34
G. Caranipun Ngesahaken Data
Caranipun ngesahaken data wonten ing panaliten menika dipunginakaken cara triangulasi. Triangulasi dipunlampahi supados panaliten menika valid.
Triangulasi inggih menika cara ingkang dipunginakaken kangge mriksa data ingkang ngginakaken satunggaling prekawis wonten ing njawi data kangge
mbandingaken data ingkang sampun dipunpanggihi Moleong, 2002: 178. Supados manggihi data ingkang langkung valid saha trep antawisipun setunggal
kaliyan sanesipun, dipunlampahi triangulasi saking data wawan pirembagan, data observasi saha data dokumentasi ingkang arupi rekaman saha foto utawi
gambar. Triangulasi ingkang dipunginakaken wonten ing panaliten menika triangulasi sumber saha triangulasi metode. Triangulasi sumber dipunlampahi
mawi nyuwun andharan kanthi cetha saking informan babagan informasi ingkang sampun kaparingaken supados saged mangertosi kanthi tumemen
babagan satunggaling informasi. Kalajengaken informasi saking informan dipuncocokaken kaliyan informasi saking informan sanes. Kejawi ngginakaken
triangulasi sumber, kangge ngesahaken data wonten ing panaliten menika ugi ngginakaken triangulasi metode. Triangulasi metode menika dipunlampahi
kanthi cara nandhingaken data asiling panaliten kaliyan data asiling wawan pirembagan saha data ingkang awujud foto.
35
BAB IV ASILING PANALITEN SAHA PIREMBAGANIPUN
A. Deskripsi Setting Panaliten
1. Andharan Papan Upacara Labuhan Ageng
Adhedhasar data monografi Desa Paranggupito taun 2013, seganten Sembukan menika dumunung wonten ing Dhusun Kranding, Desa Paranggupito,
Kecamatan Paranggupito. seganten Sembukan menika dumunung wonten ing sisih Kidul, udakawis 4,3 kilometer saking Kantor Desa Paranggupito. Saking
protigan ngajeng Kantor Desa Paranggupito ingkang ngilen menika arah tumuju dhateng Provinsi Dhaerah Istimewa Yogyakarta, ingkang ngaler menika tumuju
dhateng Kabupaten Wonogiri, wondene ingkang arah Kidul Wetan tumuju wonten ing seganten Sembukan. Arah Kidul Wetan saking Kantor Desa
Paranggupito, udakawis 0,02 kilometer wonten protigan malih. Ingkang arah ngetan menika arah tumuju dhateng Pantai Nampu, wondene arah ngidul menika
dhateng seganten Sembukan. Wonten kiwa mergi caket kaliyan protigan menika wonten Kantor Kecamatan Paranggupito saha Puskesmas Paranggupito.
Seganten Sembukan menika saking Kecamatan Paranggupito menika udakawis 4 kilometer. Wonten ing seganten Sembukan menika dipunwontenaken upacara
tradhisi ingkang dipunwastani upacara labuhan ageng. Upacara tradhisi menika taksih rutin dipunwontenaken saben malem surya kaping setunggal Sura. Ing
ngandhap menika denah papan panggenan upacara labuhan ageng.