Brêmarawilasita, lampah 11, pêdhotan 4-7

8. umiyating, sonèstri mulya jati, wit sirnaning, cintaka sing karsèndra, dyan mangatag, nimbali ingkang putra, Pangran Amin, miwah sinungan wikan, 9. yèn sang nata, sampun antuk pawarti, dènnya krama, alampah dhêdhêmitan, myang sumarma-, nira Rêtna Amine, nandhang gèthèk, risang Pangeran Amin, 10. dè-[40]-rèng kongsi, inagnyan de kang rama, umalapa, malih mring Kèn Amine, pan kawijil, aturira pribadi, yun pinêndhêt, malih kinarya garwa, 11. karsanira, Prabu Harun Alrasid, Sobehidhe, pinèt garwa pribadi, fêkir katri, tinantun angrabèni, Safi miwah, kadanging Sobehidhe, 12. kêkalih kang, sampun mulya sajati, tan lênggana, lumaksanèng karsèndra, nulya Sang Sri, Run Alrasid karsanya, fêkir katri, sinungan wisma agêng, 13. anyajuga, sajroning prajèng Bahdad, myang ginanjar, lungguh dadya nayaka, wusnya gilig, ing gosthi bab pikramèn, dyan nimbali, khali lan sêksi kalih, 14. aningkahkên, fêkir têtiga wau, Prabu Harun, saking wus kathah dènnya, mitulungi, pangupadrawèng papa, apan dadya, kidung pangalêmbana, 15. kwêhning janma, samya angupasanta, kaharjèng Sri, Serah Sadhe muryani, criyosira, janma kang sring linggaran, umambah ing, jaladri nama Sinbad, 16. aturira, mring Narendra Sèhriyar, sri bupati, ing nagri bawahira, Prabu Harun, kang wus iniwên wau, wontên bêrah, Inbad panêngranira, 17. ing sajuga, ari nuju sru panas, angrêrêmbat, sing awrat kang winawa, miwah payah, mangka prênahing sana, kang jinujug, apan maksih atêbih, 18. lampah ari, kèndêl wontên ing lurung, hringku nuju, pawana silir-silir, rêmbatannya, sinèlèh dèn lênggahi, de gyan kèndêl, [41] cakêt lan wisma agêng, 19. sru ascarya, dènnya kandhêg nèng ngriku, awit mambêt, gonda mrik miwah dupa, kang atatya, sing janelaning panti, lèn rumêngya, swarèng gongsa angrangin, 20. barung lawan, sabawaning kukila, kwèh mawarna, ciptanira ing driya, yêkti wontên, janma bogadrawina, yun uninga, maring kang darbe wisma,

15. Wêgangsulanjani, lampah 23, pêdhotan 5-6-6-6

1. rèhning ki bêrah, awis nampaka ring, lêlurung punika, marma tunèng sêrêp, sing sruning sêkung, dènnyarsa udani, sigra amurugi, rencange kang darbe, wisma gêng wau, panuju umadêg, wontên ing wiwara, asri busananya, yèka tinanya, wastane kang darbe, wisma gêng puniku, sojaring liningan, 2. sirèku janma, nagara ing Bahdad, de têka datan wrin, yèn kang darbe panti, iki ran Sinbad, ingkang wus kuncara, nampakèng samodra, saliring udadi, kang kaprabaning, kulandara agni, kabèh wus jinajah, ya ta sira Inbad, nguni wus myarsa, parartaning Sinbad, tinimbang kalawan, kamlaratanira, 3. jro tyasmu rina, mring kalabèng Sinbad, sing ardèng rudatin, tumêngèng gêgana, sru dya manantya, piniarsèng kathah, ya Gusti Allahu, kang Amurbèng tuwuh, mugi galiha, ing prabedanira, wandèngong lan Sinbad, sabên-sabênira, ulun sangsaya, anindya rêkasa, mangruruh ring boga, ngingoni nak rabi, 4. miwah tatêdhan, kang kawula bukti, mêhêng data-[42]-n eca, mangka ta pun Sinbad, tan kêkirangan, amukti wibawa, manggih kahastaman, paran labêtira, Tuan asungi, nugraha gung iku, lan paran dosèngong, anandhang sudrardda, Inbad wus sira, nênantya mangkana, wangwang gêdrug-gêdrug, lir kataman unang, 5. dèrèng wus dènnya, ngèsthi ring pataka, pinanggyèng wandanya, nulya sira mulat, abdi sajuga, priya umijil sing, wisma amarani, maring sira Inbad, nandhak bujanya, lingira mangkana, payo tut wuria, ing salakuningong, bêndara Sinbad, arsa atêtanya, iya marang sira, rèhning wus rahina, 6. Seherah Sadhe, kèndêl acarita, ratri dinugèkkên, itina lingira, sri narapati, paduka saèstu, sagêd anggaliha, eramira Inbad,