Menawi sampun nggatosaken sekawan bab menika, sampun saged madosi dinten kangge ijab. Anggenipun nemtokaken dinten ijab, ngginakaken petangan
neptonipun temanten kekalih. Andharan menika jumbuh kaliyan ingkang dipunandharaken informan:
“nek nggoleki dina nggo ijab kuwi seka neptone manten lanang karo wedok, terus dijumlahke. Nek uwis terus dibagi 5, Sri tegese mulya, Rejeki
tegese pinter golek pangupajiwa, Gedhong tegese kuuat dadi wong sugih, Lara tegese Laraseret, karo Pati tegese mati. Nek uwis ketemu, umpama
ketemu turah 2, tibane Rejeki to, bar kuwi lagi digoleki dina pasaran sing nek dibagi 5 turahe padha 2. Kuwi dina sing apik nggo ijab.” CLW 03
Saking andharan informan menika saged dipunterangaken bilih anggenipun madosi dinten kangge ijab qabul menika adhedhasar neptonipun
temanten kekalih. Lan petangan ingkang kangge merang wonten 5 inggih menika
sri “mulya”, rejeki “pinter golek pangupajiwa”, gedhong “kuwat dadi wong
sugih”, lara “laraseret” lan pati “mati”.
Saderengipun dipunandharaken kados pundi caranipun ngginakaken petangan, badhe kaandharaken rumiyin tegesipun saking tembung-tembung sri,
rejeki, gedhong, lara, pati.
1. Sri
Sri tegesipun mulya. Ingkang dipunwasatani mulya wonten babagan menika inggih menika pagesangan ingkang pinaringan ayom, ayem, tentrem, gemah ripah
loh jinawi, gangsar anggenipun pados sandhang pangan, tebih saking sambikala, celak ing kanugraha, pramila menawi saderengipun ijab menika dipunetang lajeng
dhawah wonten sri, menika sae sanget.
2. Rejeki
Rejeki tegesipun rejekinipun sae utawi pinter golek pangupajiwa, pramila wonten petangan bab manten menika menawi petanganipun dhawah wonten
rejeki, tegesipun temanten kekalih samangkih pinaringan gangsar anggenipun pados pangupajiwa, menika ugi sae kados dene Sri.
3. Gedhong
Gedhong tegesipun gedhung utawi bangunan. Ananging wonten babagan petangan manten menika gedhong ngemu teges kuwat dadi wong sugih. Kuwat
dadi wong sugih menika saged dipunandharaken bilih temanten kekalih menika boten boros, rejekinipun kathah ananging boten sombong, lan ugi terpandang.
4. Lara
Lara tegesipun sakit. Ananging wonten babagan menika ugi saged dipunwastani seret, kirang lancar, pramila menawi wonten petangan manten
menika dhawah wonten lara, menika tegesipun kirang sae. Saged mangkih temanten kekalih menika asring lara utawi sakit, lan saged ugi temanten kekalih
anggenipun pados rejeki menika seret, kirang lancar.
5. Pati
Pati tegesipun mati. Ingkang dipunwastani mati wonten babagan menika boten namung mati ingkang ateges pejah nyawanipun. Ananging saged ugi mati
menika ingkang mati rejekinipun. Menika ingkang boten dipunkajengaken. Pramila menawi saderengipun ijab, dipunetang rumiyin ingkang temenan, sampun
ngantos dhawah wonten petangan pati menika.
