Kajian Wacana Andharan Teori

dipunpanggihaken jinis kohesi gramatikal saha leksikal antawisipun ukara. Jinis kohesi gramatikal ingkang dipunpanggihaken inggih menika referensi iku, iki, kuwi, ngono, saha mengkono, substitusi tembung sesulih persona, klitika -e, tembung sesulih panggonan, konjungsi ning, naming, ananging, nalika, mula, mulane, wasanane, pungkasaning, akhire, sebab, merga, amarga, mula saka iku, saha supaya, saha pelesapan. Menawi kohesi leksikal ingkang dipunpanggihaken antawisipun repetisi, sinonimi, hiponimi, saha kolokasi. Panaliten kasebat ugi dipunpanggihaken sewelas jinis koherensi antawisipun ukara, inggih menika penambahan semana uga, uga, kejaba iku, perturutan ora let suwe, banjur, sabanjure, sawise, akhirewasanane, perlawanan nanging, ning, tapi, ananging, penekanan malah, sebab akibat sebab, amarga, merga, jalaran, wekdal nalika iku, wektu iku, syarat yen, nanging, sarate, cara banjur, sabanjure, langka- langkahe, kagunan gunane, bisa, penjelasan, saha penyimpulan dadi. Kaunggulan panalitenipun Suryawati inggih menika wonten ing asilipun analisis sarana kohesi saha koherensi . Wonten panaliten kasebat dipunpanggihaken wolung perangan kohesi saha sewelas koherensi antawisipun ukara. Kekirangan wonten panalitenipun Suryawati inggih menika basa ingkang dipunginakaken kirang dipunmangertos, saengga sisah anggenipun mangertos maksudipun salebeting cariyos lare. Asil panalitenipun Suryawati saged dipundadosaken pandom wonten ing panaliten menika babagan perangan kohesinipun. Panalitenipun Suryawati kaliyan panaliten menika sami-sami ngrembag babagan kohesi. Bedhanipun panaliten menika mboten ngrembag perkawis koherensi dene panalitenipun Suryawati ngrembag koherensi. Objek ingkang dipuntliti ugi bedha, panaliten menika objekipun wonten salebeting kumpulan wacana khotbah ing GKJ. Menawi panalitenipun Suryawati objekipun wonten salebeting cariyos lare abasa Jawi. Kaunggulan panaliten menika tinimbang panalitenipun Josep saha Suryawati inggih menika, objek ingkang dipuntliti awujud kumpulan wacana khotbah wonten ing GKJ. Objek panaliten menika langka utawi dereng nate dipunteliti panaliti sanes saderengipun original. Kaunggulan sanesipun inggih menika panandha kohesi ingkang dipunpanggihaken wonten panaliten menika langkung pepak. Panaliten menika gadhah ancas ingkang wigatos, inggih menika paring pambyantu dening pamaos wacana “Khotbah Jangkep” supados mangertos wosipun khotbah ingkang dipunandharaken kanthi cetha.

C. Nalaring Pikir

Perangan basa ingkang wiyar saha jangkep inggih menika wacana. Wacana ingkang sae kedah nggatosaken sambet rapetipun ukara satunggal kaliyan ukara sanesipun. Tegesipun kedah sambet inggih menika, supados ukara satunggal kaliyan ukara sanesipun saged gayut saha runtut. Perangan ingkang ndadosaken laras saha gayutipun ukara setunggal kaliyan ukara sanesipun wonten salebeting wacana menika dipunwastani kohesi. Perkawis menika ugi kapanggihaken wonten ing wacana ingkang sinerat, mliginipun wonten panaliten menika ingkang ngginakaken kumpulan “Khotbah Jangkep” ing Gereja Kristen Jawa GKJ wedalan wulan 1 Januari – 31 Maret 2013. Kohesi kaperang dados kalih, inggih menika kohesi gramatikal kaliyan kohesi leksikal . Kohesi gramatikal inggih menika gayutipun ukara-ukara ingkang ndhapuk wacana ngginakaken sarana gramatikal tartamtu. Wondene Kohesi leksikal inggih menika gayutipun antawisipun perangan wonten salebeting wacana kanthi semantik. Panaliten menika badhe nliti babagan kohesi gramatikal saha leksikal wonten ing wacana ingkang sinerat. Sumber data wonten panaliten menika inggih menika “Khotbah Jangkep” ing Gereja Kristen Jawa GKJ wedalan wulan 1 Januari – 31 Maret 2013.