Kuswalalita, lampah 23, pêdhotan 5-6-6-5

natèng Sèrèndhit, ingkang kawuwusa, dahat adilira, sakathah ing khakim, 4. sajroning kitha, lèn sajawinira, kang kalêbêt tala-, tah nuswèng Serendhit, sadaya sami, kekah adilipun, tang wontên kang mingkêd, saking wajibira, Sang Prabu Harun, sru kacaryan myarsa, ing caritaningsun, pangandikanira, mungguh kawica-, ksanannya narendra, ing nuswa Sèrèndhit, apan wus têtela, [115] 5. saking surasa-, ning pustakanira, winimbuhan dening, kandhanira mau, nyata sayoga, ratu wicaksana, kang mangkono iku, amêngkua dasih, pantês rinatu, wusnya sri pamasa, ngandika kadyèku, dyan kondur mring pura, ngong dhinawuhan, mulih sarta sinung, ganjaran akathah, dupi sampun tamat, 6. Sinbad katanya, kang para dhatêngan, lèn bêrah Ki Inbad, samya pamit mantuk, ananging Inbad, sininungan malih, uwang êmas satus, enjingira wangsul, mring wismèng Sinbad, nulya cinriyosan, lêlampahanira, duk mambah samodra, kang kaping sapta, yèku wêkasaning, lampah nèng udaya, mangkana lingira, 7. saulih ingsun, linggaran kaping sad, tan adarbe sêdya, mimba malih- malih, awit wus sêpuh, prelu amikira, nglêrêmkên sarira, lan ngong wus prasapa, tan arsa malih, marani bêbaya, kadi ingkang sampun, marma tan adarbe, pikir lènira, muhung sumêdyarsa, akêndêl kewala, nuju sajugari, 8. ngong nyênyuruhi, pawong mitraningwang, ambogadrawina, nulya batur mami, tur uning mringsun, ana dutanira, Sri Harun Alrasid, anakonkên mring ngong, sun sigra madêg, saka ing panggonan, atundhuk kalawan, carakèng nrêpati, sojarning duta, sun angêmban agnya-, nira sri pamasa, kita tinimbalan, 9. ane karsanya, mangagnya mring sira, tandya ngong tut wuri, lampahing caraka, mêsat mring pura, kerid ngarsèng prabu, ngong sujud nungkêmi, padaning nrêpati, sri nata nabda, Sinbad ingsun mundhut, karyanta kang mêsthi, sira lêksanani kita aturna, wêwangsulan miwah, pisungsung manira, [116] mring natèng Sèrèndhit, 10. karana iya, ing panggalih ingsun, yogya sira ingkang, umawa wangsulan, pakurmatingong, sabdèng sri puniku, upama lir kêtug, tumiba wandèngwang, atur manira, pukulun sandika, lumaksanèng agnya, nanging pamintamba, wontêna karsa, paduka anggalih, yèn lalu asayah, kawula sang katong, 11. amargi manggya, sangsayaning lampah, kalamba linggaran, mambah tasik nguni, lan malihira, ulun wus prasapa, tan arsa umimba, malih saking Bahdad, nulya ngong ngandhar, sakwèhing lêlakon, duk ing nguni-uni, sri narendra sabar, amiyarsakkên, sataming carita, nararya manabda, nyata anindyèlok, 12. katanirèku, ananging ta mungguh, karsaningsun mau, aywa sira mikir, sangsara kang wus, pinanggyèng raganta, agnyaningsun iki, sira lakonana, kita mentara, mring pulo Sèrèndhit, anglêksananana, karsaningsun mau, yèn sira uwus, lumaksanèng pakon, ngong lilani banjur, umulih kewala, 13. tan kêna ora, umêngsata, sabab ing pamikir, ana ing sirèku, bakal ngêsorkên, kaluhuraningwang, yèn ingsung kongsia, kapontangan bêcik, mring natèng Srendhit, nêngna linging nata, rèhning pawawang ngong, puguh karsanira, sun nyandikani, lumaksanèng agnya, sri lalu sukèng tyas, dhawuhkên parèntah, 14. masungi wang mas, sewu mring manira, sumurup kinarya, wragading lingaran, tantara lama, gyaningsun sawega, dupi pisungsung lan, pustakèng narendra, wus kaprah mring ngong, nulya sun amangkat, du-[117]- monèng Balsarah anangku tumulya, manitih palwa, prasiddha ing laku, praptèng nuswa Srèndhit, tundhuk dasih katong,

40. Candrawilasita, lampah 12, pêdhotan 4-8

1. ngong sung uning, yèn praptaningsun dinuta, pamintèngwang, enggal kerida mring pura, sigra ingsun, winawa manjing kadhatyan, kanthi kurmat, sapraptèngong ngarsèng katong, 2. sujud anung-, kêmi padaning nrêpati, sri tan indung, lalu arsèkanang driya, manon ring wang, andikanira bageya, sira Sinbad, saungkurira sing Srèndhit, 3. ingsun tansah, angèsthi marang ing sira, dina iki, sun saksat ane-, mu nohan, dene têka, katêmu lawan sirèku, wusnya ingsun, kurmat sarya anaoskên, 4. gung pamundhi, ing drêdyanirèng nrêpati, surat miwah pisungsung sing Prabu Harun, ngong aturaken, tinampèn lan sukèng driya, de pisungsung-, ngira Sri Harun Alrasid, 5. warna kathil, sajuga rinênggèng tatur, murwatannya, pangaji sewu uwang mas, jubah sèkêt, lêlungsir adi sadarum, jubah wastra, seta dahat alus-alus, 6. saking praja, ing Kairo miwah Suès, len ing Kuffah, sarta saking Alèksandri, satus iji, lan kathil malih sajuga, prabot rêkta, lan ane malih sawiyos, 7. anèh parkir-, tya nguni wèh dhapunira, tuwung siki, akik mulya kang kinardi, wangunira, kapara wera lan ajro, kandêlira, tan kurang saking sanyari, 8. wiyaripun, watara satêngah, [118] kaki, tuwung ika, ing ngisor aciri dhorèng, lir wong jèngkèng, musthi warastra lan langkap, mawas rimong, malihnya meja sajuga, 9. piandelnya, manungsa jamaningrika, kagunganira kangjeng Nabi Suleman, de surasa-, ning sratira Prabu Harun, pan mangkana, punika srating Abdullah, 10. Ron Alrasid, kang wus ginanjar kamulyan, de Hyang Suksma, tumêndhak sing luhurnya, katur mring jêng, sultan ing nuswa Serèndhit, ratu dibya, sinung kamuktèn wibawan, 11. mugi-mugi, ginanjara karaharjan, de Hyang Widdhi, wiyosira kula sampun, anampèni, pustaka lawan pisungsung, sing sang prabu, kalayan arsanèng driya, 12. mangke kula, angaturi wêwangsulan, awit saking, pirêmbaging pra nayaka, pangarsa-ar-, saningwang katupiksaa, lan sang nata, mugi angudanènana,