Dhadhap Mantêp, lampah 13, pêdhotan 5-8

wusnya pinanggih, prayoganirèng panggosthi, ingong sumêdya, amanjangakên ardana, 7. kang kantun muhung, sakêdhik ing gunggungira, prayojanèku, adaningsun lêksanani, sigra umangkat, maring nagri ing Balsorah, nênggih palabuh-, anira praja ing Pèrsi, 8. ane ing ngriku, ingong umanjat ring palwa, lan juragan kwèh, samya ambêkta dagangan, ing sawatara, tumulya ambabar layar, sumêdya arsa, numilag mring tanah Ngindhu, 9. mambah samodra-, nira nagari ing Pèrsi, de prênahira, nagari ing Ngindhu wau, ing lengkonganira, prajèng Arab lan ing Pèrsi, tantara dangu, gyaningsun anèng udaya, 10. wangwang sru mumêt, miwah umor arsa nuntak, yèku pan ingkang, winastan sakit jaladri, nanging tan dangu, sêsakitingsun waluya, salajêngira, tan kataman gring kadyèka, 11. lampahing palwa, kampiring nuswa akathah, sabên akèndêl, anyadèni dêdagangan, myang ngurup-urup, bêbê-[46]-ktan gêgramèningsun, nujwèng waktwèku, tan amaruta sumilir, 12. banawaningong, kandhêg ngarêpakên nuswa, ton sing mandrawa, apan kadi ara-ara, wit sing wilisnya, kapitan sigra umatag, amulung layar, lan mangagnya mring kirna wyang, 13. kang munggwing palwa, yèn ana ayun umêntas, mring nuswa ika, apan inggih linilanan, dyan kèh kang mêntas, ingong tan kari tumutur, sakancaningwang, sawêgung awijah-wijah, 14. nadhah drawina, mamrih anirnakkên payah, nging samadyanya, samya among suka-suka, nuswa prakêmpa, Kusuma Seherah Sadhe, dupi dènira, carita têkèng samana, 15. kèndêl wit dening, andungkap tatas rahina, ratrinya malih, andumugèkkên cariyos, aturira mring, Sri Narapati Sèhriyar, pukulun Sinbad, anglajêngkên katanira, 16. pangucapira, prakampitaning kang nuswa, kèksi sing palwa, sakwèh kang munggwing banawa, asru nênantya, ring ngong myang kanca sadarum, pinurih gupuh, uwangsula maring palwa, 17. wit kang sinidhèp, nuswèku gigiring mina, winastan lodan, ingkang cukat gupuh manjat, ring palwa alit, sawênèh wontên kang ume, de raganingsun, maksih nèng gigir wiyaga, 18. matsyada nilêm, ingong kantun nèng udadi, tan antuk ramon, ri wusnya sakwèhning janma, manjat mring palwa, nguni wèh kang mangrakwaya, wus tinulungan, kapitan sigra mangatag, 19. ambabar layar, nujwantuk pracondha yogya, wangwang umangkat, [47] ngong tan darbe pangarsarsa, bakit uwangsul, malih munggah mring banawa, nut salembaking, alun kongsi ing sahari, 20. miwah saratri, lembak-lembak nèng samodra, sakuwasèngsun, mangukih bakit agêsang, praptaning enjang, anis dayaning wandèngwang, locitèng driya, tan bakit ninglari laya, 21. rahayunira, ingong kasêntoring ring alun, kentas tiba ring, nuswa ragi mênggêr-mênggêr, curi kewala, kadi kangèlan inanjat, pama tan nuju, ane susuluring wrêksa, 22. ingkang minangka, sarananira umunggah, praptèngong ruhur, ngalèlèh anèng pratiwi, uwus prasaksat, satêngah lalis ragèngwang, mangkana kongsi, pratanggapati tumambang,

17. Sasadara Kawêkas, lampah 20, pêdhotan 7-7-6

1. nadyan lungkrah kamantyan, sing payah nèng jaladri, lèn saking tan bukti, sakuwasa umahas, mangruruh gêgodhongan, kang kêni binukti, datan antara dangu, manggya rondhon surasa, lan amanggih umbul, wenya pawitra dahat, mawèh sumrahing angga, dupi karosan ngong, 2. watara wus apurna, sun umidêr ring nuswa, lampah sangkin têbih, prapta ring ngara-ara, sing mandrawa ngong dulu, turangga sajuga, dumunung nèng pangonan, sigra ingong parani, ananging tyasingwang, tansah asonggarunggi, bilih mancabayani, ri wusnya apêdhak, 3. ton kudèku pawèstri, cinancang anèng pathok, sing pelaging warna, tan pêgat ingong sawang, sadangunya myat wajik, miarsa swa-[48]-rèng janma, ane jroning bantala, tantara samya kèksi, marani maringwang, atanya namaningsun, nulya ingong jarwani, miwah sun wartèni, 4. sakwèhning lampah-lampah, wusnya ênti kang crita, ngong wangwang kinanthi, winawèng jro guthaka, hringku ane wong lènnya, eram tumon mami, ingsun samantên ugi, gumun myat dhèwèkira, de samya nèng guwa, ngong binoja abukti, wusnya nadhah ngong tanya, karyanya nèng sana, 5. ingkang samun kadyèka, wangsulaning pamuwus, samya gamêlira, Narapati Mitra Ghês, kang madêg nèng nuswèku, sabên-sabên warsa, numilag ing gon wau, ambêkta turanggèstri, kagungan sang prabu, cinancang kadi kang wus, kadulu ing nguni, drapon sinanggaman, 6. dening kuda samodra, atatya sing udadi, wusnya sacumbana, wangwang karsa minangsa, ananging tan kalakyan, wit ing ngêlokakên, dadya turangga gupuh, uwangsul maring tasik, ri wus asinanggaman, turanggèstri winawa, sumusuk maring praja, de ta turunira, 7. dadya puspakèng nata, mangran kuda jaladri, sataming pawarta, ingong pan pinajaran, yèn samyarsa umulih, ari benjang-enjang, upama praptaningwang, lungse muhung sahari, yêkti têmah layon, ane ing nuswa ngriku, wit kinira tan bakit, umilag mring praja, 8. yèn tanpa wontên ingkang, anuduhakên ênu, ing sadangunira, samya imbalan sabda, dyan turangga samodra, mijil sing udaya, nyumbana ring kudèstri, ri wusnya yun minangsa, nging gupuh sinanti, [49] mring para gamêl wau, bayangannya tinilar, tumamèng jaladri, 9. enjang pra gamêl sigra, umulih maring kitha, kudèstri winawa, ngong tumutur ing lampah, wangwang samya sumiwi, ngarsèng Sri Mitra Ghês, ingong pinrih tut wuri, sewakèng naradipa, duk praptèng ngarsaji, sri tanya panêngran ngong, miwah prawitanira, de kongsi umambah, 10. ing talatah narendra, ri wusnya mratelakkên, kang dadya patanya, sang iswara ngandika, wêlas andulu mami, tandya sri mangagnya, ngupadrawa maring ngong, masungi sakwèhning kang, dadya kêkurangan, agnyèku linaksanan, ingsun angalêmbana, kadarman narpati, 11. myang praladaning dasih, angladèni maringong, rèhning sun sudagar, dadya ing sabênira, alinggar panggih lawan, janma ingkang sami, utsahanya lan ingong, de ta prêluning lampah, tundhuk lawan janma, kang saking lèn nagari, kang dhihin pangangkah ngong, darapon bakita, 12. antuk warta sing Bahdad, kaping kalih sagêda, amanggih sujanma,