Remen Reresik Wujudipun Piwulang Moral

u. Remen Reresik

Manungsa wonten ing donya menika saderma namung numpang Gusti. Kuwajiban tiyang ingkang numpang salah satunggalipun inggih menika kanthi njagi donya supados resik. Reresik wonten ing mriki saged reresik babagan jiwa lan raga. Wonten salahsatunggalipun bebasan ingkang nedahaken bilih wonten ing raga kang resik, kawontenan jiwa ingkang resik ugi. Kanthi nggatosaken perkawis kalawau, manungsa kedahipun ampun kesupen anggenipun reresik dhateng raganipun. Raga ingkang sampun dipunparingaken dening Gusti menika kedah dipunjagi kanthi salahsatunggalipun cara inggih menika reresik. Sasampunipun ningali andharan wonten ing nginggil, manungsa kedahipun remen reresik wonten ing pagesanganipun. Panaliten menika manggihaken tuladha piwulang moral supados manungsa remen reresik wonten ing pagesanganipun. Cakepan gendhing dolanan saklebetipun buku anggitanipun Sri Widodo ingkang ngandharaken wigatinipun wujud piwulang moral remen reresik kapanggihaken wonten ing gendhing dolanan kanthi irah- irahan Lebar Nyambut Gawe. Cakepan gendhing Lebar Nyambut Gawe ingkang ngawrat piwulang moral kangge manungsa supados remen reresik wonten ing pagesanganipun, saged dipunpirsani wonten ing ngandhap menika. Lebar nyambut gawe wis resik awake . SW, 2012 : 51 Lebar nyambut gawe negesi bilih sampun limrahipun manungsa menika sasampunipun makarya kedahipun reresik wis resik awake . Tegese sasampunipun nyambut damel manungsa kedahipun boten kesed anggenipun reresik, ananging gage kemawon ngicali sedaya rereged ingkang nemplok wonten ing raganipun. Menawi boten gage dipunicali, rereged kalawau saged damel raga menika dipunremeni dening pernyakit. Sasampunipun ningali andharan wonten ing nginggil, saged kapundhut dudutanipun bilih tiyang kedah enggal-enggal reresik sasampunipun nyambut damel. Amargi menawi boten, saged ndadosaken penyakit. Perkawis mekaten boten saged kedadosan menawi manungsa menika remen reresik. Gendhing Lebar Nyambut Gawe menika ngawrat piwulang moral remen reresik, katitik saking cakepan lebar nyambut gawe wis resik awake. Perkawis menika saged dados tetimbangan pamireng anggenipun tumindak kanthi akhlak saha budi pakerti ingkang leres kangge dhirinipun piyambak.

v. Ampun Remen Tumindak Culika