Abraham anjaha tartawa, nini ma ibagas uhurni, “Mintor tubuhan anak ma jolma sisaratus tahun, anjaha tubuhan tuah ma tumaram si Sarah na dob marumur siah puluh tahun?”

Nini si Abraham ma hubani Naibata, “Sai manggoluh ma si Ismael i lobeimu!”

Jadi nini Naibata ma, “Tongon do, maningon tubuhkonon ni si Sarah, parinangonmu do bam sada anak, anjaha bahen ma goranni si Isak. Pajongjongon-Ku do padan-Ku pakonsi, padan sisadokah ni dokahni, ampa bani ginomparni i pudini.

Pasal si Ismael pe, Hutangihon do ho. Tonggor ma, pasu-pasuon-Ku do ia, tumpakon-Ku do ia

gabe anjaha buei tumang. Sapuluh dua raja do tubuhkononni, anjaha gabe bangsa na banggal do ia bahenon-Ku.

Tapi pajongjongon-Ku do padan-Ku pakon si Isak, ai ma na itubuhkon si Sarah bam, songon on tahun in.”

Jadi dobkonsi parsahapan ni Naibata pakonsi, manaik ma Ia humbani si Abraham.

Parsunaton

Dob ai ibuat si Abraham ma si Ismael anakni ai, ampa ganup anak na dob tubuh i rumahni, sonai homa ganup halak na binoli ni duitni, ai ma sagala dalahi pangisi ni rumahni, jadi isunat ma sibur-sibur ni sidea bani na sadari ai, songon na hinatahon ni Naibata hu bani.

Marumur siah puluh siah tahun do si Abraham, sanggah na tarsunat ai ia.

Anjaha si Ismael anak ni ai, marumur sapuluh tolu tahun ma sanggah na isunat sibur-siburni ai.

Lanjar bani ari na sasada ai do tarsunat si Abraham pakon si Ismael anakni ai,

ampa haganup dalahi pangisi ni rumahni ai, na dob tubuh i rumahni pakon na binoli ni duit humbani halak na legan; tarsunat do sidea rap pakonsi.

Partamueion ni si Abraham

Dob ai ipataridahkon Jahowa ma diri-Ni bani i tombak More, sanggah hundul ia bani labah ni lampolamponi, bani pardeteng ni ari.

Mangkawah ma ia, gabe ididah ma tolu halak jongjong i lobeini; dob iidah sidea marlintun ma ia humbani labah ni lampolampo ai, manjumpahkon sidea lanjar manrogop ma ia.

Nini ma, “Ham Tuhanku, anggo dapotan idop ni uhur do ahu i lobeimu, sai ulang ma laosi ham jabolonmu on.

Mahua ma nabuat bah o k, ase iburihi nasiam nahei nasiam, dob ai marsaran ma nasiam i toruh ni hayu on,

ase hualop ro o k, gabe margogoh nasiam use; dob ai toruskon nasiam ma pardalanan nasiam. Ai lang halani in do ase roh nasiam hubani jabolon nasiam on?” Ihatahon sidea ma, “Bahen ma songon na hinatahonmin!”

Dob ai tarolos ma si Abraham laho hu lampolamponi, hubani si Sarah, nini ma, “Buat ma podas tolu tumba nitak, agu ma ai anjaha masak ma ru !”

Marlintun ma si Abraham marayak lombuni, ibuat ma sada anak ni lombu na mombur anjaha na jenges ibere ma ai hubani jabolonni, jadi podas ma ai ipauli sidea.

Ibuat si Abraham ma dadih na nialhotan pakon dadih na matah sonai homa anak ni lombu na dob pinauli ai, jadi iidangkon ma ai i lobei ni sidea; jongjong do anggo ia i lambung ni sidea, i toruh ni hayu ai, sanggah na mangan ai sidea.

Dob ai nini sidea ma hu bani, “Ija do si Sarah parinangonmu ai?” Balosni, “Ibagas lampolampo an do ia.”

Jadi nini ma, “Roh do use Ahu marayak ho sonon tahun in; jadi adong ma sada anak bani si Sarah parinangonmin.” Dihut do si Sarah mambogei ai humbani labah ni lampolampo na i pudini ai.

Tapi domma sayur matua ia si Abraham pakon si Sarah, domma pala maron bani si Sarah hasomalan ni puang-puang hinan.

Jadi tartawa ma si Sarah ibagas uhurni, nini ma, “Dob matua pe ahu hape, ase dong bangku sipamalas uhur. Tuanku pe homa domma matua.”

Jadi nini Jahowa ma hubani si Abraham, “Mase ma tartawa si Sarah anjaha marsahap, ʻTongon do nani tubuhan anak ahu, dob matua ahu?ʼ

Adong do gatni na so tarpajadi Jahowa? Sonon tahun in, mulak ma Ahu marayak ho, jadi adong ma anak bani si Sarah.”

Nini si Sarah ma mamorsou, “Seng tartawa ahu!” Ai mabiar do ia. Tapi nini Jahowa ma, “Lang, tongon do ho tartawa.”

Pangapi ni si Abraham bani Huta Sodom

Dob ai misir ma hunjai dalahi-dalahi ai, laho dompak Sodom; dihut do si Abraham laho manaruhkon sidea.

Jadi nini Jahowa ma, “Tor ponopkonon-Ku ma hubani si Abraham na sihol bahenon-Ku?

Ai lang si Abraham do gabe bangsa na banggal anjaha na sangap, anjaha marhiteihonsi dapotan pasu-pasu sagala bangsa na i tanoh on?

Ai Ahu do mamilihsi, ase itonahkon hubani anakni pakon hubani ginomparni i pudini, ase totap sidea mangirikkon dalan ni Jahowa, ase ihorjahon hapintoron pakon uhum, ase ipasaud Jahowa hubani si Abraham, na dob hinatahonni bani.”

Jadi nini Jahowa ma, “Banggal tumang do doruh-doruh dompak Sodom pakon Gumora anjaha borat tumang do dousa ni sidea.

Susur do Ahu ase huidah atap na tongon do ganup na hinorjahon ni sidea ai, romban hubani doruh-doruh na das ai hu Bangku, atap lang, sihol do botohon-Ku ai.”

Dob ai manirpang ma hunjai dalahi na dua ai, laho ma sidea dompak Sodom; tapi anggo si Abraham jongjong ope i lobei ni Jahowa.

Ipadohor si Abraham ma, nini ma, “Mintor ripaskononmu ma parpintor rap pakon parjahat?

Anggo dong lima puluh halak parpintor ibagas huta ai, mintor ripaskononmu do ai, lang hargaanmu do huta ai halani silima puluh parpintor, na ibagas ai?

Daoh ma in humbamu, mambahen sisonin, mamunuh parpintor rap pakon parjahat, gabe doskon halak parjahat halak parpintor! Daoh ma in humbamu. Mintor lang ma pintor Panguhum, siuhumi ganup dunia on?”

Jadi nini Jahowa ma, “Anggo jumpah Ahu ibagas huta Sodom lima puluh halak parpintor, sai hargaan-Ku do na sanagori ai halani sidea.”

Ibalosi si Abraham ma, nini ma, “Tonggor Ham ma, domma hubaranihon marsahap hubani Tuhanku age pe orbuk ampa abuan ahu.

Ra hurang do lima halak humbani si lima puluh ai parpintor; mintor ripaskonon-Mu ma ganup huta ai halani na lima ai?” Nini ma, “Lang ripaskonon-Ku ai anggo adong do jumpah Ahu ijai ompat puluh lima halak.”

Dob ai iulaki si Abraham ope use mangkatahon hatani hu bani, nini ma, “Ra ompat puluh halak hansa jumpah ijai.” Nini ma, “Lang kahuaon-Ku sidea halani na ompat puluh halak ai.”

Nini si Abraham ma, “Ulang ma manringis Tuhan, halani hununut marsahap. Ra pitah tolu puluh halak hansa jumpah ijai.” Nini ma, “Lang kahuaon-Ku sidea anggo dapot Ahu tolu puluh halak ijai.”

Nini ma, “Tonggor ma, domma hubaranihon marsahap hubani Tuhanku; ra pitah dua puluh halak hansa dapot ijai.” Nini ma, “Lang ripaskonon-Ku sidea halani na dua puluh halak ai.”

Ulang Ham manringis Tuhan halani marsahap ope ahu pitah sahali nari. Ra pitah sapuluh halak hansa jumpah ijai. Nini ma, “Lang ripaskonon-Ku sidea halani na sapuluh halak ai.”

Jadi laho ma Jahowa, dob salpu Ia marsahap pakon si Abraham; mulak ma homa si Abraham hu iananni.

Hajahaton ni Halak Sodom

Jadi das ma malekat na dua ai hu Sodom bodarini ai; ia si Lot hundul-hundul do i horbangan ni Sodom ai. Dob iidah si Lot sidea, jongjong ma ia mangalo-alo sidea, lanjar manrogop, nini ma, “Mahua tului ma nasiam tuanku hu rumah ni jabolon nasiam on; marborngin ma nasiam anjaha burihi nasiam ma nahei nasiam, patar pe toruskon nasiam pardalanan nasiam.” Tapi nini sidea ma, “Lang, marborngin i alaman on ma hanami.”

Tapi sai ielek-elek si Lot ma sidea; jadi tului ma sidea hu bani, imasuki ma rumahni. Dob ai ipauli ma sipanganon bani sidea, imasak ma ru na so niigaran, jadi mangan ma sidea.

Tapi marayak modom sidea, domma iinggo dalahi-dalahi ni huta ai, halak Sodom ai rumahni, na maposo ampa na matua, haganup halak parhuta ai, sada pe lang na tading.

Dilo-dilo do sidea hubani si Lot, “Ija do dalahi in, na tondok bam saborngin on? Arahkon sidea hu bennami, ase itandai hanami sidea!”

Laho ma si Lot hu darat marayak sidea hu lobei ni labah, tapi itutup do labah ai i pudini,

nini ma, “Nasiam saninangku, ulang ma bahen nasiam na jahat!

Tonggor ma, adong do dua borungku, na so haliaban ope, sidea ma huboban hu darat hubani nasiam; bahen nasiam ma hubani sidea harosuh ni uhur nasiam, asal ma ulang ibahen nasiam atap aha hubani halak on, ai na roh do sidea marlinggom hu rumahku.”

Jadi nini sidea ma, “Laho ma ho!” Nini sidea ope, “Sahalaksi do roh manginsolat hujon, gabe ia sihol manguhumi? On pe parahan do bahenonnami bam, ase bani sidea!” Jadi ionjar sidea ma dalahi ai, ai ma si Lot, ipadohor sidea ma, sihol parseda labah ai.

Jadi isurdukkon halak ai ma tanganni, itarik ma si Lot masuk hu rumah, lanjar itutup ma labah ai.

Ipapitung sidea ma mata ni halak na i lobei ni labah ai, dakdanak ampa na magodang, gabe soya ma halojaon ni sidea ai, mangindahi labah ai.

Maluah si Lot

Jadi nini halak ai ma hubani si Lot, “Ise ope ijon sindohormu? Hela, anak atap borumu, ampa na dohor bam i huta on, arahkon ma sidea kaluar hun ianan on.

Ai sihol ripaskononnami ma huta on, halani banggal ni doruh-doruh dompak sidea ilobei ni Jahowa, halani ai do ase isuruh Jahowa hanami manripaskon huta on.”

Laho ma si Lot marsahapkon sonduk helani sidua halak ai, na sihol mambuat boruni ai, nini ma, “Misir ma hun huta on, ai ripaskononni Jahowa ma huta on.” Tapi na marhuria-huria do ia, ninuhur ni sonduk helani ai.

Sanggah na marlangat-langat ari, ijuljul malekat ai ma si Lot, nini ma, “Jongjong ma, boan ma parinangonmu pakon borumu sidua halak in, na adong ijon, ase ulang dihut ho rasei halani hajahaton ni huta on.”

Halani ipadokah-dokah, itangkap na dua halak ai ma tanganni pakon tangan ni parinangon pakon tangan ni boruni na dua ai, halani sihol paluahon ni Jahowa do ia; iarahkon sidea ma ia anjaha ipasaran i darat ni huta ai.

Dob das hudarat sidea itogu, marsahap ma sahalak, “Paluah dirimu! Ulang kawahkon dompak

pudi, ulang ho marsaran barang ija pe i pamah on, hu dolog ma ho maporus, ase ulang bois ho.”

Nini si Lot ma hubani sidea, “Ulang ma sonai, Tuannami!

Tonggor ma, domma pala dapotan idop ni uhur jabolonmu on i lobeimu, anjaha domma ipatuduh ham bangku halayakon banggal marhitei na ipagoluh ham hosahku. Tapi seng tarbahen ahu maporus hu dolog an, ra tarayak hamagouan ai do ahu, gabe matei ahu holi.

Tonggor ma, dohor do huta ai, boi do hujai ahu maporus, etek do homa huta ai. Mahua hujai ma ahu lintun. Ai lang etek do huta ai? Anggo sonai manggoluh ma ahu.”

Jadi nini ma mambalosi, “Dear, pasal on pe tatapon-Ku do. Seng parsedaon-Ku be huta na hinatahonmai.

Ne ma, papodas ma lintun hujai, ai seng tarbahen Ahu mambahen atap aha pe, paima das ho hujai.” Ai do halani ase Zoar huta ai igoran halak.

Domma pala poltak mata ni ari i tanoh on, sanggah na das ai si Lot i Zoar.

Parseda ni Huta Sodom

Dob ai iparoh Jahowa ma udan hirtah pakon apuy hu Sodom pakon Gumora, ai ma humbani Jahowa, hun nagori atas.

Iboiskon ma huta-huta ampa haganup pamah ai, ronsi haganup pangisi ni huta-huta ai, ampa suan-suanan na i tanoh ai.

Tapi mangkawah ma parinangon ni si Lot, na mardalan i pudini ai, dompak pudi, gabe salih ma ia gabe batu garam.

Misir ma si Abraham sogod patarni ai hubani ianan hajongjonganni hinan i lobei ni Jahowa.

Dob ai itatap ma dompak Sodom pakon Gumora pakon haganup tanoh na i pamah ai; jadi iidah ma mar mpul mus hun tanoh ai, songon mus ni pamurunan.

Sanggah na laho manraseihon huta-huta na i pamah ai Naibata, idingat Naibata ma si Abraham, jadi iarahkon ma si Lot hun tongah-tongah ni halonglongan ai sanggah na ilonglongkon huta na niiankon ni si Lot hinan.

Dousa ni Boru ni si Lot

Dob ai tangkog ma si Lot hun Zoar, jadi marianan ma ia rap pakon boruni na dua ai i dolog, halani mabiar do ia tading i Zoar, gabe iiankon ma sada liang, ia rap pakon boruni na dua ai.

Dob ai nini sikahanan ai ma dompak sianggian ai, “Domma matua bapanta, anjaha seng dong be dalahi i tanoh on na roh hubanta, songon hasomalan i sab dunia on.

Bere hita ma minum anggur bapanta, anjaha hasomani hita ma ia modom, ase pagoluh hita ginompar humbani bapanta.”

Jadi ipainumkon sidea ma anggur hubani bapa ni sidea ai bani na saborngin ai. Dob ai laho ma sikahanan ai mangkasomani bapani ai modom; lang ibotoh bapani ai sandihari boruni ai modom anjaha sadihari puho.

Patar ni ai nini sikahanan ai ma bani sianggian ai, “Tonggor ma, domma huhasomani na bodari bapa modom. Bere hita ma homa borngin on anggur inumonni, ase laho ho mangkasomanisi modom, ase pagoluh hita ginompar humbani bapanta.”

Jadi ibere sidea ma bani na saborngin ai anggur inumon ni bapa ni sidea ai. Jadi laho ma sianggian ai mangkasomanisi modom, anjaha lang ibotoh sadihari boru ni ai modom anjaha sadihari puho.

Jadi boratan rumah ma boru ni si Lot ai haduasi humbani bapa ni sidea ai.

Dob ai itubuhkon sikahanan ai ma anak sada, ibahen ma goranni si Moab; ia do ompung ni halak Moab ronsi sadari on.

Dihut do sianggian ai manubuhkon sada anak, ibahen do goranni si Ben-Ammi; ia do ompung ni halak Amon ronsi sadari on.

Si Abraham pakon si Abimelek Raja ni Gerar

Dob ai bungkas ma si Abraham hunjai hu tanoh dangsina, laho marianan i holangkolang ni Kades pakon Sur, gabe manginsolat ma ia i Gerar.

Jadi nini si Abraham ma pasal si Sarah parinangonni ai, “Botouhu do ia.” Jadi isuruh si Abimelek, raja ni Gerar ai ma na mangalop si Sarah. Tapi roh ma Naibata ibagas nipi hubani si Abimelek borngin ni ai, nini ma hu bani, “Marutang hosah ma ho, halani puang-puang na binuatmin, ai na dob marpuang do ia.”

Tapi seng ongga ope dohor si Abimelek hu bani, jadi nini ma, “Ham Tuhan, mintor bunuhonmu ma bangsa na pintor?

Ai lang ia do mangkatahon bangku, ʻBotouhu do ia?ʼ Puang-puang in pe ihatahon do, ʻBotouhu do ia.ʼ Ase ia hubahen pe sonin, halani bonar ni uhurhu pakon borsih ni tanganku do.

Dob ai nini Naibata ma hubani ibagas nipi, “Ahu pe, Hubotoh do humbani bonar ni uhurmu do ibahen ho sonin, mambahen hulanglangi ho mardousa dompak Ahu; halani ai do ase lang Hulopas ho manjamahsi.

Sonari pe paulak ma parinangon ni halak ai, ai nabi do ia; tonggohononni do ho ase manggoluh ho. Tapi

anggo seng ipaulak ho, botoh ma, sai matei do ho pakon ganup na rapkon ho.”

Jadi girah ma puho si Abimelek patarni ai, idilo ma ganup juakjuakni, ipajojor ma ganup hata ondi bani sidea, jadi mabiar tumang ma sidea.

Dob ai idilo si Abimelek ma si Abraham, nini ma hu bani, “Aha do na binahenmu bennami, anjaha aha do dousangku hubam, mambahen iparoh ho dousa bolon hu bangku pakon hubani harajaonku? Pambahenan na so malo bahenon, ai do ibahen ho hu bangku.”

Ambah ni ai nini si Abimelek ma use hubani si Abraham, “Aha do na niidahmu, ase ibahen ho sonin?”

Jadi nini si Abraham ma, “Nini uhurhu, ra seng dong na mangkabiari Naibata bani ianan on, tontu bunuhon ni sidea ma ahu halani parinangonku.

Anjaha botul botouhu do tongon ia, boru ni bapa, tapi lang nubuhkon ni inang, ase boi do parinangonku ia.

Tapi dob ihatahon Naibata ahu bungkas hun rumah ni bapa, jadi huhatahon ma hu bani, ʻOn ma tanda ni holong ni uhurmu, sibahenonmu hu bangku, atap huja pe hita das,ʼ hatahon ma pasal ahu, “Botouhu do ia.”

Jadi ibuat si Abimelek ma biribiri pakon lombu, jabolon dalahi pakon jabolon naboru, ibere ma

ai bani si Abraham; ipaulak ma hubani si Sarah, parinangonni ai.

Dob ai nini si Abimelek ma, “Tonggor ma, tanohku na i lobeimin; iankon ma ija rosuh ni uhurmu!”

Tapi bani si Sarah nini do, “Tonggor ma, domma hubere bani botoumu saribu pirak, bahen pardearan bam pakon hubani ganup na rapkon ho, ase pintor ho i lobei ni ganup halak.”

Dob ai martonggo ma si Abraham hubani Naibata. Jadi ipamalum Naibata ma si Abimelek, parinangon ampa jabolonni puang-puang, gabe tubuhan tuah ma sidea.

Ai domma itutup Naibata ganup parnaibataan na i rumah ni si Abimelek, halani si Sarah parinangon ni si Abraham ai.

Partubuh ni si Isak

Dob ai itatap Jahowa ma si Sarah, songon na hinatahon-Ni ai, anjaha ibahen Jahowa ma hubani songon na pinarbagah-bagah-Ni ai.

Ai boratan rumah ma si Sarah, anjaha itubuhkon ma sada anak bani si Abraham, bani panorang hatuaonni, domu hubani panorang na dob hinatahon ni Naibata hu bani.

Dob ai ibahen si Abraham ma goran ni anakni, na tubuh bani, humbani si Sarah ai, si Isak.

Jadi isunat si Abraham ma si Isak, anakni ai, bani ari paualuhkon, songon na nonahkon ni Naibata hu bani.

Marumur saratus tahun do si Abraham, bani partubuh ni si Isak, anak ni ai.

Jadi nini si Sarah ma, “Domma ibahen Naibata tartawa ahu; ganup na mambogei, tartawa ma halani ahu.”

Ambah ni ai ihatahon do, “Ise ma adong hinan na mangkatahon bani si Abraham, pabagodkon anak si Sarah? Hutubuhkon do anak sada bani, sanggah panorang hatuaonni.”

Dob ai lambin banggal ma dakdanak ai, anjaha sirang minum; jadi marpesta banggal ma si Abraham, bani ari na sirang minum ai si Isak.

Dob ai iidah si Sarah ma mangapasi anak ni si Hagar, boru Masir ai, na nubuhkonni bani si Abraham.

Jadi nini ma hubani si Abraham, “Usir ma boru jabolon ai rap pakon anakni ai, halani lang boi rap panean anak ni boru jabolon ai rap pakon si Isak anakkin.”

Tapi sogam tumang do uhur ni si Abraham pasal hata ai, halani anakni ai.

Tapi nini Naibata ma dompak si Abraham, “Ulang sogam uhurmu pasal dakdanak in pakon jabolonmin. Tangihon ma ganup na hinatahon ni si

Sarah bam, pitah marhitei si Isak do targoran bam ginompar.

Sonai homa anak ni jabolonmin, bahenon-Ku do gabe sada bangsa, halani ginomparmu do ia.”

Jadi ipagirah si Abraham ma patarni ai puho, ibuat ma ru pakon bah satatabu, ibere ma ai bani si Hagar, ipahadangkon ma ai bani abarani ampa bani dakdanak ai, dob ai ipaingkat ma ia pakon dakdanak ai. Laho ma ia, hape kahou ma ia i halimisan Berseba.

Jadi dob bois bah na i tatabu ai, i balhon ma dakdanak ai hu toruh ni sada hayu na etek-etek,

anjaha laho ma ia, hundul mandaoh-daoh hunjai, patontang hira-hira sampanah daohni, ai nini, “Seng tarpaidah-idah ahu dakdanak in laho matei.” Jadi hundul ma ia patontang hunjai, ipagogoh ma sorani anjaha tangis.

Jadi itangihon Naibata ma sora ni dakdanak ai, anjaha dilo-dilo ma malekat ni Naibata hun nagori atas hubani si Hagar, nini ma, “Mahua ho Hagar? Ulang ma ho mabiar, ai domma itangihon Naibata sora ni dakdanak ai humbani ha balan ni ai.

Jongjong ma ho, angkat ma dakdanak ai anjaha abing ma, ai bahenonku do ia gabe sada bangsa na banggal.”

Dob ai iungkab Naibata ma mata ni si Hagar, gabe iidah ma sada bah tubuh. Laho ma ia mannahi bah

hubagas tatabuni ai, anjaha ipainum ma dakdanak ai.

Anjaha ihasomani Naibata do dakdanak ai, jadi lambin magodang ma ia; i halimisan do ia marianan, anjaha iguruhon do pamanahon.

Jadi marianan ma ia i halimisan Paran, anjaha ibuat inangni ma bani sada boru Masir bahen parinangonni.

Parpadanan ni si Abraham pakon si Abimelek

Dob ai roh ma ijia hata ni si Abimelek pakon si Pihol, puanglima ni balani hubani si Abraham, nini ma, “Sai ihasomani Naibata do ho bani haganup horjamu.

On pe, bijahon ma bangku i lobei ni Naibata, na so martahi-tahi ho bangku, barang hubani anakku ronsi ginomparhu; tapi songon na dob hubahen bam na madear, sonai ma bahen hu bangku pakon hu tanoh panginsolatanmu.”

Jadi nini si Abraham ma, “Hubijahon pe.”

Tapi ihutuk si Abraham do si Abimelek, halani parigi na nirampok ni jabolon ni si Abimelek ai.

Nini si Abimelek ma, “Seng hubotoh barang ise na mambahen ai, ho pe homa seng ipatugah ho hu bangku, anjaha seng dong hubogei pasal ai das hubani sadari on.”

Jadi ibuat si Abraham ma biribiri pakon lombu, ibere ma bani si Abimelek, jadi marbulawan ma sidea na dua.

Dob ai ipapulig si Abraham ma pitu anak ni biribiri.

Jadi nini si Abimelek ma hubani si Abraham, “Huja do anak ni biribiri na pitu, na pinapuligmon?” Balosni, “Jalo ham ma na pitu anak ni biribiri on hun tanganku, bahen hasaksian bangku, paboa ahu sihurak parigi on.”

Halani ai do ase Berseba goran ni ianan ai, ai ijai do sidea na dua marbulawan.

Ase marpadan ma sidea i Berseba. Dob ai misir ma si Abimelek pakon si Pihol, puanglima ni balani ai, mulak hu tanoh ni halak Palis m.

Dob ai isuan si Abraham ma sada hayu Tamariska i Berseba, anjaha ipadilo-dilo ma ijai goran ni Jahowa, Naibata sisadokah ni dokahni.

Dokah do si Abraham manginsolat i tanoh ni halak Palis m.

Ilajou Naibata Haporsayaon ni si Abraham

Jadi dob salpu na masa ai, ilajou Naibata ma si Abraham, nini ma dompaksi, “Abraham!” Nini ma mambalosi, “Ijon do ahu.”

Dob ai nini ma, “Buat ma anakmu na sasada in, haholongan ni uhurmu, si Isak in, arahkon ma ia hu tanoh Moria, anjaha galangkon ma ia

ijai bahen galangan situtungon bani sada dolog, sipatuduhkonon-Ku bam.”

Jadi ipagirah si Abraham ma puho patarni ai, ipalana ma halodeni, iarahkon ma dua halak jabolonni rap pakon si Isak, anakni ai; itaha ma soban ni galangan situtungon ai, dob ai misir ma ia hu ianan, na hinatahon ni Naibata hu bani.

Patolu-arihon mangkawah ma si Abraham, jadi iidah ma ianan ai humbani na daoh.

Dob ai nini si Abraham ma bani jabolonni ai, “Ijon ma hanima tading rap pakon halode in; anggo ahu pakon ambia on, laho do hanami hujai, anjaha dob martonggo hanami, mulak ma hanami bennima.”

Jadi ibuat si Abraham ma soban ni galangan situtungon ai, itampeihon ma bani si Isak anakni ai; ia sandiri mamboban apuy pakon raot sada, jadi rap mardalan ma sidea na dua ai.

Dob ai marsahap ma si Isak dompak si Abraham bapani ai, nini ma, “Bapa!” Nini ma mambalosi, “Ijon do ahu anaha. Tonggor ma, ijon do apuy pakon soban, tapi ija do biribiri bahen galangan situtungon ai?”

Nini si Abraham ma, “Sai pasirsiron ni Naibata do bani sada biribiri bahen galangan situtungon, ambia.” Jadi rap mardalan ma sidea na dua ai.

Dob das sidea bani ianan, ai ma na hinatahon ni Naibata hu bani, ipauli si Abraham ma ijai sada anjapanjap, iatur ma soban ai, dob ai isangkut ma

si Isak anak ni ai, itampeihon ma ia hu atas ni anjapanjap, hu atas ni soban ai.

Dob ai itangkap si Abraham ma tanganni, ibuat ma pisou laho manayat anakni ai.

Tapi dilo-dilo ma bani malekat ni Jahowa hun nagori atas, nini ma, “Abraham, Abraham! Ijon do ahu,” nini.

Jadi nini ma, “Ulang mardas tangan ho bani dakdanak in, anjaha ulang bahen barang aha hu bani, ai domma Hubotoh na i habiari ho do Naibata, anjaha lang mangengkar ho mambere anakmu sisada-sada in Bangku.”

Jadi mangkawah ma si Abraham, iidah ma sada biribiri tunggal i pudini, sangkot tandukni bani sada hayu etek. Laho ma si Abraham hujai, ibuat ma biribiri tunggal ai, anjaha igalangkon ma ai bahen galangan situtungon gan h ni anakni ai.

Dob ai ibahen si Abraham ma goran ni ianan ai, “Jahowa Pasirsirhon;” halani ai ihatahon halak do ronsi sadari on, “I dolog ni Jahowa pasirsiron-Ni.”

Dob ai idilo malekat ni Jahowa ma si Abraham paduahalihon hun nagori atas,

nini ma, “Domma pala Hubijahon bani diring-Ku,” nini Jahowa, “halani ibahen ho sonin, anjaha seng iengkar ho mamberehon anakmu sisada-sada in,

tongon pasu-pasuon-Ku ma ho, anjaha gargar tumang bahenon-Ku ginomparmu, songon bintang

na i langit, songon horsik na i topi ni laut, anjaha teanon ni ginomparmu do huta ni munsuhni.

Anjaha dapotan pasu-pasu marhitei ginomparmu sagala bangsa na i tanoh on, halani itangihon ho do sorang-Ku.”

Dob ai mulak ma si Abraham hubani jabolonni ai; misir ma sidea, rap laho hu Berseba, ai marianan i Berseba do si Abraham.

Ginompar ni si Nahor

Jadi dob salpu na masa ai, adong ma na patugahkon bani si Abraham, “Tonggor ma, si Milka pe itubuhkon do anak bani si Nahor anggimu ai,

si Ur ai ma bunga tubuhni, si Bus anggini, si Kemuel, bapa ni si Aram,

si Heset, si Haso, si Pildas, si Jidlap pakon si Betuel.”

Si Betuel do na manubuhkon si Rebekka. Na ualuh halak ai do itubuhkon si Milka bani si Nahor, anggi ni si Abraham ai.

Dihut do jabolonni, na margoran si Reuma, na pinarjolmani ai tubuhan tuah, ai ma si Tebah, si Gaham, si Tahas pakon si Maaka.

Parmatei ni si Sarah pakon Partanomni

Saratus dua puluh pitu tahun do umur ni si Sarah, ansa ai do dokah ni si Sarah manggoluh.

Dob ai matei ma si Sarah i Kiriat-Arba, ai ma Hebron, na i tanoh Kanaan. Jadi roh ma si Abraham mandoraki ampa manangisisi.

Dob ai jongjong ma si Abraham laho humbani na mateini ai, iparsahapkon ma halak Het, nini ma,

“Halak roh anjaha halak panginsolat do ahu i tongah-tongah nasiam; bere nasiam ma panimbunan parsandirianku bangku i tongah-tongah nasiam, ase hutanom na mateihai.”

Ibalosi halak Het do si Abraham, nini sidea ma, “Tangihon ma hanami, tuannami. Raja na pinabangkit ni Naibata do ham i tongah-tongahnami on, tanom ma na mateimu hu panimbunannami, nodoh ni uhurmu. Seng dong hun bennami on na mamandang ham mananom na mateimu hu tanomannami.”

Dob ai jongjong ma si Abraham, isombah ma parnagori ai, ai ma halak Het,

nini ma dompak sidea, “Anggo dear ma uhur nasiam, tanomonku na mateihai, tangihon nasiam ma ahu, anjaha parmaloi nasiam ma ahu hubani si Epron, anak ni si Sohar,

ase ibere hu bangku liang Makpela, bagianni ai na i duru ni jumani ai. Sai ibere ma hu bangku ai atap sadiha pe hargani, bahen panimbunan parsandirian bangku i tongah-tongah nasiam.”

Ai marianan i tongah-tongah ni halak Het do si Epron. Jadi marbalos ma si Epron, marga Het

ai hubani si Abraham, ibogei haganup halak Het, ganup halak na masuk hun horbangan ni hutani ai, nini ma,

“Lang tuannami, tangihon ham ma ahu! Hubere ma juma ai bamu ampa liang na ibagas ai; i lobei ni hasoman sabangsangku ma hubere ai hubamu; tanom ham ma na mateimu ai.”

Jadi isombah si Abraham ma parnagori ai.

Anjaha marsahap ma ia dompak si Epron ibogei parnagori ai, nini ma, “Tongon, anggo ra do ham manangihon ahu hubere ma bamu boli ni juma ai; jalo ham ma ai humbangku, ase hutanom na mateihai.”

Nini si Epron ma mambalosi si Abraham,

“Eak tuanku, tangihon ham ma ahu! Sanlambar juma, marharga ompat ratus sekel pirak, sadiha ma ai. Tanom ham ma gelah na mateimu ai.”

Ibalosi si Abraham ma si Epron, i mbang ma duit ai nasa buei ni na hinatahon ni si Epron ai i lobei ni ganup halak Het, ompat ratus sekel pirak, duit na laho bani par ga- ga.

Jadi saud ma juma ni si Epron, na i Makpela, tontang ni Mamre ai, juma ai pakon liang na ibagas ai, ganup hayu na i juma ai, ampa ganup na inggot hujai,

gabe parbagianan ni si Abraham, i lobei ni ganup halak Het, ganup halak na masuk hun horbangan ni hutani ai.

Dob ai itanom si Abraham ma si Sarah, parinangonni ai, hu liang juma Makpela, tontang ni Mamre, ai ma Hebron, na i tanoh Kanaan.

Ase ondos ma bani si Abraham juma pakon liang na ibagas ai, bahen tanoman parsandirian bani humbani halak Het.

Parmompo ni si Isak

Ia si Abraham domma ubanon, domma sayur matua, anjaha ipasu-pasu Jahowa do ia bani haganup.

Dob ai ihatahon si Abraham ma bani jabolonni, situanan i rumahni, na manramotkon ganup na dong bani, “Mahua nahkon ma tanganmu i toruh ni binongeihu,

ase hupabija ho hubani Jahowa, Naibata ni nagori atas pakon tanoh on, paboa na so bulih buatonmu humbani boru ni halak Kanaan, panginsolatankin, bahen parinangon ni anakkin,

tapi maningon laho do ho hu tanoh hagodanganku pakon hubani hade-hadengku, laho manririd bahen parinangon ni anakkin, si Isak.”

Jadi nini jabolonni ai ma dompaksi, “Naha, porini lang marosuh puang-puang ai mangirikkon ahu hu nagori on, boi do boanonku anakmu in mulak hu tanoh habingkatanmu ai?”

Nini si Abraham ma dompaksi, “Jaga ma, ase ulang iarahkon ho mulak anakkin hujai!

Jahowa, Naibata ni nagori atas, na mambobahon ahu kaluar hun rumah ni bapa pakon hun tanoh ni hade-hadengku, na mangkatahon ampa na mambijahon bangku sonon, ʻHubani ginomparmu do berehononku tanoh on. Ia ma na marsuruh malekatni mardalan i lobeimu, laho mambuat boru bani anakku hunjai.ʼ

Tapi anggo lang ra puang-puang ai mangirikkon ho, maluah ma ho humbani bija na hu bangku in, asal ulang iarahkon ho anakkin mulak hujai.”

Jadi inahkon jabolonni ai ma tanganni hu toruh ni binongei ni si Abraham, tuanni ai, anjaha ibijahon ma pasal ai hu bani.

Ibuat jabolon ai ma sapuluh unta humbani unta ni tuanni ai, ampa bagei ni ugas-ugas na maharga ni tuanni, dob ai bingkat ma ia, laho hu Mesopotamia, hu huta ni si Nahor.

Dob ai ipasaran ma unta ai i darat ni huta ai, i lambung ni sada parigi marayak bod ari, bani panorang parroh ni halak parbah.

Jadi nini ma, “Ham Jahowa, Naibata ni si Abraham tuankai, patongon Ham ma langkahku sadari on, sai patuduhkon ma idop ni uhur-Mu bani si Abraham, tuankai.

Tonggor ma, jongjong do ahu i lambung ni parigi on, anjaha laho kaluar ma boru ni sinkuta on sihol manahui bah.

Ia onjolan ni tembok ni huta ai mata intan jaspis do, anjaha huta ai sandiri omas pitah do, lihar songon kasa.

Ipajagar do onjolan ni tembok ni huta ai marhitei bagei ni batu na maharga: Onjolan na parlobei jaspis do, na paduahon sapir, na patoluhon kalsedon, na paompatkon samarah,

na palimahon sardonik, na paonomkon sardion, na papituhon kerisolit, na paualuhkon beril, na pasiahkon topasion, na pasapuluhkon kerisopras, na pasapuluhsadahon kiasin, na pasapuluhduahon ame s.

Ia na sapuluh dua horbangan ai, sapuluh dua mu ha do, ganup horbangan ipauli humbani sada mu ha; ia alaman ni huta ai omas pitah do songon kasa na lihou.

Seng dong huidah rumah panumbahan ibagas huta ai, ai Tuhan Naibata, Sigomgom haganup do na gabe rumah panumbahan ijai, rap pakon Anak ni biribiri in.

Seng porlu bani huta ai mata ni ari atap bulan laho manondangisi; ai hasangapon ni Naibata do na paliharhonsi anjaha Anak ni biribiri in do panondangni.

Mardalani ma bangsa-bangsa ibagas sinalsalni, anjaha boanon ni raja-raja ni tanoh on ma hamuliaon ni sidea hubagas.

Seng pala itutup horbanganni arian, ai seng masa ijai borgin.

Boanon ni sidea ma hasangapon pakon hamuliaon ni sagala bangsa hubagas huta ai.

Tapi seng anjai masuk hubagas huta ai sagala na mabutak, na mangkorjahon hagigi pakon ladung, pitah na dob tarsurat bani buku hagoluhan ni Anak ni biribiri ai do hansa.

Bah Hagoluhan pakon Hayu Hagoluhan

Dob ai ipatuduhkon ma hu bangku sada bah banggal hagoluhan, lihou songon kasa, na luar humbani paratas ni Naibata pakon Anak ni biribiri in.

I tongah-tongah ni alaman ni huta ai pakon angkup topi ni bah ai, dong do hayu hagoluhan, na marbuah sapuluh dua hali satahun, na mamberehon buah siap bulan; ia bulung ni hayu ai gabe hamalumon do ai bani bangsa-bangsa.

Seng be dong na hona bura ijai. Paratas ni Naibata pakon Anak ni biribiri in do jongjong ijai, anjaha juakjuak-Ni marugas Bani.

Idahon ni sidea ma bohi-Ni, anjaha goran-Ni tarsurat bani pardompakan ni sidea.

Seng masa be ijai borngin, seng porlu be bani sidea sondang ni suluh atap sondang ni mata ni ari, ai sondangan ni Tuhan Naibata ma sidea, anjaha manrajai ma sidea ronsi sadokah ni dokahni.

Sipaingat Parujungan

Jadi ihatahon ma hu bangku, “Ia hata on hatengeran ni uhur do anjaha sintong; isuruh Tuhan Naibata, simada tonduy ni nabi-nabi do malekat-Ni, laho patuduhkon hubani juakjuak-Ni na laho barah masa.

Tonggor ma, barah do Ahu roh! Martuah ma na manramotkon hata ni panjahaion na ibagas buku on!”

Ahu, si Johannes, do na mambogei anjaha na mangidah na masa in. Jadi dob hubogei anjaha huidah, manrogop ma ahu anjaha marsombah hu lobei ni nahei ni malekat, na patuduhkon ai hu bangku.

Jadi nini ma dompak ahu, “Ulang sonai! Ai hasomanmu juakjuak do ahu anjaha hasoman juakjuak ni saninamu, nabi-nabi ai, ampa na manramotkon hata ni buku on. Naibata ma sombah!”

Dob ai nini ma dompak ahu, “Ulang ma lak hata panjahaion ni buku on! Ai dohor ma panorangni.”

Halak sihorjahon hajahaton inunut ma mambahen na jahat, anjaha halak na butak lambin mambutaki dirini; tapi halak parpintor mangkorjahon hapintoran, anjaha halak na pansing papansing dirini.

Tonggor ma, podas do Ahu roh! Huboan do upah, laho mambalas hubani ganup halak romban hubani na hinorjahonni bei.

Ahu do Alpa pakon Omega, Na Parlobei pakon Na Parpudi, Bonani pakon Ujungni.

Martuah ma sagala na mamburihi hiouni, gabe marhak sidea marrupei bani hayu hagoluhan ai, anjaha boi masuk hun horbangan ai hubagas huta ai.

I darat ma anggo baliang pakon sipartabas pakon parbangkis pakon pamunuh pakon parnaibata na legan ampa sagala na mangkarosuhkon anjaha na mangkorjahon ladung.

Ahu, Jesus, marsuruh malekat-Ku bani nasiam, manaksihon on bani kuria in. Ahu do Urat pakon Marga ni si Daud, Bintang buha siang, na marsinalsal in.

Jadi ihatahon Tonduy pakon tunangan ai ma, “Roh ma Ham!” Anjaha na mambogei ai pe ihatahon ma, “Roh ma Ham! Barang ise na horahan, roh ma; na marhasihol, ijalo ma bah hagoluhan in seng pala marpamboli.”

Ahu manaksihon bani sagala na mambogei hata ni panjahaion na bani buku on, “Anggo adong na manambahi hujin, tambahan ni Naibata ma bani hamarsikon na tarsurat ibagas buku on.

Anggo adong halak na mambua hata na ibagas buku panjahaion on, buaton ni Naibata ma rupeini

na bani hayu hagoluhan in ampa na bani huta na pansing in, na tarsurat ibagas buku on.”

Ihatahon sisaksihon on, “Tongon, barah do Ahu roh!” Amen! Roh ma Ham, Tuhan Jesus!

Idop ni uhur ni Tuhan Jesus ma mangkasomani nasiam haganup!

==============

Bahasa Batak Simalungun

LAI - 2007 Edition

Website:

www.bible.com

© 2007 LAI