Wêgangsulanjani, lampah 23, pêdhotan 5-6-6-6

2. sirèku janma, nagara ing Bahdad, de têka datan wrin, yèn kang darbe panti, iki ran Sinbad, ingkang wus kuncara, nampakèng samodra, saliring udadi, kang kaprabaning, kulandara agni, kabèh wus jinajah, ya ta sira Inbad, nguni wus myarsa, parartaning Sinbad, tinimbang kalawan, kamlaratanira, 3. jro tyasmu rina, mring kalabèng Sinbad, sing ardèng rudatin, tumêngèng gêgana, sru dya manantya, piniarsèng kathah, ya Gusti Allahu, kang Amurbèng tuwuh, mugi galiha, ing prabedanira, wandèngong lan Sinbad, sabên-sabênira, ulun sangsaya, anindya rêkasa, mangruruh ring boga, ngingoni nak rabi, 4. miwah tatêdhan, kang kawula bukti, mêhêng data-[42]-n eca, mangka ta pun Sinbad, tan kêkirangan, amukti wibawa, manggih kahastaman, paran labêtira, Tuan asungi, nugraha gung iku, lan paran dosèngong, anandhang sudrardda, Inbad wus sira, nênantya mangkana, wangwang gêdrug-gêdrug, lir kataman unang, 5. dèrèng wus dènnya, ngèsthi ring pataka, pinanggyèng wandanya, nulya sira mulat, abdi sajuga, priya umijil sing, wisma amarani, maring sira Inbad, nandhak bujanya, lingira mangkana, payo tut wuria, ing salakuningong, bêndara Sinbad, arsa atêtanya, iya marang sira, rèhning wus rahina, 6. Seherah Sadhe, kèndêl acarita, ratri dinugèkkên, itina lingira, sri narapati, paduka saèstu, sagêd anggaliha, eramira Inbad, rikakala 31 dèn jak, tumamèng jro panti, wingwrinirèng driya, wit sampun kawijil, wuwusnya wau, ciptaning wardaya, marma tinimbalan, tan wus yun tinanya, 7. ingkang wus dadya, pangucapnya wau, adarbe pangira, amanggya rêrubêd, marma lênggana, lêlingsem kuwatir, yèn tilar rêmbatan, wontên ing lêlurung, nging rencang ika, sagah kèn rumêksa, ngungsêd ing pangajak, kinêdah umiring, Inbad wus kerid, tumamèng kamar gêng, kwèh janma lèlunggwan, sami ngêpang 32 meja, 8. rampadanira, samya adi-adi, de kang nèng madyaning, meja janma sêpuh, kumbalanira, wus pingul sadarum, pamulunya wingit, rencangira samya, nèng wurinira, sami angladèni, de ta janma sêpuh, yèku mangran Sinbad, ki [43] bêrah sangkin, kumel non kèh janma, ambogadrawina, wangwang anumoddha, 9. sarya dharodhog, Sinbad ngacarani, kinèn umangsaha, ajajara lênggah, nèng kananira, dyan inatag bukti, miwah nginum anggur, Sinbad dupi anon, yèn tamunira, wus luwar anadhah, sigra atêtanya, mring kiyai buruh, mungguh ing nama, myang utsahanira, kang liningan muwus, wasta kula Inbad, 10. Sinbad sumambung, ngong bungah wruh kita, lan sun namtokakên, sêsuruhaningwang, arsèkanang tyas, andulu ing sira, ing mêngko manira, yun myarsa pribadi, 31 rikala 32 ngêpung pamuwusira, rikalanèng lurung, Sinbad sadèrènya 33 , bukti amiyarsa, dêlinging Inbad, saking ing janela, yèku sumarmanya, pinurih lumêbu, 11. dupi tinanya, kang kadya mangkana, Inbad sru tumungkul, lalu kewraning tyas, wusana nabda, tuan marmanira, kawijil wuwus ngong, ingkang tan sayoga, muhung sing payah, mangke ulun minta, pangaksama tuan, Sinbad anauri, ywa sandeyèng tyas, yèn wacananira, karya rêngatingwang, iku nora pisan, 12. malah ngong wêlas, mring papêsthènira, ingsun pan sumêdya, iya madhangakên, ing pangamunta, maring raganingwang, marga saking tuna, ing sumurupira, ciptèng driyanta, gyan ngong mukti iki, tanpa nambut karya, kalawan kangelan, mêngko sirèku, ingsun sungi wêruh, gyaning ngong amanggih, nohaning tumuwuh, 13. srana sangsara, pirang-pirang warsa, akanthi kasrakat, kalawan prihatin, Sinbad tumulya, nabda mring pra tamu, ki sanak sa-[44]-darum, wiraos ngong wau, apan sayêkti, lan kula namtokkên, nadyan janma dahat, murka ring supunya, lamun miyarsa, ing cariyosira, ngong kasurang-surang, yêkti yèn tan èstu, 14. prayojananya, nampakèng samodra, mamrih raja brana, andika sadarum, kadi ta dèrèng, cêtha ing pawarta, bab lampahaningong, anindya sing elok, miwah gyan kula, manggih pancabaya, wontêning jaladri, kongsi kaping sapta, 33 sadèrèngnya rèhning panujon, kularsa amêdhar, ing cariyosira, lêlampahan kula, 15. kang têmên-têmên, locitaning driya, andika sadarum, kadi tan akêmba, amiyarsakkên, rèhning Sinbad arsa, mungarani kata, lêlampahanira, darapon Inbad, ika sumurupa, ing sadèrèngira, murwani carita, sigra mangatag, nglêbêtkên rêmbata-, nira kyai Inbad, kang tinilar nguni,

16. Dhadhap Mantêp, lampah 13, pêdhotan 5-8

1. wusnya rêmbatan, pinrênah ring gèn barukut, tumulya Sinbad, amêdhar kanang carita, rikalanira, lumêkas mambah samodra, lagya ping siki, ya ta ri pamuwusira, 2. kalaning nguni, sun antuk warisan kathah, sing kadangingwang, nalika waktu samana, ngong maksih mudha, atyanta mangurawara, antara lama, èngêt wangwang amantuni, 3. budyardda kirin, osiking driya datan wun, brastha sadarum, yadiyan lulusa ing rèh, angangge arta, ingkang kadya mangkanèku, ciptèng wardaya, yèn kalantur ing pra-[45]-tingkah, 4. kang tan sayoga, yêkti puwara kasudran, miwah ta èngêt, andikèng Nabi Suleman, nular sing yayah, mangkana sabdèng Jêng Nabi, gampang angangkah, papalan ngukih pararta, 5. dupi ngong driya, salir kang iniwên wau, tandya sesaning, têtilaraning sudarma, ingsun sadèni, anèng pasar sahadaya, sigra agosthi, lawan sakwèhning sudagar, 6. ingkang gagramèn, umambah ing jalaniddhi, kinira bakit, umasung ing rèh sayoga, wusnya pinanggih, prayoganirèng panggosthi, ingong sumêdya, amanjangakên ardana, 7. kang kantun muhung, sakêdhik ing gunggungira, prayojanèku, adaningsun lêksanani, sigra umangkat, maring nagri ing Balsorah, nênggih palabuh-, anira praja ing Pèrsi, 8. ane ing ngriku, ingong umanjat ring palwa, lan juragan kwèh, samya ambêkta dagangan, ing sawatara, tumulya ambabar layar, sumêdya arsa, numilag mring tanah Ngindhu, 9. mambah samodra-, nira nagari ing Pèrsi, de prênahira, nagari ing Ngindhu wau, ing lengkonganira, prajèng Arab lan ing Pèrsi, tantara dangu, gyaningsun anèng udaya, 10. wangwang sru mumêt, miwah umor arsa nuntak, yèku pan ingkang, winastan sakit jaladri, nanging tan dangu, sêsakitingsun waluya, salajêngira, tan kataman gring kadyèka, 11. lampahing palwa, kampiring nuswa akathah, sabên akèndêl, anyadèni dêdagangan, myang ngurup-urup, bêbê-[46]-ktan gêgramèningsun, nujwèng waktwèku, tan amaruta sumilir, 12. banawaningong, kandhêg ngarêpakên nuswa, ton sing mandrawa, apan kadi ara-ara, wit sing wilisnya, kapitan sigra umatag, amulung layar, lan mangagnya mring kirna wyang, 13. kang munggwing palwa, yèn ana ayun umêntas, mring nuswa ika, apan inggih linilanan, dyan kèh kang mêntas, ingong tan kari tumutur, sakancaningwang, sawêgung awijah-wijah,