Ancasing Panaliten Paedahing Panaliten

2. Sumbering Pasinaon

Miturut AECT Association for Educational Communication and Technology wonten ing Usman, dkk, 2002:1 sumber pasinaon inggih menika sedaya sumber saged arupi data, tiyang utawi bandha ingkang saged dipunginakaken kangge paring sarana pasinaon dhateng siswa. Sumber pasinaon ugi kalebet samubarang prakawis ingkang saged dipunginakaken dening guru, saking ingkang awujud bandha menapa sanesipun kangge nggayuh ancasing pasinaon. Sarujuk kaliyan pamanggihipun AECT, Mudhofir 1992:17 ugi ngandharaken bilih sumber pasinaon menika samubarang prakawis ingkang nyengkuyung lampahing pasinaon, kalebet ugi sistem pelayanan , bahan ing salebeting pasinaon, saha lingkungan sakiwa tengenipun satemah saged nggampilaken siswa kangge nggayuh ancasing pasinaon utawi kompetensi tartamtu. Wonten saperangan komponen ingkang kawrat wonten ing sumber pasinaon, ing antawisipun tiyang, pesenpiweling, bahan, lingkungan, alat, saha teknik. Sedaya komponen kasebut temtu badhe dipunpanggihaken wonten ing saben lampahing pasinaon. Miturut Sudjana Rivai 2002:21-25, pamilihing sumber pasinaon saged adhedhasar kalih titikan, inggih menika titikan umum saha titikanipun sumber pasinaon adhedhasar ancasipun. a. Titikan umum Titikan umum minangka ukuran dhasar kangge milih maneka warni sumber pasinaon, ing antawisipun mirah, praktis saha prasaja, gampil dipunpanggihaken, fleksibel , komponen ipun jumbuh kaliyan ancasing pasinaon. b. Titikanipun sumber pasinaon adhedhasar ancasipun Saperangan titikan kangge milih sumber pasinaon adhedhasar ancasipun ing antawisipun kados mekaten. 1 Sumber pasinaon kangge paring motivasi dhateng siswa. 2 Sumber pasinaon kangge nggayuh ancasing pasinaon. 3 Sumber pasinaon kangge nindakaken panaliten. 4 Sumber pasinaon kangge ngudhar satunggaling prakawis. 5 Sumber pasinaon kangge presentasi . Jinising sumber pasinaon menika saged kaperang dados kalih, inggih menika sumber pasinaon ingkang kedah dipunrantam rumiyin learning resources by design saha sumber pasinaon ingkang sampun samekta lajeng kantun ngginakaken kemawon learning resources by utilization Januszewski, 2001:84. Sumber pasinaon ingkang kedah dipunrantam rumiyin menika anggenipun damel kanthi dipunjarag kangge njangkepi ancasipun pasinaon. Sumber pasinaon ingkang kados mekaten asring dipunsebut bahan pasinaon. Tuladhanipun inggih menika buku pasinaon, modul, program audio , program slide ingkang wonten suwantenipun, transparansi . Sumber pasinaon ingkang sampun samekta inggih menika sumbering pasinaon ingkang dipunrantam kangge kabetahanipun pasinaon, ananging ugi saged dipunpanggihaken, dipunpilih saha dipunginakaken kangge njangkepi kabetahanipun pasinaon. Tuladhanipun, seniman, dhalang, paraga tari, busana Jawi, batik, tenaga ahli, sastrawan, museum, pagelaran ringgit, pagelaran kethoprak, pagelaran macapatan, pagelaran campursari, siaran tv, siaran radio, ariwarti, kalawarti.