Ampun Remen Mbeda-mbedake Mring Liyan

Luwih ala luwih ala melik darbeke liya . SW, 2012 :46 Analisis konteks ingkang saged dipunandharaken sasampunipun ningali cakepan gendhing wonten ing nginggil kados mekaten. Tumindak kirang sae luwih ala menawi manungsa menika wonten ing pagesanganipun asring melik dhateng rejeki ingkang dados darbeke liya. Darbeke liya menika saged kawastanan melik rejeki kagunganipun tiyang sanes. Perkawis melik darbeke liyan menika kedah dipuntilar wonten ing pagesangan. Manungsa wonten ing donya menika kedah narima dhateng rejeki ingkang dados kersaning Gusti. Wujud piwulang moral ampun melik dhumateng darbeke liyan menika kedah kawulangaken para tiyang sepuh dhateng larenipun. Mliginipun tiyang sepuh ingkang kaparingan rejeki bandha donya ingkang langkung sekedhik menawi dipuntandingaken kaliyan tiyang sanesipun. Saking andharan ing nginggil saged kapethik dudutan bilih remen melik darbeke liyan menika kedah dipuntilar dening manungsa supados saged gesang bebrayan kanthi sae kaliyan tiyang sanesipun. Gendhing Welingku menika ngewrat piwulang moral ampun remen melik darbeke tiyang sanes, katitik saking cakepan luwih ala luwih ala melik darbeke liya. Perkawis menika saged dados tetimbangan pamireng anggenipun tumindak kanthi akhlak saha budi pakerti dipunjumbuhaken kaliyan kawontenanipun tiyang wonten ing masyarakat .

i. Ampun Remen Mbeda-mbedake Mring Liyan

Manungsa gesang wonten ing ndonya menika betah sesrawungan kaliyan manungsa sanesipun. Sesrawungan kaliyan manungsa sanesipun menika kedah dipunlandhesi kanthi raos ingkang tulus . Raos menika saged dipuntegesi bilih wonten ing sesrawungan manungsa boten mbeda dhateng tiyang sanesipun. Manungsa ingkang sae menika ingkang saged kekancan kaliyan sedaya jinising tiyang. Kekancan boten perlu ningali saking pundi asalipun, kadospundi tiyang sepuhipun, menapa kemawon titihanipun lan sapanunggalanipun. Panaliten menika manggihaken piwulang moral kanthi wujud ampun remen mbeda-mbedakaken kaliyan tiyang sanes. Wujudipun piwulang moral menika kapanggihaken wonten ing gendhing dolanan kanthi irah-irahan Uri- uri. Dene cakepan ingkang ngemut babagan wujud piwulang moral ampun remen mbeda-mbedakaken kaliyan tiyang sanes saged dipunpirsani kadosta wonten ing ngandhap menika. Gedhe cilik padha methik . SW, 2012 :92 Menawi dipunatingali saking konteksipun, cakepan gendhing wonten ing nginggil ngawrat babagan bilih manungsa gedhe utawi cilik sami- sami padha gadhah hak kangge methik , boten dibeda-beda. Menawi perkawis methik ingkang sami menika dipungayutaken kaliyan pagesangan, saged kawastanan bilih sedaya ingkang sampun usaha wonten ing pagesanganipun bakal pikantuk hak piyambak-piyambak ingkang sami, gumantung kados pundi usahanipun. Saking andharan ing nginggil saged kapethik dudutan bilih manungsa boten pareng mbeda kahananipun tiyang. Tiyang wonten ing ndonya menika minangka makhluk ingkang karipta dening Gusti, dados derajatipun menika sami. Gendhing Uri-uri menika ngawrat piwulang moral ampun remen mbeda-mbedakake mring liyan, katitik saking cakepan gedhe cilik padha methik. Perkawis menika saged dados tetimbangan pamireng kangge tumindak kanthi akhlak saha budi pakerti ingkang dipunjumbuhaken kaliyan kawontenanipun tiyang sane ing masyarakat .

j. Ampun Remen Nlikung Liyan